-تەلەستۋديا ۇيىرمەسىنە 2017 جىلدىڭ جەلتوقسانىندا «نكوك» كومپانياسىنىڭ قايىرىمدىلىق باعدارلاماسى بويىنشا دەمەۋشىلىك كومەك جاسالىپ, ستۋدياعا قاجەتتى Canon EOS 5D Mark III Body كاسىبي فوتواپپاراتى مەن كامەرانىڭ ەركىن قوزعالۋىنا مۇمكىندىك بەرەتىن DJI Ronin-M تۇراقتاندىرعىش (ستابيليزاتور) الىپ بەرىلگەن بولاتىن. اتالعان شارا بىزگە سىيلانعان تەحنيكانىڭ مۇمكىندىگىن جانە وقۋشىلاردىڭ فوتو تۇسىرۋدەگى قابىلەتتەرىن كورسەتۋ ءۇشىن ۇيىمداستىرىلىپ وتىر, دەيدى ۇيىرمە جەتەكشىسى رىسگۇل رامازانوۆا كورمە تۋرالى.
وقۋشىلار كورمەگە 22 ەرەكشە سۋرەت قويدى. ولار «مەكتەپ ءومىرى», «پورترەت» جانە «كوكتەم» سەرياسىنداعى فوتولاردان تۇردى. ۇيىرمە قاتىسۋشىلارى ءار فوتونىڭ ءتۇسىرىلۋ تاريحى مەن وزگەشە ماڭىزى بار ەكەنىن ايتادى.
-فوتوكورمەگە قويىلعان سۋرەتتەردىڭ دەنى كوكتەم ۋاقىتىندا تۇسىرىلگەن. بىزدەر مەكتەپ ىشىندەگى ماڭىزدى شارالاردى فوتوعا جانە ۆيدەوعا ءتۇسىرىپ, ارنايى ۆيدەورەپورتاجدار دايىندايمىز جانە مەكتەپتىڭ مەدياارحيۆىن قالىپتاستىرۋعا اتسالىسامىز. ۇيىرمەدەگى دوستارممەن بۇل كورمەگە جارتى جىل دايىندالدىق. راسىن ايتقاندا, بۇل ءبىزدىڭ وقۋ جىلىنداعى اتقارعان جۇمىستارىمىزدىڭ ەسەبى ىسپەتتەس, دەيدى جاس ءفوتوتىلشى ديانا ماراتقىزى.
ۇيىمداستىرۋشىلاردىڭ ايتۋىنشا, قازىرگى تاڭدا فوتوعا ءتۇسىرۋ قۇرالدارىنىڭ مۇمكىندىكتەرى دامىعانمەن, بارلىعى شىنايى ادەمىلىكتى كورسەتە المايدى. سول ءۇشىن دە بالالار فوتوكورمەنى جيىرەك وتكىزۋدى جوسپارلاپ وتىر. سونداي-اق, زاماناۋي قۇرىلعىلاردىڭ كومەگىمەن ۇيىرمە تاربيەلەنۋشىلەرى 2017 جىلدىڭ اقپان ايىندا «قازاقستان بالالارى شەكسىز الەمدە» اتتى كينوفەستيۆالىنەن ءار ءتۇرلى نوميناتسيا بويىنشا بەس جۇلدەگە يە بولعان.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
