التىناي اپا ايگىلى ماتاي ستانسىندا تۋىپ-ءوستى. بۇل ستانسانى ايگىلى دەپ اتاۋىمىزدىڭ سىرى بار, سول سوعىس جىلدارىندا ماتايدىڭ دەپوسىندا ورىس ونەرتاپقىشى ميحايل كالاشنيكوۆ العاشقى اۆتوماتتى اتىس قارۋىن ويلىپ تاۋىپ, قۇراستىرعان بولاتىن. تۇركسىب تەمىر جولىنىڭ نەگىزگى ءبولىمى رەتىندە شاعىن ستانسادا تىرشىلىك كورىگى سۋىعان ەمەس. اسىرەسە, سوعىس جىلدارىندا ورتا ازيادان مايدان شەبىنە اتتانعان سوستاۆتار لەگىندە سان جوق ەدى. جاستايىنان تەمىرجولدىڭ تارسىلى مەن پاروۆوزدىڭ اششى داۋسىنا قۇلاعىنىڭ قۇرىشى قانعان التىناي ەسبولوتوۆا ون توعىز جاسىندا ءماشينيستىڭ قىسقا مەرزىمدى وقۋىن وقىپ, پاراۆوزدىڭ باسقارۋ تىزىگىنىن قولىنا الدى. وسىلايشا اسكەري پويىزدىڭ ءماشينيسى اتانعان قازاقتىڭ جاس قىزى اۋىر سوستاۆتى سۇيرەگەن پاراۆوزدىڭ كابيناسىندا العى شەپكە كەتە باردى. ستالينگراد تۇبىندەگى مايدانعا اسكەري تەحنيكا, ادام كۇشى, ازىق-ت ۇلىك جەتكىزىپ, كەرى ورالعاندا اۋىر جارالانعان جاۋىنگەرلەردى تاسيتىن ەدى.
قازىر توقساننان جاسى اسقان «پاراۆوز اپا» تالدىقورعان قالاسىندا تۇرادى. تەك ول كۇندەر تۋرالى اڭگىمەگە قاساڭ. جالىنعا ورانعان جاستىعى مەن ەل كۇيزەلگەن كەزەڭدى ەسىنە تۇسىرۋدەن بويتارتاتىن بولار. ەسىنە بۇگىنگى باقىتتى ۇرپاققا ۇنەمى باتا بەرىپ, تاۋەلسىز ەلدىڭ تىلەۋىن تىلەپ وتىرادى.
...الماتى وبلىسىنىڭ اكىمى اماندىق باتالوۆ تالدىقورعاندا تۇراتىن سوعىس ارداگەرلەرىنىڭ ءۇيىن باس سۇعىپ, قارت مايدانگەرلەردى قۇتتىقتاپ شىعۋدى داستۇرگە اينالدىرعان. كۇنى كەشە وسى ۇردىسپەن ءۇي ارالاعان اكىم التىناي اپانىڭ دا تابالدىرىعىنان اتتادى. اكىمنىڭ قادامىنا رازى بولعان ارداگەر اڭگىمە تيەگىن اعىتتى. مايدانداعى جىلداردى ەسىنە الىپ, سوعىستا جەڭىسكە جەتكىزگەن وتانعا دەگەن شەكسىز سۇيىسپەنشىلىك پەن بىرلىك ەكەنىن ەسكەرتى. وسى كەزدە ءبىر توپ وقۋشى دا «پاراۆوز اپانى» قۇتتىقتاپ كەلە قالعان-دى. اپا بالالارعا باتاسىن بەردى.
- جاقسى وقىڭدار, تاربيەلى بولىڭدار, اتا-انالارىڭنىڭ قۋانىشى, وتاننىڭ تىرەگى بولىڭدار. ءبىلىم – بارلىق يگىلىكتىڭ كىلتى. قولدا بار نارسەنى قادىرلەي ءبىلۋ كەرەك, بار مۇمكىندىكتى پايدالانا ءبىلۋ كەرەك. بالالاردىڭ ءبىز كورگەن قيىندىقتى كورمەي, بولاشاقتارى جارقىن بولۋىن تىلەيمىن! – دەدى التىناي اپا بالعىنداردىڭ باسىنان سيپاپ.
ءسوزىن جالعاعان ارداگەر اپا وبلىس اكىمىنە قاراتا:
- وسى كۇنگە جەتكەنىمە شۇكىرشىلىك ەتەمىن. قازىر حالىق بەيبىتشىلىك پەن تىنىشتىقتا جاقسى ءومىر ءسۇرىپ جاتىر, كيىمى كوك, قارنى توق. سوندىقتان ەلباسىمىزعا ريزامىن.وسىنى جەتكىزەرسىڭ. بارلىعىڭا زور دەنساۋلىق تىلەيمىن, - دەدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
