امانتاي داۋلەتبەكوۆ 1917 جىلى قاراعاندى وبلىسىنىڭ جاڭاارقا اۋدانىندا تۋعان. 1943 جىلى پونىري قالاشىعى ماڭىندا بولعان قيان-كەسكى ۇرىستا ىشىندە جاڭاارقالىق جاۋىنگەر دە بار شاعىن اسكەر جاۋ قورشاۋىندا قالادى. بار كۇشىمەن لاپ قويعان جاۋعا اقتىق دەمىنە دەيىن قارسى تۇرىپ, تاباندىلىق تانىتقان ەرلەر وڭمەڭدەگەن باسقىنشىلاردىڭ بەتىن قايتاردى. ەرلىكپەن قازا تاپقان امانتاي داۋلەتبەكوۆكە كەڭەس وداعىنىڭ باتىرى اتاعى بەرىلەدى.
«دالا ساحناسىنداعى» كورىنىستى سوعىس ۋاقىتىنداعىداي اسەرلى ەتۋ ءۇشىن «استانا» وڭىرلىك قولباسشىلىعى شاراعا قاتىسۋشىلاردى پوليگونمەن قاتار, اسكەري تەحنيكامەن, ارتيللەريالىق قارۋلارمەن, دالا اسحاناسىمەن, مەديتسينالىق پالاتكالارمەن قامتاماسىز ەتتى. ال جاۋ اسكەرلەرىنىڭ ءرولىن ويناۋ ءۇشىن «ورتالىق» وڭىرلىك قولباسشىلىعىنىڭ اسكەريلەرى ارنايى كەلدى.
شاراعا دايىندىق جۇمىستارى جوعارى دەڭگەيدە جۇرگەنى بايقالادى. ەكى جاقتىڭ اسكەرلەرىنە, سانيتارلارعا تىگىلگەن ارنايى كيىم ۇلگىلەرىن ايتپاعاندا, ءار تاراپتىڭ وزىنە ساي قارۋ-جاراقتاردىڭ ماكەتىنە دەيىن كورەر كوزگە شىنداي ەتىپ جاسالعان.
اسكەري-تاريحي كۆەستكە ەكى جۇزدەن استام ادام قاتىستى. ولاردىڭ دەنى نەگىزىنەن كوللەدج ستۋدەنتتەرى, سپورتشىلار جانە باسقا دا ەرىكتى قاتىسۋشىلار. ولاردى تاسىمالداۋ ءۇشىن ارنايى اۆتوبۋستار دا بولىنگەن. شارانى قاراعاندى قالاسىنىڭ اكىمدىگى مەن ءماسليحاتىنىڭ, «نۇر وتان» پارتياسى قالالىق فيليالىنىڭ قولداۋىمەن, قالالىق مادەنيەت جانە تىلدەردى دامىتۋ ءبولىمى جانە جاڭا مايقۇدىق مادەنيەت ءۇيى ۇيىمداستىردى.
دالاداعى كورىنىس ونى كورگەن جانداردى, اسىرەسە قۇرمەتتى قوناق رەتىندە شاقىرىلعان سوعىس ارداگەرلەرىن ايتارلىقتاي اسەرگە بولەدى. ارەكەتتەردىڭ شىنايىلىعىنان بولار, ۇلكەندەر جاعى كوزىنە جاس الدى. ۇلى وتان سوعىسىنىڭ ارداگەرى گريگوري ستەپەنكو ايتقانداي, جاس ۇرپاق بابالارىنىڭ ەرلىك ىستەرىن ەستەن شىعارماۋى ءۇشىن وسىنداي شارالاردى جيىرەك ۇيىمداستىرىپ وتىرعان ابزال.
وسى شاراعا امانتاي داۋلەتبەكوۆتىڭ شوبەرەسى راحمان ابىشەۆ ارنايى شاقىرىلعان بولاتىن. «ادامزات ءۇشىن قاسىرەتتى شاقتار قايتالانباۋى ءتيىس, – دەيدى باتىردىڭ ۇرپاعى. – ەلباسى ن. نازارباەۆتىڭ ۇستانىپ وتىرعان بەيبىت ساياساتىنىڭ ارقاسىندا قازىر اسپانىمىز اشىق, كۇنىمىز شۋاقتى. جۇزدەن استام ۇلتتار ءبىر شاڭىراقتىڭ استىندا تاتۋ-ءتاتتى تىرلىك كەشىپ جاتىرمىز, وسى مامىراجاي ءومىرىمىز ماڭگىلىك دەپ سەنەمىن».
قايرات ءابىلدا,
«ەگەمەن قازاقستان»
قاراعاندى
