ۇلىتاۋ اۋدانى اكىمىنىڭ ورىنباسارى باعدات بايجانتاەۆتىڭ ايتۋىنشا, بىلتىرعى جىلى وتكەن « ۇلىتاۋ قىمىزى» ەتنوفەستيۆالى مەن بيىلعى «كوكمايسا» وسى اۋداننىڭ تۋريستىك الەۋەتىن ارتتىرۋ ماقساتىندا وتكىزىلىپ وتىر. سونىمەن قاتار بۇل شارالار اۋدان كولەمىندە بەس جىلدان بەرى وتكىزىلىپ كەلە جاتقان, قازاقتىڭ «بيە بايلاۋ», «ايعىر قوسۋ», «قىمىزمۇرىندىق» سياقتى ۇلتتىق داستۇرلەرىن دارىپتەيتىن «تەرىساققان كوكتەمى» ەتنوفەستيۆالىنىڭ ءبىر بولىگى دەۋگە بولادى. اتالعان داستۇرلەر ماتەريالدىق ەمەس مادەني مۇرا ەلەمەنتتەرىنىڭ ۇلتتىق تىزىمىنە ەنگەن.
«كوكمايسادا» اقشاڭقان كيىز ۇيلەر بوي كوتەرىپ, اجەپتاۋىر جارمەڭكە ۇيىمداستىرىلدى. جەرگىلىكتى حالىق ءوز قولىمەن جاساعان قىمىزى مەن قايماعىن, قۇرتى مەن مايىن, ەتى مەن ءسۇتىن ساۋدالاپ, ءبىر جاساپ قالدى.
اسىرەسە سىرتتان كەلگەن قوناقتارعا ءبارى تاڭسىق – كوپشىلىك اتقا ءمىنىپ, قايىقپەن سەرۋەندەپ, التىباقان تەۋىپ, تاماشا ساۋىققا كەنەلدى. ۇلىتاۋدىڭ قاسيەتتى تاۋلارىن جاياۋ-جالپى ارالاعان جۇرتتىڭ دا قاراسى كوپ. جوشى حان مەن الاشا حان كەسەنەلەرىنە ءبىر كۇندىك ساپار ۇيىمداستىرىلىپ, بىرنەشە توپ تەرەكتى اۋليەنىڭ باسىنا, التىنشوقىعا ءتاۋ ەتە باردى.
شارانىڭ ءبىر ماقساتى – اتاكاسىپتى جارنامالاپ, جەرگىلىكتى كاسىپكەرلەر مەن قولونەر شەبەرلەرىنە قولداۋ كورسەتۋ. فەستيۆال اياسىندا اسپازدىق ونەر بايقاۋلارى, اعاش وڭدەۋدەن, قامشى ءورۋ مەن ارقان ەسۋدەن شەبەرلىك ساباقتارى, سازگەرلىك پەن ۇلتتىق اندەردىڭ, بي ونەرىنىڭ بايقاۋلارى ۇيىمداستىرىلدى. البەتتە, ۇلتتىق ويىندار مەن سپورتتىق سايىستار دا از بولعان جوق.
قىزىق-دۋمانعا تولى «كوكمايسا» ەتنوفەستيۆالىن ۇيىمداستىرۋشىلار ونى بۇدان بىلاي جىل سايىن وتكىزىپ وتىرماقشى. ءداستۇرلى «تەرىساققان كوكتەمى» وڭىرگە كەلگەن شەتەلدىك قوناقتاردىڭ قاي-قايسىسىنىڭ دا كوڭىلىنەن شىققان, حالىقارالىق يۋنەسكو مەن يسەسكو ء(بىلىم, عىلىم جانە مادەنيەت ماسەلەلەرى جونىندەگى يسلام ۇيىمى) ۇيىمدارىن دا قىزىقتىرىپ وتىر. ەتنوفەستيۆال بارىسىندا وتەتىن ۇلتتىق سالت-ءداستۇر كورىنىستەرى مەن قازاقتىڭ اس ءمازىرى, باي داستارقانى ەشكىمدى تاڭداندىرماي, تامساندىرماي قويمايدى. بارعان سايىن مولىعا تۇسكەن ەتنوفەستيۆال – قازاق جەرىنە تۋريستەر تارتۋدىڭ اسا ءبىر ءتيىمدى دە ۇتىمدى جولى. سوندىقتان ۇيىمداستىرۋشىلارعا ايتار العىسىمىز مول.
قايرات ءابىلدا,
«ەگەمەن قازاقستان»
قاراعاندى وبلىسى,
ۇلىتاۋ اۋدانى
