80 جىلدىق تاريحى بار كاسىپورىن قىزمەتىنىڭ نەگىزگى باعىتى – قاۋىپتى وندىرىستىك وبەكتىلەردە قۇتقارۋ جۇمىستارىن ورىنداۋ. كاسىپورىن اپاتتىق دەڭگەيى جوعارى بارلىق قاۋىپتى وندىرىستىك نىساندارعا قىزمەت كورسەتەدى. ونىڭ 13 فيليالى ەلدىڭ 12 وڭىرىندە ورنالاسقان. اپاتتىق-قۇتقارۋ جۇمىستارىن ورىنداۋعا جۇمىلدىرۋ جاريالانعان كەزدە كاسىپورىن 2000-نان استام كاسىبي قۇتقارۋشىلارىن جىبەرە الادى. كاسىپورىننىڭ ماتەريالدىق-تەحنيكالىق بازاسى 4 اۋا قىسىمىن ءتۇسىرۋ توبىنان, 5 كاناتتىق-سىناق ستانساسىنان, 19 اتتەستاتتالعان زەرتحانادان, 5 مامانداندىرىلعان وقۋ ورتالىقتارىنان, وندىرىستىك-جوندەۋ جانە جوندەۋ-مەحانيكالىق شەبەرحانالارىنان, ءورت سوندىرگىشتەرگە قىزمەت كورسەتۋ جونىندەگى ستانسادان تۇرادى. اۆاريالاردى جويۋعا ۋاقتىلى شىعۋدى 625 شۇعىل ءورت ءسوندىرۋ جانە ارنايى تەحنيكا بىرلىكتەرى قامتاماسىز ەتەدى, ولاردىڭ 70 پايىزدان استامى جوعارى ساپالى. بولىمشەلەر 30000-نان استام ارنايى جابدىقتارمەن جاراقتاندىرىلعان. سونىمەن بىرگە كادرلىق قۇرامى, كاسىپورىندى جاراقتاندىرۋ كۇشتەرىن شۇعىل جەتكىزۋ جانە كۇردەلىلىگى تەرەڭ تەحنوگەندىك اۆاريالاردى جويۋ قۇرالدارىمەن قامتاماسىز ەتۋ مۇمكىندىگى جوعارى.
كاسىپورىن جوعارى رەنتابەلدى بولىپ تابىلادى, ءوز كىرىسى ەسەبىنەن قارجىلاندىرىلادى. 2014-2017 جىلدارى كاسىپورىننىڭ رەسپۋبليكالىق بيۋدجەتكە سالىق جانە باسقا دا مىندەتتى تولەمدەر رەتىندەگى اۋدارىلىمى 17 ملرد تەڭگەنى قۇرادى. بۇگىنگى تاڭدا قاۋىپتى وندىرىستىك نىساندارعا 64 جەكە اۆاريالىق-قۇتقارۋ قىزمەت كورسەتۋدە. سونىمەن بىرگە ولاردىڭ ماتەريالدىق-تەحنيكالىق بازاسى اۆاريالىعى جوعارى دارەجەدەگى نىسانداردى تاۋلىك سايىن جانە ۇزدىكسىز قىزمەت كورسەتۋ رەجىمىندە ۇستاۋ ءۇشىن جاقسارتۋدى قاجەت ەتەدى.
ءبىز ۇكىمەت باسشىسى ب.ساعىنتاەۆتىڭ اتىنا دەپۋتاتتىق ساۋال جولداپ, وسى دەرەكتەردى كورسەتە وتىرىپ, مىنا ماسەلەلەرگە نازار اۋدارۋدى سۇرادىق:
بىرىنشىدەن, كەن جانە مۇناي سالاسىنداعى اۆاريالارعا تالداۋ جاساۋ ولاردىڭ سانىنىڭ جىلدان-جىلعا كوبەيىپ بارا جاتقانىن كورسەتتى. بيىلعى جىلدىڭ ناۋرىز ايىندا رەسەي فەدەراتسياسىنىڭ كەمەروۆو قالاسىنداعى كوپتەگەن ادام قۇربان بولعان اپات حالىقتىڭ قاۋىپسىزدىگى جونىندەگى ماسەلە مەملەكەتتىك ورگاندار تاراپىنان تىڭعىلىقتى جانە جان-جاقتى زەرتتەۋدى, باقىلاۋدى جانە قاداعالاۋدى تالاپ ەتەتىنىن كورسەتتى;
ەكىنشىدەن, قاۋىپتى وندىرىستىك وبەكتىلەرگە قىزمەت كورسەتۋگە مەملەكەتتىك كاسىپورىننىڭ ءجۇز پايىزدىق قاتىسۋى ونەركاسىپتىك قاۋىپسىزدىك سالاسىنداعى زاڭناما تالاپتارىن قاتاڭ ساقتاي وتىرىپ جۇزەگە اسىرىلاتىنىنا كەپىل بولا الادى;
ۇشىنشىدەن, بۇل كاسىپورىن جەكەشەلەندىرگەن جاعدايدا قاۋىپتى وندىرىستىك وبەكتىلەردە اپاتتىق-قۇتقارۋ جۇمىستارىن ۇيىمداستىرۋدىڭ جيناقتالعان جۇيەسىنىڭ تۇيىقتالعان تسيكلى بۇزىلادى, مەملەكەتتىڭ ءىرى ونەركاسىپتىك اۆاريالاردى جويۋعا ءارتۇرلى جەكە اۆاريالىق-قۇتقارۋ قىزمەتتەردى تارتۋعا مۇمكىندىگى بولمايدى.
تورتىنشىدەن, نەعۇرلىم تومەن باعامەن كورسەتىلەتىن قىزمەتتەردى ساتىپ الۋعا مۇددەلى «قاۋىپتىلىگى جوعارىلار» ساناتىنا جاتاتىن وبەكتىلەردىڭ تاپسىرىس بەرۋشىلەرى جەتكىلىكتى ماتەريالدىق-تەحنيكالىق بازاسى جانە بىلىكتى ماماندارى جوق جەكە اۆاريالىق-قۇتقارۋ قىزمەتتەرىمەن شارت جاسايتىن بولادى. ال بۇل قاۋىپ دەڭگەيىن ارتتىرا تۇسەتىنى بەلگىلى.
ءبىز وسىنىڭ ءبارىن كورسەتە وتىرىپ, ۇكىمەت باسشىسىنان قاۋىپتى وندىرىستىك وبەكتىلەردەگى اپاتتاردىڭ الدىن الۋ جانە ونى جويۋ جونىندەگى بىرىڭعاي مەملەكەتتىك قىزمەت اتىنان وكىلدىك ەتەتىن وسى كاسىپورىندى جەكەشەلەندىرۋگە جاتاتىن مەكەمەلەر تىزبەسىنەن الىپ تاستاۋدى قاراستىرۋدى سۇرادىق.
ەدىل مامىتبەكوۆ,
سەنات دەپۋتاتى
