ء«ال-ءاحلي» – ەڭ كوپ جۇلدە العان كوماندا
فۋتبول تۋرالى جازاتىن Goal باسىلىمى الەمدە ەڭ كوپ جۇلدە جەڭىپ العان كوماندالاردىڭ رەيتينگىن شىعاردى. ءبىر قىزىعى, العاشقى توپ-5 كوماندانىڭ ىشىندە «رەال», «بارسەلونا», «باۆاريا» سەكىلدى گراند كوماندالار جوق.
باسىلىمنىڭ رەيتينگى بويىنشا, ءتىزىمدى 117 جۇلدەسى بار مىسىردىڭ ء«ال-ءاحلي» كلۋبى باستاعان (مىسىردا – 93, الەم بويىنشا 24 جۇلدە العان). ەكىنشى ورىنداعى شوتلانديانىڭ «رەيندجەرس» كومانداسىندا 115 جۇلدە بار (شوتلانديادا – 114, الەم بويىنشا – 1). ۇزدىك ۇشتىكتى ۋرۋگۆايدىڭ «ناسونال» كلۋبى 111 جۇلدەمەن تۇيىندەدى (ۋرۋگۆايدا – 102, الەم بويىنشا – 9).
ال يسپانيانىڭ ەكى ۇزدىك كومانداسى «بارسەلونا» مەن «رەال» كلۋبتارى التىنشى جانە جەتىنشى ورىنعا تۇراقتاعان. كاتالونيالىقتار ەنشىسىندە 89 (72+17), مادريد كلۋبىنىڭ قورجىنىندا 88 (64+24) كۋبوك بار.
ءبىر جىلدا 32 جەكپە-جەك ۇيىمداستىرادى
Matchroom Boxing پروموۋتەرلىك كومپانياسى ساندىق مەديا سالاسىنىڭ الىبى Perform Group كومپانياسىمەن ءبىر ميلليارد دوللار كولەمىندەگى كەلىسىمشارتقا وتىردى.
كەلىسىمشارت بويىنشا Matchroom Boxing پروموۋتەرلىك كومپانياسى ءبىر جىلدىڭ ىشىندە 32 بوكس كەشىن ۇيىمداستىرۋى كەرەك. سونىمەن قاتار بۇل جەكپە-جەكتەر Perform Group سەرىكتەسىنىڭ ۇسىنىسى بويىنشا DAZN قىزمەتى ارقىلى تىكەلەي ەفيردە كورسەتىلەتىن بولادى. Matchroom Boxing پەن Perform Group اراسىنداعى سەرىكتەستىك 8 جىلعا جوسپارلانعان.
سونداي-اق 32 بوكس كەشىنىڭ 16 جەكپە-جەگى اقش-تا, ءدال سونداي بوكس كەشى بريتانيادا ءوتۋى كەرەك. ءبىر ايتا كەتەرلىگى, Matchroom Boxing كومپانياسى ۇيىمداستىرعان بوكس كەشىن جانكۇيەرلەرى pay-per-view جۇيەسى (اقىلى كورسەتىلىم) ارقىلى كورمەيدى. ونىڭ ورنىنا اي سايىنعى جازىلىمعا تاپسىرىس بەرە الادى.
ايتا كەتەيىك, وتانداسىمىز دانيار ەلەۋسىنوۆ (1-0, 1 كو) ءدال وسى Matchroom Boxing پروموۋتەرلىك كومپانياسىنىڭ وكىلى سانالادى.
اردا تۇران 16 ويىنعا شەتتەتىلدى
«ىستانبۇل» كومانداسىنىڭ جارتىلاي قورعاۋشىسى اردا تۇران ورەسكەل ءتارتىپ بۇزعانى ءۇشىن ونى تۇركيا فۋتبول فەدەراتسياسىنىڭ تارتىپتىك كوميتەتى 16 ويىنعا شەتتەتتى.
تۇركيا ليگاسىنىڭ 32-تۋر ويىنىندا «ىستانبۇل» مەن «سيۆاسسپور» كوماندالارى كەزدەسىپ, ماتچتىڭ 94-مينۋتىندا «سيۆاسسپور» كومانداسىنىڭ ويىنشىسى ءتارتىپ بۇزعان. الايدا تورەشى ويىن ەرەجەسى بۇزىلعان جوق دەپ ەسەپتەگەن. ال تۇران ءتارتىپ بۇزىلدى دەپ, قاپتالداعى تورەشىگە داۋىس كوتەرىپ, قولىمەن يتەرىپ جىبەرگەن.
سول ساتتە تورەشى تۇرانعا قىزىل قاعاز كورسەتىپ, ويىننان شەتتەتكەن. وسىلايشا, تارتىپتىك كوميتەتتىڭ شەشىمىمەن 16 ويىنعا شەتتەتىلگەن ول تۇركيا ليگاسىنىڭ وسى جىلداعى ەكى ويىنىنا, كەلەسى جىلعى 14 ماتچىنا قاتىسپايدى.
دايىنداعان ءالي بيتورە,
«ەگەمەن قازاقستان»
