اۋەزوۆ تەاترىنىڭ جىل سايىنعى ءداستۇرلى جازعى گاسترولى بيىل باتىس قازاقستان وبلىسىنان باستالدى. عاسىرعا جۋىق تاريحى بار ونەر ۇجىمىنىڭ د.تەمىرسۇلتانوۆا, د.اقمولدا, ا.ساتىبالدى سەكىلدى تانىمال ونەرپازدارى ي.ساپاربايدىڭ «سىعان سەرەناداسى», م.وماروۆانىڭ «اقتاستاعى احيكو», ر.وتارباەۆتىڭ «بەيبارىس سۇلتان», ع.ەسىمنىڭ «تاڭسۇلۋ», ا.ءۆولوديننىڭ (اۋدارعان ا.ماەميروۆ) «قوشتاسقىم كەلمەيدى...» قويىلىمدارىن ساحنالادى.
ءبىر ەرەكشەلىگى, بۇل جولى اۋەزوۆ تەاترى تەاتر جانىنداعى مۋزەي قورىنان قىزىقتى جادىگەرلەر اكەلىپ, كوشپەلى كورمە دە ۇيىمداستىرىپتى. جارتى عاسىرلىق تاريحى بار تەاتر مۋزەيىندە العاشقى تەاتر ارتىستەرىنىڭ كيىمدەرى مەن فوتوسۋرەتتەرى, افيشالارى, باعدارلامالارى, ومىردەن وزعان تەاتر ارتيستەرىنىڭ ءومىرباياندارى, جەكە ماتەريالدارى, قولجازبالارى, العان سىيلىقتارى ساقتالعان. تەاتر مۋزەيىنىڭ جەتەكشىسى نارگيز اسانجانوۆا ورالدىقتارعا ءاربىر جادىگەردىڭ تاريحىن اسەرلى اڭگىمەلەپ بەردى.
- «رۋحاني جاڭعىرۋ» باعدارلاماسى اياسىندا تەاتر گاسترولى وڭىرلەردە بۇدان بىلاي دا جالعاسادى. بۇعان قوسا ءبىزدىڭ تەاتر بيىل فرانتسيادا وتەتىن دۇنيەجۇزىلىك «اۆەنيۋ» تەاتر فەستيۆالىنە قازاقستاننان تۇڭعىش رەت قاتىسايىن دەپ وتىر. ءبىز بۇل دوداعا اقىن-دراماتۋرگ, مەملەكەتتىك سىيلىقتىڭ يەگەرى يران-عايىپتىڭ (يرانبەك ورازباەۆ) «قورقىت» دراماسىن ازىرلەپ جاتىرمىز, - دەيدى ونەر ۇجىمىنىڭ بولاشاق جوسپارلارىمەن بولىسكەن تەاتر ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆ.
الماتىلىق ونەر ۇجىمىنىڭ گاسترولدىك ساپارى جەكسەنبى كۇنى ر.وتارباەۆتىڭ «بەيبارىس سۇلتان» تاريح دراما قويىلىمىمەن اياقتالدى. بەيبارىس سۇلتاننىڭ بەينەسىن اكتەر ازامات ساتىبالدى وينادى. قورىتىندى كەشكە قازاقستاننىڭ ەڭبەك ەرى, كسرو حالىق ءارتيسى, سسسر, قازسسر مەملەكەتتىك سىيلىقتارىنىڭ لاۋرەاتى ءاسانالى ءاشىموۆ, قر حالىق ءارتىسى ەسمۇقان وباەۆ قاتىسىپ, تىلەك ءبىلدىردى. تەاتر ديرەكتورى اسحات ماەميروۆ ءار قويىلىمدى قۇشاق جايا قارسى العان كورەرمەن قاۋىمعا, تەاتر ارتيستەرىن ارنايى قابىلداپ, قۇرمەت كورسەتكەن وبلىس باسشىلارىنا العىسىن ايتتى.
اۋەزوۆ تەاترىنىڭ گاسترولى قوستاناي وبلىسىندا, ارقالىق قالاسىندا جالعاسپاق.
قازبەك قۇتتىمۇرات ۇلى
«ەگەمەن قازاقستان»
ورال قالاسى
سۋرەتتى تۇسىرگەن رافحات حالەلوۆ
