بيىل, «MEN QAZAQPYN» جوباسىنا ەلىمىزدىڭ 14 ايماعىنان, 180-گە جۋىق اۋدان ورتالىقتارى مەن اۋىلدارىندا ىرىكتەۋ كەزەڭدەرى وتەتىن بولادى. اۋداندىق ىرىكتەۋدەن وتكەن جەڭىمپازدار, وبلىستىق بايقاۋعا ءوتىپ, باق سىناسادى. ۇلتتىق ارنانىڭ اۋقىمدى جوباسىنا كورپوراتسيانىڭ ايماقتارداعى بارلىق فيليالدارى بەلسەنە اتسالىسۋدا. العاشقى ىرىكتەۋ كەزەڭدەرى اۋليەكول, التىنسارين ەلدىمەكەندەرى مەن قوستاناي قالاسىندا ءوتتى.
جوبانىڭ ماقساتى – ەلىمىزدىڭ تۇكپىر-تۇكپىرىندەگى ءداستۇرلى ءانشى-تەرمەشى, كۇيشىلەردىڭ باسىن ءبىر ارنادا توعىستىرىپ, ەلىمىزدىڭ ءار ايماعىندا قالىپتاسقان ونەر مەكتەپتەرىنىڭ تاڭداۋلى تۋىندىلارىن دارىپتەۋ, ءتول ونەرىمىز - كۇي, جىر-تەرمەنى دامىتىپ, زامانعا ساي جاڭاشالاندىرىپ, وسكەلەڭ ۇرپاققا ناسيحاتتاۋ.
بيىل «MEN QAZAQPYN» مەگاجوباسىنىڭ ىرىكتەۋ كەزەڭى ماۋسىم ايىنىڭ سوڭىنا دەيىن وتەتىن بولادى. بايقاۋعا قازاقستان رەسپۋبليكاسىندا تۇراتىن 18 بەن 40 جاس ارالىعىنداعى, قازاق كومپوزيتورلارىنىڭ جانە حالىق اندەرىن دومبىرا, قوبىز, سىرناي اسپاپتارىنىڭ سۇيەمەلدەۋىندە ورىندايتىن ونەرپازدار قاتىسا الادى. بايقاۋعا قاتىسقىسى كەلەتىن ۇمىتكەرلەر «قازاقستان» تەلەراديوكورپوراتسياسىنىڭ ايماقتارداعى فيليالدارىنا حابارلاسىپ, تولىق مالىمەت الا الادى.
ايتا كەتەيىك, قازاقستان رەسپۋبليكاسىنىڭ اقپارات جانە كوممۋنيكاتسيا مينيسترىلىگىنىڭ قولداۋىمەن «Qazaqstan» رترك» اق بىرلەسىپ, 2017 جىلى «مەن قازاقپىن» اتتى حالىقارالىق تەلەۆيزيالىق مەگاجوباسىن العاش رەت جۇزەگە اسىرعان بولاتىن. وتكەن جىلى, بۇل جوباعا 3000-نان استام ۇمىتكەر ءوتىنىش ءبىلدىرىپ, وبلىستىق ىرىكتەۋگە 700-دەي ادام قاتىسقان بولاتىن. ال, استانادا وتكەن تەلەۆيزيالىق جوباعا 57 ونەرپاز باق سىناسىپ, ءوز ونەرلەرىن كورسەتە الدى. سونداي-اق, «مەن قازاقپىن» مەگا جوباسىنا قىتاي, رەسەي, موڭعوليا ەلدەرىندە تۇراتىن قانداستارىمىز دا ءوز ونەرلەرىن كورسەتۋىگە مۇمكىندىك العان بولاتىن.
