ءىس-شارانى «نۇر وتان» پارتياسىنىڭ قولداۋى ارقىلى ەلورداداعى «وزبەك ۇلتتىق مادەني ورتالىعى» مەن «جۇلدىزدار سونبەيدى» قوعامدىق قورى بىرلەسىپ ۇيىمداستىردى. وعان سۇراپىل سوعىستا جەرىن جاۋدان, ەلىن ەزگىدەن قورعاعان جاۋىنگەرلەر, جەڭىسكە جەتۋ جولىندا ۇلكەن ۇلەس قوسقان تىل ەڭبەككەرلەرى, «نۇر وتان» پارتياسىنىڭ سارىارقا اۋداندىق فيليالى توراعاسىنىڭ ءبىرىنشى ورىنباسارى باعلان الىمعازينا, تيىسىنشە اتالعان ورتالىقتىڭ توراعاسى شەرزود پۋلاتوۆ, قوعامدىق قوردىڭ باسشىسى ساۋلە داۋلەتبەكوۆا, وقۋ ورنىنىڭ ستۋدەنتتەرى مەن ۇستازدارى, ت.ب. قاتىستى.
باسقوسۋدا ءسوز العان باعلان الىمعازينا جينالعان قاۋىمدى 9 مامىر – جەڭىس كۇنىمەن قۇتتىقتاپ, ارداگەرلەرىمىزدىڭ ەرلىگىنە العىس ءبىلدىردى. بۇگىنگى بەيبىت ءومىردىڭ ورناعانى قارت ارداگەرلەردىڭ ارقاسى ەكەنىن ەرەكشە اتاپ ءوتتى. ول ءسوز اراسىندا «نۇر وتان» پارتياسىنىڭ مايدانگەرلەر مەن تىل ەڭبەككەلەرىنە ارنالعان ارنايى جوبالارى بارىن, ءساتتى تۇردە جۇزەگە اسىپ جاتقانىن جەتكىزدى.
ال شەرزود پۋلاتوۆ مۇنداي كەزدەسۋ جىل سايىن ءتۇرلى ورىنداردا وتەتىنىن جەتكىزدى.
– قازاقستاننىڭ بولاشاعى ەلىن-جەرىن ويلايتىن, ءبىلىمدى جاستاردىڭ قولىندا. مۇنداي تاعىلىمدى جيىندى ستۋدەنتتەردىڭ الدىندا وتكىزۋىمىزدىڭ ءبىر سەبەبى – سوعىستا قازا بولعان جاۋىنگەرلەر مەن ساربازداردىڭ رۋحىنا تاعزىم ەتۋ, وسكەلەڭ ۇرپاقتى ولاردىڭ ەسىمدەرىن قادىرلەۋگە شاقىرىپ, پاتريوتتىق سەزىمىن ارتتىرۋ, – دەدى استاناداعى «وزبەك ۇلتتىق مادەني ورتالىعىنىڭ» باسشىسى.
كەزدەسۋ بارىسىندا «جۇلدىزدار سونبەيدى» قوعامدىق قورىنىڭ ارنايى ازىرلەگەن دەرەكتى ءفيلمى جۇرتشىلىق نازارىنا ۇسىنىلدى. فيلمدە سوعىس جىلدارىنداعى جاۋىنگەرلەردىڭ قاھارمانداعى, تىل ەڭبەككەرلەرىنىڭ كومەگى, قارا حالىقتىڭ كورگەن قيىندىقتارى, جەڭىس جولى كورسەتىلدى.
– ەلىمىزدىڭ ءبىراز ءوڭىرىن ارالاپ, تاريحي مالىمەتتەر ىزدەيمىن, ءتىپتى 70 جىلدان اسسا دا جاڭا باتىرلاردى كەزدەستىرىپ جاتاتىن كەزدەرىم بولادى. وسىنداي ىزدەنىستىڭ ارقاسىندا ءتۇرلى دەرەكتى فيلمدەرىم ازىرلەندى, ماقالالارىم جاريالاندى, – دەيدى ساۋلە داۋلەتبەكوۆا.
القالى وتىرىستا اقىن مۇحاببات اماتاەۆا «سوعىس جۇرەكتەردەن كەتپەيدى قاسىرەتىڭ, جۇرەكتەردى جىلاتادى مۇڭ مەن زارىڭ» دەپ باستالعان ولەڭ شۋماقتارىن وقىپ, جاستاردى تەبىرەنتتى. ال كاسىپكەر حاسان قالمات ۇلى باتىر اتا-اپالارىمىزعا ارنايى سىيلىقتارىن تارتۋ ەتتى.
جيىن سوڭىندا قان مايداننىڭ قاق ورتاسىندا وت كەشىپ, ەلىن, جەرىن جاۋ وعىنان ازات ەتكەن, بىرنەشە جەرىنەن جارالانىپ, ءال ۇستىندە جاتسا دا كەلەر ۇرپاقتىڭ قامىن ويلاعان باتىر تۇلعا, 92 جاسقا كەلگەن جاپاش اتا كاشەكوۆ اق باتاسىن بەرىپ, ەگەمەن ەلىمىزگە ماڭگىلىك بەيبىت ءومىر تىلەدى.
ايان ءابدۋالي,
«ەگەمەن قازاقستان»
