قازاقستان پرەزيدەنتى الماتى وبلىسىنىڭ ءۇشارال قالاسىنا كەلگەننەن كەيىن جاڭا اۋەجايدىڭ قىزمەتىمەن جانە وبلىستىڭ شاعىن اۆياتسيا سالاسىن دامىتۋ پەرسپەكتيۆالارىمەن تانىستى.
الاكول اۋدانىنىڭ اقشي كەنتى ستانساسىنداعى تەمىر جول ۆوكزالىنىڭ جاڭا عيماراتىن ارالاپ كورگەن سوڭ, مەملەكەت باسشىسىنىڭ توراعالىعىمەن ەلىمىزدىڭ تۋريزم سالاسىن جانە كولىك-لوگيستيكا ينفراقۇرىلىمىن دامىتۋ ماسەلەلەرى جونىندە كەڭەس ءوتتى.
جيىن بارىسىندا ءوڭىر باسشىسى اماندىق باتالوۆ نۇرسۇلتان نازارباەۆقا الماتى وبلىسىنداعى ءتۋريزمنىڭ دامۋ بارىسى جونىندە باياندادى.
– سوڭعى ءتورت جىلدا وبلىستا تۋريستىك قىزمەت كورسەتۋ كولەمى ەكى ەسە ارتتى. بۇل كورسەتكىش 2014 جىلى 3,9 ميلليارد تەڭگەنى قۇراسا, 2017 جىلى 8,3 ميلليارد تەڭگەگە ءوستى. 2018 جىلى مۇنى 10 ميلليارد تەڭگەگە دەيىن جەتكىزۋدى جوسپارلاپ وتىرمىز. الاكول اۋدانىندا كورسەتىلگەن قىزمەت كولەمى 2017 جىلى 3,5 ميلليارد تەڭگەگە جەتىپ, 2014 جىلعى دەڭگەيمەن سالىستىرعاندا 8 ەسە ارتتى, – دەدى الماتى وبلىسىنىڭ اكىمى.
ينۆەستيتسيالار جانە دامۋ ءمينيسترى جەڭىس قاسىمبەك «نۇرلى جول» ينفراقۇرىلىمدى دامىتۋدىڭ مەملەكەتتىك باعدارلاماسىنىڭ جەرگىلىكتى جانە رەسپۋبليكالىق ماڭىزى بار اۆتوموبيل جولدارىن سالۋعا قاتىستى بولىگىنىڭ ىسكە اسىرىلۋ بارىسى جونىندە باياندادى.
– 2017 جىلى رەسپۋبليكالىق ماڭىزى بار 4 مىڭ شاقىرىمنان استام اۆتوموبيل جولىنا جوندەۋ جۇمىستارى جۇرگىزىلدى. سونىڭ ىشىندە 603 شاقىرىم جول پايدالانۋعا بەرىلدى. جالپى, 2022 جىلعا دەيىن 24 مىڭ شاقىرىم جولدىڭ بارلىعى ءبىر قالىپقا كەلەدى دەگەن ويدامىز, – دەدى ينۆەستيتسيالار جانە دامۋ ءمينيسترى.
سونداي-اق, كەڭەستە «قازاقستان تەمىر جولى» ۇك» اق پرەزيدەنتى قانات الپىسباەۆ مەملەكەت باسشىسىنا الاكول دەمالىس ايماعىنىڭ 2020 جىلعا دەيىنگى كولىكتىك قولجەتىمدى كارتاسىن تانىستىرىپ, ترانزيتتىك تاسىمالداۋ ءىسىن دامىتۋ ستراتەگياسىنىڭ جۇزەگە اسىرىلۋى بارىسى جونىندە باياندادى.
مادەنيەت جانە سپورت ءمينيسترى ارىستانبەك مۇحامەدي ۇلى ىشكى جانە سىرتقى ءتۋريزمدى دامىتۋ جولىندا بارلىق كەدەرگىلەردى الىپ تاستاۋ ماقساتىمەن قازاقستان حالقىنا ارنالعان جولداۋدا ايتىلعان تاپسىرمالاردىڭ ىسكە اسىرىلۋى, سونىمەن قاتار ەكسپو-نىڭ جاعىمدى اسەرىن قولداۋ ءۇشىن مينيسترلىك تاراپىنان اتقارىلىپ جاتقان شارالار جونىندە باياندادى.
– ەلىمىز ءتۋريزمنىڭ ەكونوميكالىق اسەرىن ءىس جۇزىندە ەكسپو-نى وتكىزۋ بارىسىندا سەزىندى. سول كەزدە قازاقستانعا 7 ميلليوننان استام تۋريست كەلدى. بۇل وتكەن جىلمەن سالىستىرعاندا 18 پايىزعا كوپ. ىشكى تۋريزم لەگى 20 پايىزعا ارتىپ, شامامەن 6 ميلليون ادامعا جەتتى, – دەدى ۆەدومستۆو باسشىسى.
كەڭەس قورىتىندىسى بويىنشا جانە تۋريستىك كلاستەر نىساندارىن ارالاعاننان كەيىن نۇرسۇلتان نازارباەۆ قازاقستاننىڭ تۋريزم سالاسىن ودان ءارى دامىتۋ ءۇشىن ورتالىق مەملەكەتتىك جانە جەرگىلىكتى اتقارۋشى ورگاندارعا بىرقاتار تاپسىرما بەردى.
– الاكول قازاقستان بويىنشا ەڭ كوپ دەمالۋشى باراتىن جەرگە اينالۋى كەرەك. ول ىڭعايلى جەردە ورنالاسۋىمەن ەرەكشەلەنىپ, بارلىق ءوڭىردىڭ تۇرعىندارى ءۇشىن قولجەتىمدى بولىپ وتىر. كولدىڭ بىرەگەيلىگى سۋىنىڭ ەمدىك قاسيەتىنە بايلانىستى. ونىڭ قۇرامىندا رادون, ءسىلتى جانە باسقا دا پايدالى ەلەمەنتتەر بار. وسىعان بايلانىستى الاكول ەلىمىزدىڭ تۋريزم سالاسى ءۇشىن وتە ماڭىزدى, – دەدى مەملەكەت باسشىسى.
