9 مامىر – جەڭىس مەرەكەسى قارساڭىندا وبلىس اكىمى دانيال احمەتوۆ وسكەمەن قالاسى, زىريان مەن گلۋبوكوە اۋداندارىندا تۇراتىن بىرنەشە سوعىس ارداگەرىنىڭ ۇيىنە ارنايى بارىپ, مەيراممەن قۇتتىقتاپ, جارتى ميلليون تەڭگەنىڭ سەرتيفيكاتىن تابىس ەتتى. ۇلان اۋدانىنىڭ تۋماسى, بۇگىندە وبلىس ورتالىعىندا بالا-شاعاسىنىڭ ورتاسىندا باقىتتى عۇمىر كەشىپ جاتقان قاباتاي قالدىباەۆ اقساقال 5 مامىردا 100 جاسقا تولدى. قارا جانە ازوۆ تەڭىزدەرى جاعالاۋلارىن جاۋدان قورعاپ, سولتۇستىك-كاۆكاز مايدانىندا شايقاسىپ, زەينەتكەرلىككە شىققانعا دەيىن بەلوگور تاۋ-كەن بايىتۋ كومبيناتىندا ءورت ءسوندىرۋشى بولىپ ەڭبەك ەتكەن قاريانى ايماق باسشىسى عاسىرلىق مەرەيتويىمەن قۇتتىقتاپ, يىعىنا شاپان جاپتى. ء«ار ارداگەر مەن تىل ەڭبەككەرى – حالقىمىزدىڭ قازىناسى, ۇلتتىق ماقتانىشى. ۇرپاق بولاشاعى جولىندا تانىتقان قايسارلىقتارىڭىز ءۇشىن العىسىمىز شەكسىز. مۇنداي قۇرمەتكە بۇگىندە تمد-نىڭ بىردە-ءبىر ەلىنىڭ ارداگەرلەرى يە بولىپ وتىرعان جوق دەپ سەنىممەن ايتا الامىن. بۇل ەڭ الدىمەن ەلباسىمىز نۇرسۇلتان نازارباەۆ جۇرگىزىپ وتىرعان ساياساتتىڭ جەمىسى. ءبىز سىزدەردى قاشان دا ماقتان تۇتامىز», – دەدى وبلىس اكىمى.
وبلىس اكىمدىگى تاراپىنان بەرىلىپ جاتقان 500 مىڭ تەڭگە مايدانگەرلەردىڭ ەسەپشوتىنا اۋدارىلىپ تا قويىپتى. ءبىر قىزىعى, وبلىس اكىمى زىريان اۋدانىنداعى ءبىر ارداگەرگە سەرتيفيكات تاپسىرا وتىرىپ: «اقساقال, اقشاڭىزدى اۋداردىق. بىلەسىز بە؟» دەپ سۇراعاندا باسىن شايقاپتى. ءسىرا, بالالارى اقشانىڭ تۇسكەنىن ايتپاعان سەكىلدى. سودان دا بولار د.احمەتوۆ ءوزى قۇتتىقتاعان ءاربىر ارداگەرگە وسى سۇراعىن قويىپ, كوزىن جەتكىزگەندەي بولدى. ماسەلە – اقشادا ەمەس قوي. بۇگىندە 90-نان اسىپ, 100-گە جۋىقتاعان قاريالار اقشاعا ەمەس, ەڭ اۋەلى جىلى قاباق پەن اشىق پەيىلگە ءزارۋ ەكەنى انىق.
ازامات قاسىم,
«ەگەمەن قازاقستان»
شىعىس قازاقستان وبلىسى
