سۋرەت kostanaytany.kz سايتىنان الىندى
بۇعان دەيىن اۋدان, قالالاردىڭ بالۋاندارى ءوز وڭىرلەرىندە ىرىكتەۋ ءتۋرنيرىن وتكىزگەن-تۇعىن. سوندا جەڭىپ شىققان بوزكىلەم شەبەرلەرى فينالدىق كەزدەسۋگە جينالدى. ولاردىڭ اراسىندا ولقىسى جوق. شەتىنەن «سەن تۇر, مەن اتايىن» اتانجىلىك ساڭلاقتار. ەكى كۇنگە سوزىلعان دودادا بالۋاندار سەگىز سالماق دارەجەسى بويىنشا بەلدەستى.
ماسەلەن, 55 كيلوگرامم سالماقتا قوستانايلىق الىشەر مۇحامەدجانوۆ تۋرنير چەمپيونى اتاندى. 60 كيلوگرامدا مىلتىقباي ءابدۋايتوۆتىڭ باعى جاندى. 66 كيلوگرامم سالماقتا كىلەمگە شىققان ارقالىقتىق اقجول قازىمبەك تە ەشكىمگە ەسە جىبەرمەدى. 74 كيلوگرامدا سىنعا تۇسكەن جانكەلديندىك رۋسلان يبراەۆ تا ءوز قارسىلاستارىن تەگىس تىزە بۇكتىردى. 82 كيلوگرامدا ارقالىقتىڭ نامىسىن جىرتقان نۇرسۇلتان ءسالىمجانوۆ تۋرنير جەڭىمپازى اتانسا, 90 كيلوگرامم سالماقتا التىنسارين اۋدانىنىڭ بالۋانى بەرىك تالاسوۆقا تەڭ كەلەر قارسىلاس تابىلمادى. 100 كيلوگرامم سالماقتا تاعى ءبىر التىنساريندىك تەمىرلان ساپاروۆ جەڭىمپاز دەپ تانىلدى. ال, 100 كيلوگرامنان جوعارى, اسا اۋىر سالماقتا ارقالىقتىق عابيت بالعىنباەۆ جەڭىسكە جەتتى.
ادەتتە, قازاق كۇرەسىنىڭ ەڭ قىزىعى – ء«تۇي بالۋاندىق» باسەكە ەكەندىگى بەلگىلى. ابسوليۋتتىك سىنعا 30-عا تارتا بالۋان جازىلىپتى. ولار ءۇش ساعات بويى ءوزارا بەلدەسىپ, جەڭگەندەرى كەلەسى اينالىمعا شىعىپ وتىردى. تارتىستى وتكەن جارىستىڭ فينالىندا قازاق كۇرەسىنەن ازيا چەمپيونى, حالىقارالىق دارەجەدەگى سپورت شەبەرى راميل شارىگين مەن بىرنەشە مارتە ەل چەمپيونى, سپورت شەبەرى تەمىرلان ساپاروۆتىڭ جولى ءتۇيىستى. جانكۇيەرلەردىڭ قىزۋ قولداۋىنا يە بولعان فينالدىق كەزدەسۋ راميل شارىگيننىڭ پايداسىنا شەشىلدى. تەمىرلان ساپاروۆ ەكىنشى ورىنعا يە بولدى. ەندى وسى ەكى بالۋان وبلىس نامىسىن رەسپۋبليكالىق «قازاقستان بارىسى» تۋرنيرىندە قورعايتىن بولادى.
جەڭىمپازداردى وبلىس اكىمى ارحيمەد مۇحامبەتوۆ قۇتتىقتادى. ول توبىل-تورعاي وڭىرىندە قازاق كۇرەسىنىڭ ءباسى جوعارى ەكەندىگىن اتاپ ءوتتى.
ء«بىزدىڭ وبلىستا نەبىر تالانتتى سپورتشىلار بار. اسىرەسە, ۇلتتىق كۇرەس جىل وزعان سايىن قارقىندى دامىپ كەلەدى. وعان بۇگىن ءبىز مەن سىزدەر كۋا بولدىڭىزدار. قوستاناي توپىراعىنان ءالى تالاي پالۋاندار ءوسىپ شىعاتىنىنا مەن كامىل سەنەمىن. ويتكەنى, وبلىستا سپورتقا, ونىڭ ىشىندە ۇلتتىق سپورتتى دامىتۋعا ەرەكشە دەن قويىلىپ كەلەدى» دەدى ارحيمەد بەنجان ۇلى.
ءنازيرا جارىمبەت,
«ەگەمەن قازاقستان»
قوستاناي
