ءىس-شاراعا قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى ن.جاننازاروۆا, ماڭعىستاۋ وبلىسى اكىمىنىڭ ورىنباسارى ر.ساكەەۆ, وبلىستىق ءدىن ىستەرى باسقارماسىنىڭ باسشىسى ە.ەسبەرگەنوۆ, وبلىستىق ورتالىق «بەكەت اتا» مەشىتىنىڭ باس يمامى س.سەيتبەكوۆ, اقتاۋ قالاسىنىڭ ريمدىك-كاتوليكتىك شىركەۋىنىڭ جەتەكشىسى ا.كالينوۆسكي, «جاڭارۋ» جالپىۇلتتىق سىبايلاس جەمقورلىققا قارسى قوزعالىس» رەسپۋبليكالىق قوعامدىق بىرلەستىگى وبلىستىق فيليالىنىڭ ديرەكتورى د.ۇسىپباەۆ, مەملەكەتتىك ورگانداردىڭ قىزمەتكەرلەرى, قازاقستان مۇسىلماندارى ءدىني باسقارماسىنىڭ وبلىستىق, قالالىق جانە اۋداندىق وكىلدىكتەرىنىڭ, ۇكىمەتتىك ەمەس ۇيىمداردىڭ وكىلدەرى جانە ءماسليحات دەپۋتاتتارى قاتىستى.
ءوزىنىڭ كىرىسپە سوزىندە اگەنتتىكتىڭ اۋماقتىق دەپارتامەنتىنىڭ باسشىسى ن.جاننازاروۆا ءىس-شارانىڭ ماقساتى مەن مىندەتتەرى, مەملەكەت تاراپىنان جۇرگىزىلىپ جاتقان سىبايلاس جەمقورلىققا قارسى ساياساتى تۋرالى جانە دە سىبايلاس جەمقورلىققا قارسى مادەنيەتتى قالىپتاستىرۋ ءۇشىن قوعامنىڭ ءتۇرلى الەۋمەتتىك توپتارىن تارتۋ قاجەتتىگى تۋرالى ايتىپ ءوتتى.
ماڭعىستاۋ وبلىستىق ءدىن ىستەرى باسقارماسىنىڭ باسشىسى ە.ەسبەرگەنوۆ دىنارالىق قاتىناستار سالاسىنداعى مەملەكەتتىك ساياساتتىڭ نەگىزگى باسىمدىقتارىن جۇزەگە اسىرۋ بويىنشا باسقارمانىڭ قىزمەتىنە توقتالدى.
ءوز كەزەگىندە وبلىستىق «بەكەت اتا» ورتالىق مەشىتىنىڭ باس يمامى س. سەيتبەكوۆ, اگەنتتىك تاراپىنان جۇرگىزىلىپ جاتقان ساياساتقا قولداۋ بىلدىرە وتىرىپ, وبلىستىڭ بارلىق مەشىتتەرىندە «سىبايلاس جەمقورلىققا قارسى ىس-قيمىلدىڭ بىرىڭعاي ساعاتىن» ۇيىمداستىرۋدى ۇسىندى. وبلىستىق, قالالىق, اۋداندىق جانە اۋىلدىق مەشىتتەردىڭ جاماعاتتارىنا جۇما نامازى بارىسىنداعى ۋاعىزداردا پاراقورلىقتىڭ شاريعات ۇكىمى بويىنشا كۇنا ەكەندىگى, قوعام جانە ەل ءۇشىن قاۋىپتىلىگى تۋرالى تولىق ءتۇسىندىرۋ جۇمىستارى جۇرگىزىلمەك.
تالقىلاۋ بارىسىندا اقتاۋ قالاسىنىڭ ريمدىك-كاتوليكتىك شىركەۋىنىڭ جەتەكشىسى ا.كالينوۆسكي, قوعامدا سىبايلاس جەمقورلىققا قارسى مادەنيەتتى قالىپتاستىرۋ باعىتىندا اقپاراتتىق-ناسيحات جۇمىسىن جۇرگىزەتىنىن جەتكىزدى.
ءىس-شارا كەزىندە قاتىسۋشىلارعا رەسپۋبليكا كولەمىندەگى سىبايلاس جەمقورلىق دەرەكتەرى جيناقتالعان بەينەروليك كورسەتىلدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
