جولداۋ مىندەتتەرىنىڭ ءبىرى – كاتەگوريالار اراسىنداعى الشاقتىقتى ارتتىرىپ, مۇعالىمدەر ءۇشىن بىلىكتىلىك دەڭگەيىن ەسكەرەتىن كاتەگوريالاردىڭ جاڭا كەستەسىن ەنگىزۋ. پرەزيدەنت كاتەگوريالاردى الەمدە قولدانىلىپ جۇرگەن ۇلتتىق بىلىكتىلىك تەست ارقىلى بەرۋ كەرەكتىگىن ايتقان بولاتىن. «بۇل پەداگوگتاردى وزدەرىن ۇدايى جەتىلدىرۋگە ىنتالاندىراتىن بولادى. ناتيجەسىندە, مۇعالىمدەردىڭ جالاقىسى بىلىكتىلىگىنىڭ راستالۋىنا بايلانىستى تۇتاستاي العاندا 30 پروتسەنتتەن 50 پروتسەنتكە دەيىن وسەدى. بۇل ءۇشىن بيىل قوسىمشا 67 ميلليارد تەڭگە ءبولۋ قاجەت» دەلىنگەن جولداۋدا.
ءبىلىم جانە عىلىم ءمينيسترى ەرلان ساعاديەۆ بۇگىندە 60 مىڭ مۇعالىم اتالعان تەستىلەۋ اتتەستاتسياسىنا جازىلعانىن جەتكىزدى. پەداگوگ كادرلاردىڭ بىلىكتىلىك ساناتتارىن تاعايىنداۋدى ەكى كەزەڭدە جۇرگىزۋ جوسپارلانۋدا. ءبىرىنشى كەزەڭ – «وقۋ ءپانىنىڭ مازمۇنى» جانە «وقۋ ادىستەمەسى مەن پەداگوگيكا» مودۋلدەرى بويىنشا 26 مامىردان 5 ماۋسىمعا دەيىن جانە اعىمداعى جىلدىڭ 1-10 قاراشاسىندا جۇرگىزىلەدى. ونداعى سۇراقتاردىڭ 70%-ى پاندىك بىلىمگە جانە 30%-ى پەداگوگيكا مەن ادىستەمەگە باعىتتالعان. ال ەكىنشى كەزەڭ قىزمەت ناتيجەلەرىنىڭ كەشەندى تالدامالىق قورىتىندىسىنا ارنالادى. بۇل اعىمداعى جىلدىڭ 31 شىلدەسىنەن 15 جەلتوقسانىنا دەيىن اتقارىلماق. جاڭا جۇيە بويىنشا اتتەستاتتاۋدان بارلىق ءوتىنىش ءبىلدىرۋشى وتە الادى.
وسى ورايدا باس باسىلىم ءبىلىم جانە عىلىم مينيسترلىگىنىڭ «ۇلتتىق تەستىلەۋ ورتالىعى» رمقك-مەن بىرگە پەداگوگ قىزمەتكەرلەرگە ارنالعان جاڭا فورماتتاعى ۇلتتىق بىلىكتىلىك تەستىلەۋگە دايارلىق جوباسى اياسىندا بارلىق ءپان بويىنشا سۇراقتاردىڭ ۇلگىسىن جاريالاۋدى باستايدى.
تەست سۇراقتارىنىڭ العاشقى بولىگى گازەتتىڭ 10 مامىرداعى نومىرىندە جاريالانادى
