بيىكتىگى 7, ەنى 10 مەتردى قۇرايتىن, ءمارماردان جاسالعان تاقتاعا جەرگىلىكتى مايدانگەرلەردىڭ ەسىمى قاشاپ جازىلعان مونۋمەنتتىڭ اشىلۋ راسىمىنە سوعىس جانە تىل ارداگەرلەرى, الىس-جاقىننان ارنايى كەلگەن قوناقتار مەن اۋدان اكىمى داۋلەت باتىرباەۆ قاتىستى.
سونىمەن قاتار بۇل كۇنى «اكەلەر رۋحىنا تاعزىم» اتتى كىتاپتىڭ تانىستىرىلىمى وتكىزىلدى. رۋسلان ناسىروۆ پەن ليۋتسيا حاميتوۆا بىرلەسە جازعان ەڭبەكتە باسكولدىكتەردىڭ مايدانداعى ەرلىكتەرى باياندالادى.
رەتى كەلگەندە ايتا كەتەيىك, ەكىنشى دۇنيەجۇزىلىك سوعىسقا باسكول مەن قاراقۇدىق اۋىلدارىنان 300 ازامات اتتانسا, سونىڭ 84-ءى ەلگە ورالماعان. جوعارىدا اتالعان تاقتاعا وسى 300 جاۋىنگەردىڭ ەسىمى جازىلعان.
«تورتكۇل دۇنيەنى ءدۇر سىلكىندىرگەن قاندى قاساپقا مەنىڭ اكەم ادىحان بايكانوۆ پەن ءىنىسى احتان بايكانوۆ تا اتتانىپ, مايدان دالاسىندا قازا تاپتى. تەك ءبىر ءىنىسى قادىر بايكانوۆ امان-ەسەن ەلگە ورالدى. باسكول ورتا مەكتەبىندە سوعىس ارداگەرلەرىنە ارنالعان مۋزەي بار. جاس ۇرپاق اتالارىنىڭ ەرلىگى مەن ورلىگىن ءبىلىپ وسسە, وتانىنا ادال قىزمەت ەتەرى انىق», - دەيدى تىل ارداگەرى مارۆاتجان بايكانوۆ.
شارا سوڭىندا استانانىڭ 20 جىلدىعىنا وراي ەسكەرتكىشتىڭ ماڭىنا 20 ءتۇپ شىرشا كوشەتتەرى وتىرعىزىلدى.
ازامات قاسىم,
«ەگەمەن قازاقستان»
بەسقاراعاي اۋدانى,
باسكول اۋىلى
