بۇگىندە كاسىپكەرلىكپەن اينالىسىپ, مول قارجى تاپقان ازاماتتار پايداسىنىڭ ءبىر بولىگىن تۋعان جەرىن دامىتۋعا جۇمساپ جاتىر. جيىنعا سونداي مەتسەنات ازاماتتارمەن قاتار ءوسىپ كەلە جاتقان جاس جەتكەنشەكتەر دە قاتىستى.
اۋدان اكىمدىگى تۋعان جەردى تۇلەتۋگە ۇلەس قوسىپ جۇرگەن كاسىپكەرلەردى جاستارمەن تانىستىرىپ, ولاردان ۇلگى الۋعا شاقىردى.
- بۇگىندە شيەلى اۋدانىنىڭ دامۋىنا ۇلەس قوسىپ كەلە جاتقان بىرقاتار ازامات بار. ماسەلەن, اۋدانىمىزدىڭ تۋماسى ەربول جەڭسىكباەۆ كوپ قاباتتى ۇيلەردىڭ سىرتىن ارلەپ بەرسە, داۋلەت جۇمابەكوۆ 70 ملن. تەڭگەگە, ەربولات ماشراپين العاباس اۋىلىنان 100 ملن. تەڭگەگە سپورت كەشەنىن سالىپ بەردى. سونىڭ ارقاسىندا بالالار بوس ۋاقىتتارىن سپورت كەشەنىندە وتكىزىپ, اۋىل سپورتىنىڭ دامۋىنا ۇلەس قوسۋدا. العاشقى ناتيجەلەر دە بار. ولاردىڭ الدى وبلىستىق, رەسپۋبليكالىق جارىستاردا ايماعىمىزدىڭ اتىن شىعارىپ ءجۇر. سونىمەن قاتار, مەتسەناتتاردىڭ كومەگىمەن اۋدان ورتالىعىندا 30 ملن. تەڭگەگە اللەيا سالىندى. اۋداندا «مەكتەبىمە تاعزىم» اكتسياسى اياسىندا دا كوپتەگەن شارا اتقارىلىپ جاتىر. ءار جىلعى تۇلەكتەر ارنايى وقۋ كابينەتتەرىن اشىپ, مەكتەپتەگى كىتاپ قورىنىڭ تولىعۋىنا ۇلەس قوسۋدا, - دەدى اۋدان اكىمىنىڭ ورىنباسارى الماسبەك ابىلقاسىم ۇلى.
ەلباسى «بولاشاققا باعدار: رۋحاني جاڭعىرۋ» ماقالاسىندا كاسىپكەرلەردىڭ ءوز تۋعان جەرىنە ۇلەس قوسۋىن ەرەكشە اتاپ ەدى. تۋعان جەرگە تۇعىرىن تىككەن بۇل ازاماتتار جاستارعا ءاردايىم ۇلگى بولادى.
باقتيار تايجان,
«ەگەمەن قازاقستان»
