ەلىمىز تاۋەلسىزدىك الىپ, وركەنيەتتى مەملەكەتتەر ساناتىنا قوسىلۋ جاعدايىندا ادامگەرشىلىك-ەتيكالىق يدەيالار كورىنىس العان قازاق حالقىنىڭ رۋحاني-مادەنيەتىن زەرتتەۋ, تاربيەدەگى وزىق داستۇرلەرىن بۇگىنگى قوعام تالابىن ەسكەرە وتىرىپ زەردەلەۋ كوكەيكەستى ماسەلەنىڭ ءبىرى بولىپ وتىر. بۇل تۋراسىندا ەلباسى: «اردى باعالايتىن, بەلسەندى, جوعارى ءمورالدى, ادەپتى جانە رۋحاني بايلىعى مول ادامداردان تۇرۋى كەرەك. قازاقستاننىڭ بىرەگەي حالىقتارىنىڭ ۇلتارالىق جانە مادەنيەتارالىق ىنتىماعى مەن جەتىلۋىن قامتاماسىز ەتە وتىرىپ, قازاق حالقىنىڭ كوپ عاسىرلىق داستۇرلەرىن, ءتىلى مەن مادەنيەتىن ساقتايمىز جانە دامىتا تۇسەمىز» دەپ اتاپ وتكەن بولاتىن.
كەيىنگى جىلدارى قوعامدا ورىن الىپ وتىرعان كەلەڭسىز جايتتار مەن وقىس وقيعالار, بۇگىنگى تاربيە سالاسىنداعى يننوۆاتسيالىق كوزقاراستى پەداگوگيكادا جۇيەلى تۇردە پايدالانۋعا بايلانىستى ءتيىمدى يدەيانىڭ بولماۋى دا ادامگەرشىلىك تاربيەنى, سونىڭ ىشىندە مورالدىق-ەتيكالىق تاربيەنى داعدارىسقا اكەلۋدە. بۇل ماسەلەنىڭ شەشىمىن, عاسىرلار بويى ءوزىنىڭ كوكەيكەستىلىگىن جوعالتپاعان, كەرىسىنشە, ءاربىر قوعامدىق فورماتسيادا بولعان وزگەرىستەرگە بايلانىستى جەتىلىپ وتىرعان قازاق حالقىنىڭ وزىق مورالدىق-ەتيكالىق داستۇرلەرىنەن ىزدەستىرۋ قاجەت. ويتكەنى, قازاق حالقىنىڭ وزىق ەتيكالىق داستۇرلەرىنىڭ نەگىزى بولىپ قالانعان گۋمانيستىك يدەيالار, ادامگەرشىلىكتىڭ باستى قۇندىلىقتارىمەن بايلانىستى جانە ادامزات ءمورالىنىڭ نەگىزدەرىن ماعىنالى تۇردە جان-جاقتى مەڭگەرۋدە, ادامدار اراسىندا تازا ادامي قارىم-قاتىناستى تاربيەلەۋدە جەتەكشى قۇرالداردىڭ ءبىرى بولىپ تابىلادى.
مورالدىق-ەتيكالىق داستۇرلەردى حالىق دانالىعىنىڭ نەگىزگى ءبىر كورىنىسى رەتىندە قابىلداۋ بۇگىنگى ءبىلىم بەرۋ جۇيەسى ءۇشىن اسا ماڭىزدى. بۇنىڭ, اسىرەسە بولاشاق مۇعالىمدەر ءۇشىن پايداسى زور. ولاي دەيتىنىمىز, وقۋشىلاردىڭ مورالدىق-ەتيكالىق مادەني دەڭگەيىنىڭ دۇرىس قالىپتاسۋى مۇعالىمنىڭ تۇلعالىق ادامگەرشىلىكتى مورالدىق-ەتيكالىق قاسيەتتەرىنە, وسى باعىتتا مەڭگەرگەن تاريحي-تەوريالىق, پراكتيكالىق, ءبىلىم, ىسكەرلىك, داعدى دەڭگەيىنە بايلانىستى ايقىندالادى. ناتيجەسىندە بۇنىڭ بارلىعى قازاق حالقىنىڭ مورالدىق-ەتيكالىق تاربيەسىندەگى وزىق داستۇرلەرىن زەردەلەۋگە باعىتتايدى.
مامان دايارلاۋ زامان اعىمىنا قاراي جان-جاقتى كاسىبي قۇزىرەتتىلىگىن شىڭداۋدى قاجەت ەتەدى. الەمدەگى بەدەلدى ۋنيۆەرسيتەتتەردىڭ تاجىربيەلەرىنە سۇيەنەر بولساق, ءبىز ۇستاز دايىنداۋمەن شەكتەلمەي, قوعامعا قاجەتتى مامان دايارلاۋىمىز كەرەك. بۇل ءبىز دايىنداپ وتىرعان مامانداردىڭ جۇمىس بەرۋشىلەر تالابىنا عانا ەمەس, قوعام تالاپتارىن قاناعاتتاندىرۋ بولىپ تابىلادى. بۇگىنگى وزگەرىستەر – الەم تاريحىندا بولماعان جاڭا مۇمكىندىكتەر مەن جاڭاشىلدىقتار ءداۋىرى. بۇل تۇرعىدا قىزدار ۋنيۆەرسيتەتىندە زامان كوشىنە ىلەسۋ ماقساتىندا جۇمىستار جۇيەلى جۇرگىزىلۋدە. ءتۇرلى تاعىلىمعا تولى ءىس-شارالار ارقىلى قازاق حالقىنىڭ ادەت-عۇرىپ, سالت-داستۇرلەرىن دارىپتەپ, قاراكوز قىزداردى قۇندىلىقتار مەن ىزگى قاسيەتتەرگە باۋلىپ, ار تازالىعىن جوعارى ۇستايتىن تۇلعا, قوعام قاجەتتىلىگىن قاناعاتتاندىراتىن ۇستاز مامان دايىنداۋدى ماقسات ەتىپ كەلەمىز. ءبىلىم مەن عىلىمنىڭ قاراشاڭىراعى – قىزدار ۋنيۆەرسيتەتى ءوز قىزمەتىندە تاربيە سالاسىن, قازاقستاندىق ءپاتريوتيزمدى, مەملەكەت باسشىسىنىڭ ماڭگىلىك ەل يدەياسىن كەڭىنەن ناسيحاتتاۋدى باستى نازاردا ۇستايدى. ۇلتىمىزدىڭ ۇلىلىعىن ۇلىقتايتىن ۇعىمداردىڭ ءبىرى – ەتيكا. ويتكەنى, ءار ەلدىڭ ورنالاسۋ ايماعىنا, تىرشىلىك سالتىنا, ءومىر ءسۇرۋ داعدىلارىنا بايلانىستى ورتاق مىنەز-ق ۇلىق ەرەجەلەرى, ءجۇرىس-تۇرىسى, تىنىس-تىرشىلىگى قالىپتاسادى. قازاق ەتيكاسى كول-كوسىر مولدىعىمەن, ادامگەرشىلىك قۋات تەگەۋرىنىمەن, تاريحي ايقىندىلىعىمەن حالىقتىڭ رۋحاني ومىرىندە ەرەكشە ورىن الادى. قازاق ەتيكاسىنىڭ ەجەلگى باستاۋ قاينار كوزدەرى ءۇش مىڭ جىلداي ەۋرازيانىڭ ۇلى دالاسىندا وركەندەگەن ساق, عۇن, ءۇيسىن, قاڭلى مەن تۇرىك بىرلەستىكتەرىنىڭ مول مادەنيەتىنەن ءنار العان. وسىدان 2600 جىل بۇرىن-اق ءومىر سۇرگەن ساق ويشىلى اناحارسيس ادەپ جانە ادامگەرشىلىك تۋرالى تەرەڭ پىكىر قالدىرعان.
قازاق حالقى قاي كەزەڭدە بولماسىن قىز بالا تاربيەسىنە جەتە ءمان بەرگەن. ول – مادەنيەتتىلىكتى يدەالعا باعدارلاۋ ارقىلى ياعني حالىققا سىيلى ادامداردىڭ ونەگەلى ءىسىن, رۋحاني ادامگەرشىلىك مادەنيەتىن, بەدەلى مەن مىنەز-قۇلقىن, ءبىلىمى مەن قابىلەتىنە, قارىم-قاتىناس مادەنيەتىن ۇلگى ەتۋ ارقىلى قالىپتاستىرعان. يدەالدى كۇندەلىكتى ومىرگە قاجەتتى باستى باعداردىڭ ءبىرى دەپ ەسەپتەگەن. مىسالى, «قوزى كورپەش, بايان سۇلۋ», «ايمان-شولپان», «قىز جىبەك» جىرلارى ارقىلى حالىق قازاق قىزدارىنىڭ رۋحاني ادامگەرشىلىكتى بەينەسىن, مورالدىق كەلبەتىن, مىنەز-قۇلقىن, ءجۇرىس-تۇرىسىن, كيىم كيىسىن, ءوزارا قارىم-قاتىناسىن ونەگە ەتسە, دومالاق انا تۋرالى اڭىزدا قازاق ايەلدەرىنە ءتان دانالىقتى, ۇستامدىلىقتى, سەزىمتالدىقتى, تاپقىرلىقتى ۇلگى تۇتۋعا شاقىرعان.
دانا حالقىمىز قىز تاربيەسىندە كۇندەلىكتى تۇرمىس-تىرشىلىگىندەگى جانە قوعامداعى ادامگەرشىلىكتى مورالدىق-ەتيكالىق مادەني قارىم-قاتىناسقا اسا ءمان بەرگەن. وتباسى, تۋىستار اراسىنداعى قارىم-قاتىناستىڭ ادام ساناسىنا, مىنەز-قۇلقىنا, ىشكى جانە سىرتقى مادەنيەتىنىڭ قالىپتاسۋىنا اسەرىنىڭ مول ەكەنىن جەتە تۇسىنگەن. ماسەلەن, اكە مەن بالانىڭ, انا مەن قىزدىڭ, اكە مەن قىزدىڭ, كەلىن مەن قايىن ەنەنىڭ, كەلىن مەن اتانىڭ, ناعاشى مەن جيەننىڭ, كۇيەۋ مەن قايىن ەنەنىڭ, باجالاردىڭ, جەزدەلەردىڭ, بولەلەردىڭ اراسىنداعى وتە ءبىر نازىك جاراسىمدى قارىم-قاتىناس مورالدىق مادەنيەتتىڭ نەگىزىن قالاۋدا ۇلكەن ءرول اتقارعان دەسە ارتىق بولمايدى. مىسالى, جاس كەلىننىڭ توتىم, اينام, سەرى جىگىت, ەركەجان سياقتى ات قويۋىنىڭ ءوزى الدىڭعىلارعا قۇرمەت, كەيىنگىلەرگە ىزەت كورسەتۋ بولسا, وزەنباي, قامىسباي, قويشىباي, باكىباي, قاسقىرباي ەسىمدى قايىن اعالاردىڭ ەسىمدەرىن اتاۋدان قاشقاقتاپ, قاسقىر جارىپ كەتكەن قويدى باۋىزداپ الۋ ءۇشىن قاسىنداعى كىشكەنتاي قاينىسىن اۋىلعا جۇمساعان جەڭگەنىڭ: «سارقىرامانىڭ ار جاعىندا, سىلدىرامانىڭ بەر جاعىندا, ماڭىرامانى ۇلىما جارىپ كەتتى, قىنامادان جانىمانى اكەلسىن», – دەۋىنەن, بىرىنشىدەن ادەپتىلىكتىڭ, ىزەتتىلىك پەن سىيلاستىقتىڭ بەلگىسىن كورسەك, ەكىنشىدەن, ويىنىڭ ۇشقىرلىعىن, تاپقىرلىعىن, سوزگە زەرەكتىگىن بايقايمىز.
قىز بالانى «بولاشاق انا», «قوناق», «جات جۇرتتىق» دەپ تۇسىنگەن حالىق وعان ەشقاشان زەكىپ داۋىس كوتەرمەگەن, ايالاپ كىرپىگىنەن قاقپاي وسىرگەن. قارىم-قاتىناس بارىسىندا ءوزى رەنجىتكەن ادامنان كەشىرىم سۇراي بىلۋگە, ءوزىن رەنجىتكەن ادامعا كەشىرىمدى بولۋعا وزىنە جاقسىلىق جاساعان ادامعا العىس ايتىپ, ريزاشىلىق سەزىمىن بىلدىرۋگە ۇيرەتكەن. مۇنى ادامنىڭ ىشكى مادەنيەتىنىڭ جوعارى كورسەتكىشى دەپ تۇسىندىرگەن.
قازاق مەملەكەتتىك قىزدار پەداگوگيكالىق ۋنيۆەرسيتەتى – ەلىمىزدەگى بىردەن-ءبىر تەك قىزدار وقيتىن جوعارى وقۋ ورنى. ورتا ازيا ايماعىندا مۇنداي وقۋ ورنى جوق. الەمدە دە ساۋساقپەن سانارلىقتاي. زاڭعار جازۋشى مۇحتار اۋەزوۆ: ء«تاڭىر جازسا, بۇل ينستيتۋت بولاشاق قازاق قىزدارىنىڭ شامشىراعىنا اينالادى. وسى شامشىراقتىڭ جارىق ساۋلەسى سونبەسىن دەيىك» دەگەن پايىمى 75 جىلعا جۋىق تاريحى بار ۋنيۆەرسيتەتتىڭ وزىندىك ەرەكشەلىگى مەن ماڭىزىن ايعاقتاپ تۇرعانداي. قازىرگى كۇندە مۇندا ستۋدەنتتەردىڭ ساپالى ءبىلىم الىپ, عىلىممەن, ونەرمەن, سپورتپەن اينالىسۋى ءۇشىن, ولاردىڭ بويىندا حالقىمىزدىڭ ۇلتتىق قۇندىلىقتارىن دارىتۋ ورايىندا بىرقاتار جۇمىستار جاسالىپ, ۋنيۆەرسيتەت وتاندىق جوعارى وقۋ ورىندارى اراسىندا ۇلكەن بەدەلگە يە بولىپ وتىرعانى كوڭىلگە قۋانىش ۇيالاتادى. قىزدار ۋنيۆەرسيتەتىنىڭ وزگە جوعارى وقۋ ورىندارىنان باستى ەرەكشەلىگى رەتىندە ءبىلىم بەرۋدە حالقىمىزدىڭ ۇلتتىق قۇندىلىقتارىن باسشىلىققا الا بىلۋىندە دەپ ايتار ەدىم. قازاقتىڭ «ۇلتىڭدى تاربيەلەيمىن دەسەڭ – قىزىڭدى تاربيەلە» دەگەن ءسوزىنىڭ استارىندا ۇلكەن ءمان-ماعىنا جاتىر. قىز – بولاشاق انا, قىز – وتباسىنىڭ ۇيىتقىسى, قىز – اسىل جار. بۇگىندە ۇرپاق تاربيەشىسى رەتىندە اسپەتتەلەر بولاشاق مۇعالىمدەردى اتا-اناسىنان العان تاربيەسىن وقۋ ورداسىنداعى تاربيەمەن شەبەر ساباقتاستىرا ءبىلۋ كەز كەلگەن ءبىلىم ورداسىنان كەزدەستىرە بىلمەيسىز. ۇجىم ءوز قىزمەتىندە عۇلاما عالىم ءال-ءفارابيدىڭ: «تاربيەسىز بەرىلگەن ءبىلىم – ادامزاتتىڭ قاس جاۋى» دەگەن دانا ءسوزىن باستى ۇستانىم رەتىندە پايدالانادى.
وقۋ ورنىندا گەندەرلىك ساياسات بويىنشا ىرگەلى جۇمىستار اتقارىلۋدا. قازىرگى كۇندە حالىقارالىق ارەنادا ايەلدەردىڭ ساياسي كوشباسشىلىعى ۋاقىت وتكەن سايىن ايقىندالىپ كەلەدى. قوعام مەن مەملەكەت تاراپىنان دا نازىك جاندىلاردىڭ بەلسەندىلىكتەرى مەن ساياسي ىقپالداستىقتارىنا دەگەن سەنىم جوعارى دەڭگەيدە كورىنىس تابۋدا. تاۋەلسىزدىك جىلدارىندا ەلىمىز قارقىندى دامىپ, حالىقتىڭ ءال-اۋقاتىن ارتتىرۋ باعىتىندا كوپتەگەن جۇمىستار جاسالۋدا. قازاقستاننىڭ الەم ەلدەرىنىڭ الدىنداعى وڭ ساياسي ءيميدجىن بۇدان دا نىقتاۋ ءۇشىن دەموكراتيالىق قاعيداتتارعا نەگىزدەلگەن گەندەرلىك ساياساتتىڭ ارناسىن كەڭەيتە ءتۇسۋىمىز قاجەت. وسى ورايدا ۋنيۆەرسيتەت جانىندا الەۋمەتتىك جانە گەندەرلىك عىلىمي-زەرتتەۋلەر ينستيتۋتى قىزمەت اتقارادى. وسى تاقىلەتتەس عىلىمي ورتالىق تمد ايماعىندا بىردەن-ءبىر ەكەنىن ەرەكشە اتاپ وتكەن ءلازىم. ينستيتۋتتىڭ ستراتەگيالىق ماقساتى – 2018-2021 جىلدارعا ارنالعان عىلىمي-زەرتتەۋ جۇمىستارىن 2015 جىلى بىرىككەن ۇلتتار ۇيىمى باس اسسامبلەياسىنىڭ 70 سەسسياسىندا قابىلداعان تۇراقتى دامۋ ماقساتىنىڭ «بارلىق ايەلدەر مەن قىز بالالاردىڭ گەندەرلىك تەڭدىگىن قامتاماسىز ەتۋ جانە قۇقىقتارى مەن مۇمكىنشىلىكتەر اۋقىمىن كەڭەيتۋ» تۋرالى 5-ءشى ماقساتى بويىنشا جۇزەگە اسىرۋ. ينستيتۋت گەندەرلىك تەڭدىك يدەياسىن دامىتۋدى بىلىكتى پەداگوگ كادرلارىن دايىنداۋ جانە عىلىمي-زەرتتەۋلەر ارقىلى ىسكە اسىرادى. ۋنيۆەرسيتەتتە «قازاق ارۋى» اتتى كۋرس وقۋ ۇدەرىسىنە ەنگىزىلگەن. ۇلت بولاشاعىن تاربيەلەۋگە سۇبەلى ۇلەس قوساتىن بولاشاق مۇعالىمدەردىڭ سان قىرلى بولۋىنا, ولاردىڭ قوعامداعى الەۋمەتتىك جانە وتباسىنداعى ەتنوالەۋمەتتىك رولدەردى مۇلتىكسىز اتقارۋىنا سەبەپكەر بولۋىنا «قازاق ارۋى» كۋرسىنىڭ تيگىزەر سەپتىگى زور دەپ ويلايمىز. بۇگىنگى كۇننىڭ تالابىنا ساي تۇلعانى قالىپتاستىرۋدىڭ ولشەمدەرى باسقاشا. قۇندىلىقتار دا وزگەرىپ بارادى. اقىل دا انادان داريدى, دانا دا ايەلدەن تۋادى. قىز بالا تاربيەسىن ۇرپاق تاربيەسى دەپ قاراعان ءلازىم. بۇگىنگى قازاق بويجەتكەندەرى ەرتەڭگى ەرىنە ادال جار, پەرزەنتتەرىنىڭ ساليقالى اناسى. ولاردىڭ بويىندا تاعىلىمدى تاربيە بولعانىن قالايتىنىمىز بەلگىلى. ۇلت بولاشاعىن تاربيەلەۋگە سۇبەلى ۇلەس قوساتىن بولاشاق مۇعالىمدەردىڭ سان قىرلى بولۋىنا, ولاردىڭ قوعامداعى الەۋمەتتىك جانە وتباسىنداعى ەتنوالەۋمەتتىك رولدەردى مۇلتىكسىز اتقارۋىنا سەبەپكەر بولۋىنا «قازاق ارۋى» كۋرسىنىڭ تيگىزەر سەپتىگى زور دەپ ويلايمىن. وردالى وقۋ ورنىنىڭ ستۋدەنتتەرى بولاشاق ۇستاز, وتباسىنىڭ ۇيىتقىسى. سوندىقتان رۋحاني قۇندىلىقتارىمىزدى ساقتاي وتىرىپ, ونەركاسىپتىك رەۆوليۋتسيا زاماننىڭ ەرەكشەلىگىن يگەرگەن ۇستاز تاربيەلەۋ – ۋنيۆەرسيتەتىمىزدىڭ باستى باعدارى. قازىرگى كۇندە وقۋ ورنىندا بولاشاق مامانداردى تاربيەلەۋ ماقساتىندا 38 ۇيىم قىزمەت اتقارادى. قاراكوز ستۋدەنتتەرىمىز ۋنيۆەرسيتەت قابىرعاسىندا ءبىلىم نارىمەن سۋسىنداپ قانا قويماي, رۋحاني قۇندىلىقتاردى ساقتاي وتىرىپ, قوعامدىق قاجەتتىلىكتەرىن قاناعاتتاندىرۋ جۇمىستارىنا بەلسەنە قاتىسىپ وتىرادى. قىزدار ۋنيۆەرسيتەتىنىڭ ستۋدەنتتەرى ادامگەرشىلىگى جوعارى تۇلعا رەتىندە ءارتۇرلى قوعامدىق اكتسيالار مەن قايىرىمدىلىق اكتسيالارىنا بەلسەندى قاتىسىپ وتىرادى. بولاشاق الەۋمەتتىك قىزمەتكەرلەر, پسيحولوگتار, دەفەكتولوگتار, مۋزىكالىق ءبىلىم بەرۋ مۇعالىمدەرى الماتى قالاسىنداعى انالار ۇيلەرىندە جۇيەلى تۇردە اقىسىز نەگىزدە قىزمەت كورسەتەدى. سونداي-اق, وقۋ ورنى ستۋدەنتتەرىنىڭ باستاماسىمەن قايىرىمدىلىق جارمەڭكەلەرى تۇراقتى تۇردە ۇيىمداستىرىلادى. ءىس-شارانىڭ باستى ماقساتى – ۋنيۆەرسيتەت ۇجىمى مەن ستۋدەنتتەرىنىڭ ساناسىنا مەيىرىمدىلىك, سۇيىسپەنشىلىك, قايىرىمدىلىق سياقتى ىزگى ۇعىمداردى قالىپتاستىرۋ. سونىمەن قاتار, الەۋمەتتىك جاعدايى تومەن جەتكىنشەكتەرگە كومەك كورسەتۋ, ولاردى رۋحاني تۇرعىدا قولداپ-قۋاتتاۋ. دانا حالقىمىزدا «قايىرىمدىلىق جاساساڭ, قايىرىمىن ءوزىڭ كورەسىڭ» دەگەن ۇلاعاتتى ءسوز بار. قايىرىمدىلىق – ۇلتىمىزدىڭ ەڭ ىزگى قاسيەتتەرىنىڭ ءبىرى. «جاناشىرلىققا جان ريزا» دەگەندەي قىزدار ۋنيۆەرسيتەتىنىڭ ستۋدەنتتەرىنىڭ كومەككە مۇقتاج جارىمجان ازاماتتارعا قامقورلىق كورسەتىپ, جۇرەك جىلۋىن ۇسىنۋى ءھام ساۋابى مول ىسكە اتسالىسۋى – كوپكە ۇلگى بولاتىن يگىلىكتى ءىس دەپ بىلەمىز. الەۋمەتتىك ادىلدىك, تەڭدىك, ءوزارا سىيلاستىق پەن قامقورلىق تۋرالى نيەتتى تەك قانا مەملەكەت ەمەس, ازاماتتىق ورتانىڭ ءوزىنىڭ كوتەرۋى – قوعامىمىزدىڭ كەمەلدەنگەنىن, جاڭعىرعانىن كورسەتەدى. «جاسىل ەل» مەملەكەتتىك باعدارلاماسىن قولداۋ ماقساتىندا ۋنيۆەرسيتەت عالىمدارى مەن ستۋدەنتتەرى جاسىل ەل مەملەكەتتىك باعدارلاماسىن قولداۋ ماقساتىندا ارشا, ەمەن, اكاتسيا اعاشتارى وسكىندەرىن ارنايى زەرتحانا جاعدايىندا ەڭ ءتيىمدى ادىستەرمەن ءوسىرىپ, مەدەۋ شاتقالىنا وتىرعىزۋدا. ىلە الاتاۋى تابيعي جۇيەسىن قايتا قالپىنا كەلتىرۋ ماقساتىندا 350 ءتۇپ ارشا, 250 ءتۇپ اكاتسيا مەن 150 ءتۇپ ەمەن وتىرعىزىلدى. سونداي-اق, «100 مەكتەپ» باعدارلاماسى اياسىندا سالىنعان مەكتەپتەر اۋماعىنا 200-گە جۋىق ءتۇپ ارشا, ەمەن وتىرعىزىلدى. بۇنىڭ بارلىعى ادامگەرشىلىك قاعيداتتارىنان تۋىنداعان يگىلىكتى ىستەر ەكەنى راس.
جاڭا مىڭجىلدىقتا ءبىلىمى مەن بىلىگى ۇيلەسكەن مامانداردىڭ ءباسى باسىم بولماق. بۇنى ۋاقىتتىڭ ءوزى ايقىنداپ وتىر. وتاندىق جوعارى وقۋ ورىندارىنىڭ الدىندا وي-ءورىسى دامىعان, تالانتتى, زەردەلى جانە ۇلتجاندى ۇرپاق تاربيەلەۋ مىندەتى تۇر. وسىناۋ اۋقىمدى جاۋاپكەرشىلىكتى ابىرويمەن اتقارۋ پەداگوگتارعا جۇكتەلگەن مارتەبەلى مىندەت. دامۋدىڭ داڭعىل جولىنا باعىت العان بولاشاعى باياندى ەلدىڭ ءورىسى قاشاندا بىلىكتى دە سانالى ۇرپاعىمەن كەڭەيمەك. وسكەلەڭ جاستى ەلىمىزدىڭ تۇتقاسى, قاتارىنىڭ كوشباسشىسى ەتىپ تاربيەلەۋ – عاسىرعا جۋىق ۇزدىكسىز كادر دايارلاپ كەلە جاتقان قىزدار ۋنيۆەرسيتەتىنىڭ باستى باعدارى.
گاۋحار الدامبەرگەنوۆا,
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور
