ءبىرىنشى كەزەكتە پاراد قولباسشىسى – قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باس قولباسشىسى, گەنەرال-مايور مۇرات بەكتانوۆ مەملەكەت باسشىسى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆقا اسكەري شەرۋدى وتكىزۋگە جانە اۋماقتىق اسكەرلەر قۇرامالارىنا جاۋىنگەرلىك تۋلاردى تاپسىرۋ راسىمىنە دايىن ەكەندىگى جونىندە باياندادى.
بۇدان كەيىن قازاقستان رەسپۋبليكاسىنىڭ پرەزيدەنتى ن.نازارباەۆ ارداگەرلەردى, ساربازدار مەن وفيتسەرلەردى وتان قورعاۋشى كۇنىمەن قۇتتىقتاپ, ەلىمىزدىڭ قارۋلى كۇشتەرى قاۋىپسىزدىگىمىزدىڭ باستى كەپىلى, وتانىمىزدىڭ بەيبىت ءومىرى مەن ەگەمەندىگىمىزدىڭ بەرىك تىرەگى بولىپ سانالاتىنىن اتاپ ءوتتى.
– قىمباتتى قازاقستاندىقتار, ساردارلار مەن ساربازدار! قادىرلى ارداگەرلەر! بارشاڭىزدى وتان قورعاۋشى كۇنىمەن شىن جۇرەكتەن قۇتتىقتايمىن. ءباھادۇر بابالار ۇلى دالامىزدى اق بىلەكتىڭ كۇشىمەن, اق نايزانىڭ ۇشىمەن قورعاپ, ونى بىزگە امانات ەتىپ قالدىردى. «ۇراندى ەلدىڭ ۇرپاعى ايبارلى كەلەدى» دەگەن دانا حالقىمىز. بۇگىنگى ايبىندى ارميامىز ءۇشىن ەلدىڭ تىنىشتىعىن ساقتاپ, تاۋەلسىزدىكتىڭ قورعانى بولۋ مارتەبەلى زور مىندەت. جاۋجۇرەك جاۋىنگەرلەردىڭ كوتەرەتىن جۇگى اۋىر. بىراق ول ابىرويلى بورىش, قاستەرلى پارىز. قارۋلى كۇشتەرىمىز حالقىمىزدىڭ سەنىمدى تىرەگى, مەملەكەتتىڭ بەرىك قالقانى. قازاقستاننىڭ اسكەري قىزمەتشىلەرى – بارلىق ءداۋىردىڭ تاريحىنداعى ەڭ سۇراپىل سوعىستا ءفاشيزمدى جەڭگەن باتىر بابالارىمىزدىڭ جاۋىنگەرلىك ەرلىكتەرى مەن داڭقىن جالعاستىراتىن لايىقتى ۇرپاق. ءبىز ولاردىڭ تۋعان جەرىمىزدىڭ وركەندەۋى مەن بەيبىت ءومىرىمىزدى ساقتاۋ ءۇشىن كورسەتكەن كوزسىز باتىرلىعى مەن وشپەس ەرلىگىن ءاردايىم جادىمىزدا ساقتايمىز, – دەدى ەلباسى.
مەملەكەت باسشىسى ءوز سوزىندە ءار سارباز وتان قورعاۋشى رەتىندە ءوزىنىڭ ەل الدىنداعى بورىشى مەن مىندەتىن تەرەڭ سەزىنۋى ءتيىس ەكەنىن اتاپ ءوتتى.
– جاۋىنگەرلىك تۋ تۋعان جەرگە ادالدىقتىڭ, ەرلىك پەن باتىلدىقتىڭ نىشانى بولىپ تابىلادى. قاسيەتتى بايراق رۋحى بيىك, ەرجۇرەك ساربازداردى ءاردايىم جەڭىسكە جەتەلەيدى. باۋىرجان مومىش ۇلىنىڭ «باتىرلىق وسكەن ورتاعا, كورگەن تاربيەگە بايلانىستى قالىپتاسادى», دەگەن ءسوزى بار. ازاماتتارىمىزدى وتانسۇيگىشتىككە تاربيەلەۋ ىسىندە اسكەري ءداستۇر ماڭىزدى ءرول اتقارادى. ءار سارباز وتان قورعاۋشى رەتىندە ءوزىنىڭ ەل الدىنداعى ەرەكشە جاۋاپكەرشىلىگىن سەزىنۋى ءتيىس. قارۋلى كۇشتەرىمىزدە جىگەرلى جىگىتتەر قاتارىندا اياۋلى ارۋلارىمىز دا اسكەري قىزمەتتى ابىرويمەن اتقارىپ كەلەدى. سوندىقتان بۇگىنگى مەرەكە ەر ازاماتتارمەن قاتار ساپ تۇزەگەن قايسار قىزدارىمىزعا دا ورتاق. مەملەكەت وتان قورعاۋشىلارعا ەرەكشە قامقورلىق كورسەتىپ كەلەدى, كورسەتە بەرەدى. وتكەن جىلى اسكەري قىزمەتكەرلەردىڭ جالاقىسى 25 پايىزعا ارتتى. اسكەريلەردى تۇرعىن ۇيمەن قامتاماسىز ەتۋ ماسەلەسى شەشىمىن ءوز رەتىمەن تاۋىپ جاتىر. مۇنىڭ ءبارى قارۋلى كۇشتەر ساربازدارىنىڭ ار-نامىسى مەن ايبىنىن ارتتىرۋعا جول اشادى. سوندىقتان مەن سىزدەردى اسكەري انتقا ادال بولادى دەپ سەنەمىن, – دەدى ەلباسى.
پرەزيدەنت ءوز سوزىندە بۇگىندە ەلىمىزدىڭ دايەكتى ءارى بەيبىتسۇيگىش ساياسات جۇرگىزىپ وتىرعانىن اتاپ ءوتتى. بۇل ورايدا قازاقستان اسكەرى ەلىمىزدىڭ تاۋەلسىزدىگىن كۇزەتىپ, ۇجىمدىق قاۋىپسىزدىك شارت ۇيىمى اياسىندا ۇجىمدىق قاۋىپسىزدىكتى قامتاماسىز ەتۋدە ايانباي ەڭبەك ەتىپ كەلەدى. سونىمەن قاتار بىرىككەن ۇلتتار ۇيىمى شەڭبەرىندە ماڭىزدى بىتىمگەرشىلىك مىندەتتەردى دە لايىقتى تۇردە اتقارۋدا.
جاۋىنگەرلىك پاراد كەزىندە ەلباسى مەملەكەت تاراپىنان ارميامىزعا مەيلىنشە قولداۋ كورسەتىلىپ, ونىڭ الەۋەتىن نىعايتۋعا زور ءمان بەرىلەتىنىن جانە قازاقستان 2030 جىلعا قاراي زاماناۋي, ءموبيلدى ءارى جوعارى كاسىبي اسكەر جاساقتاۋ جونىندە ماقسات قويىپ وتىرعانىن اتاپ ءوتتى.
– بۇل ءۇشىن 2020 جىلدان باستاپ قورعانىس سالاسىنا قاجەتتى قاراجات بولىنەتىن بولادى. قاۋىپسىزدىككە تونەتىن جاڭا سىن-قاتەرلەرگە وراي ءتيىمدى ارەكەت ەتۋ ءۇشىن ارنايى وپەراتسيالاردىڭ جوعارى ءموبيلدى كۇشتەرى مەن اۋماقتىق اسكەرلەر قۇرىلىپ, قورعانىس جۇيەسىنە بىرىكتىرىلدى. جاڭا بولىمدەر بۇگىن تابىس ەتىلگەن جاۋىنگەرلىك تۋلاردى لايىقتى الىپ جۇرەتىنىنە سەنىمدىمىن, – دەدى پرەزيدەنت.
وسى ارادا ءسال شەگىنە سويلەسەك, ەگەمەندىك العان كۇننەن باستاپ تاتۋلىق پەن بىرلىكتى تۋ ەتىپ, ىنتىماقتى ىرىسىنا بالاعان ەلىمىزدىڭ بۇل كۇندە الەم مەملەكەتتەرىنىڭ الدىندا ابىرويى اسقاق, بەدەلى بيىك. ەجەلدەن ايبىنى اسقاق, رۋحى ءور حالىقتىڭ دالالىق دانىشپاندىعى مەن كەنەن كورەگەندىگى بۇگىندە ەلباسى ساياساتىنىڭ نەگىزگى وزەگىنە اينالىپ وتىر. بابالاردىڭ ونەگەسى مەن قايتالانباس ەرلىگى تاۋەلسىزدىك جىلدارىندا ەلىمىزدىڭ بولمىسىندا جاڭاشا تۇلەپ, وتان دەگەن ۇلى ۇعىمنىڭ, قاستەرلى اتاۋدىڭ ءمانى مەن ماڭىزى ەرەكشەلەنە ءتۇستى. تاۋەلسىز قازاقستاننىڭ الەۋەتى جوعارى اسكەرى قالىپتاستى. اسكەري قىزمەتشىلەرگە, ساربازدارعا دەگەن مەملەكەتتىڭ قامقورلىعى مەن قولداۋى ارتتى. اسىرەسە ەگەمەن ەلىمىزدىڭ بولاشاعى بولىپ سانالاتىن جاستاردىڭ بويىندا پاتريوتتىق تاربيە قالىپتاستىرۋ, ولاردى وتانسۇيگىشتىككە باۋلۋ, تۋعان جەرگە قۇرمەت كورسەتۋ, ەل ايبىنىن اسىرۋ جولىندا ايانباي ەڭبەك ەتۋ ەلباسى بەلگىلەپ بەرگەن ناقتى ماقسات پەن مىندەتتىڭ كورىنىسى.
ەلباسى نۇرسۇلتان نازارباەۆ «ەركىن ەلدە وسكەن ۇرپاقتىڭ رۋحى ءاردايىم بيىك بولۋى ءتيىس. جاستارى جالىن جۇرەكتى, ءورشىل نامىستى, بيىك رۋحتى بولسا – ول ەلدىڭ ەڭسەسى دە بيىك بولادى. ءورشىل, نامىسشىل جاس وتانشىل, پاتريوت كەلەدى, حالقىنا, ءوز ۇلتىنا ادال قىزمەت ەتۋگە ۇمتىلادى», دەگەن بولاتىن. بۇگىندە دامۋدىڭ داڭعىل جولىنا تۇسكەن قازاقستان اسكەرىنىڭ الەۋەتى, مۇمكىندىگى الەمگە ايگىلى. ال اسكەري سالا ساپىنداعى قىزمەتشىلەر دە, ساربازدار دا ەل بىرلىگىن ساقتاۋدا, قاۋىپسىزدىكتى قاداعالاۋدا قىراعىلىق تانىتىپ كەلەدى.
وتان قورعاۋ – ۇلى ۇعىم. وسى ورايدا ەلباسى جارلىعىمەن 7 مامىر – وتان قورعاۋشى كۇنى بولىپ بەلگىلەندى. بۇل كۇنى ەلىمىز بويىنشا اسكەري قىزمەتشىلەر ساپ تۇزەپ, ەلىمىزدىڭ قورعانىس سالاسىنىڭ قارقىنىن ءدۇيىم جۇرتقا پاش ەتىپ كەلەدى. ال بيىلعى ايتۋلى مەرەكەنىڭ ءمانى مەن ماڭىزى جىلداعىدان ايرىقشالانىپ, ەل تاريحىنداعى تاعىلىمدى ساتتەردىڭ ساۋلەلى كەزەڭدەرىن قالىپتاستىردى.
وتان قورعاۋشى كۇنىن مەرەكەلەۋ شەڭبەرىندە ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن جامبىل وبلىسى قورداي اۋدانى گۆاردەيسكي كەنتىندە ورنالاسقان «وتار» 40-شى اسكەري بازاسىندا وتكەن بۇل اسكەري شەرۋ ەكى بولىمنەن تۇردى. العاشقى بولىمدە اۋماقتىق قورعانىس بريگادالارىنىڭ جاۋىنگەرلىك تۋلارى وبلىستاردىڭ, سونداي-اق استانا جانە الماتى قالالارىنىڭ اكىمدەرىنە تاپسىرىلدى. اكىمدەرگە تۋ تاپسىرۋ راسىمىنەن كەيىن ارناۋلى وپەراتسيالار كۇشتەرىنىڭ, مەملەكەتتىك كۇزەت قىزمەتىنىڭ, ۇلتتىق ۇلاننىڭ, اسكەري-تەڭىز كۇشتەرىنىڭ ارناۋلى ماقساتتاعى وتريادىنىڭ, سونىمەن قاتار اۋماقتىق اسكەرلەردىڭ اسكەري قىزمەتشىلەرىنىڭ پارادقا قاتىسۋشى قۇرامدارى ساپ تۇزەپ ءوتتى.
جاۋىنگەرلىك پارادتىڭ ەكىنشى بولىمىندەگى زاماناۋي قارۋ-جاراق پەن اسكەري تەحنيكانى ۇرىستا قولدانا وتىرىپ, بارلاۋ-اسكەري بولىمشەلەرىنىڭ شىنايى تاكتيكالىق ءىس-قيمىلى كەلۋشىلەردى بەي-جاي قالدىرمادى. زاڭسىز قارۋلى قۇرىلىمداردىڭ شارتتى بازاسىن جويۋ جونىندەگى تاكتيكالىق ەپيزودتاردى ورىنداۋ بارىسى قازاقستان قارۋلى كۇشتەرىنىڭ كەمەلدىگىن كورسەتتى. جاۋىنگەرلىك پاراد كەزىندە كوپشىلىك تاماشالاعان «توچكا-ۋ» تاكتيكالىق زىمىران كەشەنى, «گراد» جانە «پريما» دۇركىندەتىپ وتشاشۋ زىمىران جۇيەسى, مستا-ب جانە د-30 زەڭبىرەكتەرى, «سولنتسەپەك» اۋىر وتشاشقىش زىمىران جۇيەسى, «شتۋرم-س» تانكىگە قارسى زىمىران كەشەنى جانە راكەتا اسكەرلەرى مەن ارتيللەريانىڭ باسقا دا قارۋ تۇرلەرىنىڭ مۇمكىندىكتەرى اتالعان پارادتىڭ جوعارى دەڭگەيدە ۇيىمداستىرىلعانىن كورسەتتى.
بايتاق دالامىزدىڭ بىرلىگىن ايگىلەيتىن, ەگەمەن ەلىمىزدىڭ ەرەكشەلىگىن تانىتاتىن كورىنىستەر كەلۋشىلەردىڭ ءوز وتانىنا دەگەن پاتريوتتىق جانە ماقتانىش سەزىمدەرىن وياتتى.
سونىمەن قاتار 3 مىڭعا جۋىق اسكەري قىزمەتشى, 300 بىرلىك قارۋ-جاراق پەن 40 بىرلىك ۇشۋ اپپاراتى جۇمىلدىرىلعان جاۋىنگەرلىك پاراد بارىسىندا قۇرلىق اسكەرلەرى جانە اۋە قورعانىسى كۇشتەرىنىڭ اسكەرلەرى زىمىران اتىپ, بومبا لاقتىردى, سونداي-اق بارلىق قارۋ تۇرىنەن وق اتتى. ال اسكەري-اۋە كۇشتەرىنىڭ مايداندىق جانە اسكەري اۆياتسياسىنىڭ ۇشاقتارى مەن تىكۇشاقتارى اسپانعا كوتەرىلىپ, اۋە ءىس-قيمىلدارىن كورسەتتى. اۋەدە ءوز شەبەرلىكتەرىن مايداندىق, ارميالىق جانە اسكەري-كولىك اۆياتسياسى, س-295 سۋ جاڭا اسكەري-كولىك ۇشاقتارى مەن سۋ-30 كوپ نىسانالى جويعىشتارى پاش ەتتى. پاراد كەزىندە «جەتىسۋ بارىسى» ۇشقىشتار توبى جوعارى دەڭگەيدە شەبەرلىك تانىتتى.
بۇل ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن ەل اۋماعىندا وتكەن, مەملەكەتىمىز ءۇشىن تاريحي ماڭىزى زور ەكىنشى جاۋىنگەرلىك پاراد بولىپ تابىلادى. بيىلعى جىلعى پارادتىڭ ەرەكشەلىگى, زاماناۋي قارۋ-جاراق پەن اسكەري تەحنيكانى, اۆياتسيانى جاۋىنگەرلىك تۇرعىدا قولدانا وتىرىپ, بارلاۋ بولىمشەلەرىنىڭ شىنايى تاكتيكالىق ءىس-قيمىلدارىن كورسەتۋ بولدى. قازاقستان اسكەرلەرىنىڭ ءىس جۇزىندەگى ارەكەتتەرىن جۇرتشىلىق رەسپۋبليكالىق تەلەارنالار جانە قورعانىس مينيسترلىگىنىڭ رەسمي سايتى ارقىلى تىكەلەي ەفيردەن تاماشالادى. سونىمەن قاتار پوليگون اۋماعىندا جۇرگىزىلگەن كوماندالىق-شتابتىق جاتتىعۋلاردىڭ ناتيجەسىندە كورەرمەندەر قازاقستان ارمياسىنىڭ جان-جاقتى مۇمكىندىگىنە كۋا بولدى.
جاۋىنگەرلىك پاراد سوڭىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ اسكەري تەحنيكا مەن قارۋ-جاراقتىڭ زاماناۋي ۇلگىلەرىمەن تانىستى. سونىمەن قاتار ەلباسى جاۋىنگەرلىك پارادقا قاتىسۋشى ازاماتتارعا دالالىق جەردەگى ۇرىستا كورسەتكەن شەبەرلىكتەرى, وق اتۋ ساتىندەگى مەرگەندىكتەرى جانە جاۋىنگەرلىك دايىندىقتارى ءۇشىن العىسىن ءبىلدىردى.
– اسكەري پاراد سىزدەردىڭ جاۋىنگەرلىك شەبەرلىك دەڭگەيلەرىڭىزدى جانە دالاداعى جاتتىعۋلارعا بەيىمدەلگەندەرىڭىزدى ناقتى كورسەتتى. پاراد قازاقستان رەسپۋبليكاسى قارۋلى كۇشتەرىنىڭ جاۋىنگەرلىك دايىندىعى مەن كاسىبي دەڭگەيىنىڭ ودان ءارى ارتا تۇسۋىنە سەپتىگىن تيگىزەدى دەپ سەنەمىن, – دەدى نۇرسۇلتان نازارباەۆ.
سونىمەن قاتار قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى بارشا ازاماتتاردى وتان قورعاۋشى كۇنىمەن جانە ۇلى جەڭىس كۇنىمەن قۇتتىقتادى.
وتان قورعاۋ – مەملەكەت الدىنداعى مارتەبەلى مىندەتتىڭ ءبىرى. زامانىندا ءبورىلى بايراق كوتەرگەن بابالارىمىزدىڭ اماناتىنا ادالدىق – بۇگىنگى پارىز. ەلباسى سەنىمى ءاردايىم ەل ازاماتتارىنا سونى سەرپىن بەرىپ, بيىك رۋح سىيلايتىنى, سونىمەن قاتار وتان ءۇشىن زور جاۋاپكەرشىلىك ارتاتىنى اقيقات. ەشقاشان تۋى تومەن تۇسپەگەن, ەڭسەسى ەڭكەيمەگەن ەلىمىزدىڭ بايراعى بولاشاقتا دا بيىكتە جەلبىرەي بەرەتىنىنە سەنىم مول!
عالىم سۇلەيمەن,
حاميت ەسامان,
«ەگەمەن قازاقستان»
جامبىل وبلىسى,
قورداي اۋدانى
