وڭىرلىك كوممۋنيكاتسيالار قىزمەتىندە اتىراۋ وبلىستىق جاستار ساياساتى ماسەلەلەرى باسقارماسىنىڭ باسشىسى روللان قۇسپاننىڭ قاتىسۋىمەن ءباسپاسوز جيىنى ءوتتى. بايانداماشىنىڭ ايتۋىنشا, وڭىردە جاستار ساياساتى ماسەلەلەرى باسقارماسى جاستارمەن قارقىندى جۇمىس جاساپ, قايىرىمدىلىق پەن كاسىپكەرلىككە قولداۋ ءبىلدىرىپ, جۇمىسقا ورنالاسۋ مەن تۇرعىن ءۇي ماسەلەلەرى بويىنشا كومەك كورسەتىپ كەلەدى.
«بيىلعى جىلى بىزدە كوپتەگەن وزگەرىستەر بار. ستۋدەنتتەرگە قوعامدىق كولىكتە جۇرۋگە 50% جەڭىلدىك بەرىلدى, بۇعان جەرگىلىكتى بيۋدجەتتەن 313,6 ملن. تەڭگە ءبولىندى. بۇدان بولەك, وسى جازدا «جاسىل ەل» باعدارلاماسى بويىنشا 2000 ستۋدەنت قامتىلادى, ولارعا 61 000 تەڭگە كولەمىندە ايلىق تولەنەدى. ايتا كەتۋ كەرەك, وسى جىلدىڭ شىلدە ايىندا جاس وتباسىلارعا «جاس وتاۋ» باعدارلاماسى بويىنشا 100 پاتەرلى كوپ قاباتتى تۇرعىن ءۇي پايدالانۋعا بەرىلەدى», دەيدى روللان قۇسپان.
سونىمەن قاتار, ۇكىمەتتىك ەمەس ۇيىمداردى مەملەكەتتىك جاستار ساياساتىن دامىتۋ ءۇشىن وڭىرلىك دەڭگەيدە شەشىمدەر قابىلداۋعا تارتۋ ماقساتىندا بەلسەندى جۇمىس جۇرگىزىلۋدە. مەملەكەتتىك الەۋمەتتىك تاپسىرىس اياسىنداعى ۇكىمەتتىك ەمەس جاستار ۇيىمدارى بىرقاتار الەۋمەتتىك ماڭىزى بار جوبالاردى ىسكە اسىرۋدا: ستۋدەنتتىك ءوزىن-ءوزى باسقارۋدى دامىتۋ, وبلىستىق دەلفي ويىندارىن ۇيىمداستىرۋ, بوس ۋاقىتىن ءتيىمدى وتكىزۋدى ۇيىمداستىرۋ, قىزمەتىن ۇيىمداستىرۋ, الەۋمەتتىك وسال جانە جاعدايى تومەن جاستارمەن جۇمىس ۇيىمداستىرۋ, سىبايلاس جەمقورلىققا قارسى سانا قالىپتاستىرۋ, بۇقارالىق سپورتتى ناسيحاتتاۋ جانە سۋبمادەنيەت وكىلدەرىنىڭ الەۋەتىن ارتتىرۋ, استانانىڭ 20 جىلدىعىنا ارنالعان ءىس-شارالار كەشەنىن ۇيىمداستىرۋ جانە ت.ب.
مۇنايلى وڭىردە مەملەكەتتىك باعدارلامالار دا قارقىندى ىسكە اسۋدا.
«ديپلوممەن اۋىلعا» باعدارلاماسى بويىنشا 32 جاس مامانعا بيۋدجەتتىك نەسيە بەرىلدى, 125-ءى ءبىر رەتتىك الەۋمەتتىك كومەكپەن قامتىلدى. جۇمىسپەن قامتۋعا بايلانىستى 2017-2021 جىلدارعا ارنالعان بۇقارالىق كاسىپكەرلىكتى دامىتۋ جانە ءونىمدى جۇمىسپەن قامتۋ باعدارلاماسى بويىنشا جۇمىس ورنىندا 2419 جاس, ونىڭ ىشىندە اۋىلدىق جاستاردىڭ 2020 وكىلى قامتىلدى. «بيزنەس باستاۋ» جوباسىنىڭ مالىمەتى بويىنشا, 1 325 ادام كاسىپكەرلىكتىڭ نەگىزىن ۇيرەندى, ولارعا 669.938 ميلليون تەڭگە كولەمىندە ميكروكرەديتتەر بەرىلدى», دەيدى اتىراۋ وبلىستىق جاستار ساياساتى ماسەلەلەرى باسقارماسىنىڭ باسشىسى روللان قۇسپان.
