وسى جىلدار بەدەرىندە قۇرامىندا 15-كە جۋىق اقجاۋلىقتى اجە بار ۇجىم حالىقتىق, ءداستۇرلى ءان ونەرىنىڭ دامۋىنا ولشەۋسىز ۇلەس قوسىپ, ادەت-عۇرىپتارىمىز بەن سالت-داستۇرلەرىمىزدىڭ كەڭ قانات جايۋىنا دا ۇيىتقى بولىپ كەلەدى. رەپەرتۋاردا ءبىرجان سال, اقان سەرى, ۇكىلى ىبىرايدان باستاپ قازىرگى قازاق كومپوزيتورلارىنىڭ قۇلاق قۇرىشىن قاندىراتىن, تىڭداۋشىلارعا ەرەكشە ءلاززات سىيلايتىن 60-تان استام اۋەزدى اندەرى توپتاسقان. ارالارىندا كوپ شىرقالا بەرمەيتىن تۋىندىلار از ەمەس.
– م.جۇماباەۆ اتىنداعى كوللەدجدە وتىز جىلعا جۋىق ۇستازدىق قىزمەت ەتتىم. زەينەتكە شىققاننان كەيىن ونەرگە بەيىمدى زامانداستارىمنىڭ باسىن قوسىپ, اتا-بابالارىمىزدىڭ ءتالىم-تاربيەلەرىن نەگە ۇلىقتاماسقا دەگەن وي كەلدى. سودان بەرى جۇرتشىلىق نازارىنا تاعىلىمدى كەشتەر ۇسىنۋدى باستى مۇرات ەتىپ كەلەمىز. «رۋحاني جاڭعىرۋ» باعدارلاماسى اياسىندا شىعارماشىلىق جوبا ازىرلەپ, رەسەيدىڭ قازاقتار قونىس ەتكەن ايماقتارىندا بولىپ قايتتىق. بىردە-ءبىر شاقىرۋدان قالعان ەمەسپىز. جامال تەكەباەۆا, ساپۋرا زايكينا, ءاسيا قارابالينا, ءشاربانۋ جاقسىلىقوۆا, ءاليا مالدىباەۆا, باقىتجان بالتاباەۆا, تاعى باسقالارى ۇجىمنىڭ بەلسەندى مۇشەلەرى سانالادى, – دەيدى ءانسامبلدىڭ ۇيىمداستىرۋشىسى ءارى كوركەمدىك جەتەكشىسى ماشۋدا ىبىراەۆا وتكەننەن سىر شەرتىپ.
ومىرلەرىن انمەن ورنەكتەپ جۇرگەن جەزتاڭداي ءانشى اجەلەردىڭ ونەردەگى جولى جۋىردا ايرىقشا اسپەتتەلىپ, ايماق باسشىسىنىڭ العىس حاتىمەن ماراپاتتالدى. ارداگەرلەر كەڭەسى سىي-قۇرمەت كورسەتتى. «ەلگە سالەم», «كوزىڭنىڭ ءمولدىرىن-اي», «نەنى ويلادىڭ؟», «اياۋلىم, ارمانىمداي اسىلىم ەڭ», تاعى باسقا تاماشا اندەر ءوز ناقىشىمەن شىرقالىپ, ادەمى كەشكە ۇلاستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن تالعات تانىباەۆ
