سۋرەتتەردى تۇسىرگەن ەرلان ومار, «ەگەمەن قازاقستان»
وسىناۋ ايتۋلى وقيعاعا وراي «استانا بالەت» تەاترىنىڭ ساحناسىندا وتكەن سالتاناتتى راسىمدە ءسوز سويلەگەن مادەنيەت جانە سپورت ءمينيسترى ارىستانبەك مۇحامەدي ۇلى الىس-جاقىننان كەلگەن قوناقتاردى قىزۋ قۇتتىقتاپ, باس قالاعا باسقان قادامدارىنا ساتتىلىك تىلەدى. الەمنىڭ ءار شالعايىنان جينالعان ارىپتەستەرىنە ۇتىمدى جوباسىن ۇسىنىپ وتىرعان اتالمىش اكادەميا تىكەلەي ەلباسى نۇرسۇلتان نازارباەۆتىڭ قولداۋىمەن قۇرىلعانىن جانە ونىڭ مادەني-رۋحاني كەڭىستىگىمىزدەن ويىپ ءوز ورنىن العانىن ايرىقشا ەكپىنمەن ايتتى.
ال ورتالىق ازيادا تەڭدەسى جوق قازاق ۇلتتىق حورەوگرافيا اكادەمياسىنىڭ رەكتورى, قازاقتى ءدۇيىم دۇنيەگە تانىتقان تۇلعا التىناي اسىلمۇراتوۆا شارتاراپتان شاقىرىلعان بي مەكتەپتەرىنىڭ وكىلدەرىنە ات سابىلتىپ جەتكەندەرى ءۇشىن العىسىن ءبىلدىردى.
– ءبىزدىڭ فەستيۆالدە جەڭگەندەر دە, جەڭىلگەندەر دە بولمايدى. وزدەرىڭىزدى تەك ونەر شەكاراسىن كەڭەيتە ءتۇسۋ, ەمەن-جارقىن پىكىرلەسۋ, تاجىريبە الماسۋ, الاڭسىز ارالاسىپ-قۇرالاسۋ, اسەمدىكتى اسپەتتەۋ ماقساتىندا شاقىردىق. ودان سوڭ ارينە قارىشتى دامۋ داڭعىلىنا تۇسكەن قازاقستاندى, اجارلى استانانى, كەلەشەككە قول سوزعان كەرەمەت اكادەميامىزدى كورسەتكىمىز كەلدى. ەگەر سىزدەر ەلدەرىڭىزگە بۇل جاقتان جاسامپازدىق ەنەرگياسىن الىپ قايتساڭىزدار ويداعى ءىسىمىزدىڭ ورىندالعانى, – دەدى ول جارقىن ءجۇزى قۋانىشتان بال-بۇل جانىپ.
توبە بيدەي بولىپ فەستيۆال تورىندە وتىرعان مارتەبەلى مەيماندار اراسىندا كوزىمىزگە جىلىۇشىراي كورىنگەن الەمدىك بالەت جۇلدىزدارى: كەزىندە ماسكەۋدىڭ ۇلكەن تەاترىندا جانە لوندوننىڭ كورولدىك بالەتىندە جاھۇتتاي جارقىراعان جامپوز يرەك مۇحامەدوۆ پەن رەسەيدىڭ حالىق ءارتىسى, رف مەملەكەتتىك سىيلىعىنىڭ لاۋرەاتى, كوپتەگەن كورنەكتى جۇلدەلەردىڭ يەسى, كۇنى كەشەگە دەيىن سانكت-پەتەربۋرگتەگى ايگىلى ماريا تەاترىنىڭ پريما-بالەريناسى بولعان ۋليانا لوپاتكينانى بولە-جارا اتاعىمىز كەلىپ تۇر.
قاتتى قايران قالعانىمىز, ساحنانىڭ قوس ساڭلاعى تىم قاراپايىم ەكەن. «جال بىتسە, جانىنا تورسىق بايلاتپايتىن» ءبىزدىڭ كەيبىر ءىسىپ-كەپكەن جۇلدىزسىماقتارىمىزعا ۇقسامايدى. اسىرەسە ۋليانا ۆياچەسلاۆوۆنا جان-جاعىنان جاپاتارماعاي قاۋمالاعان قارشاداي ۇل-قىزداردى بەتىنەن قاقپاي, ۇزاق ۋاقىت قولتاڭبا بەرگەنىنە ەرىكسىز ەلجىرەي قارادىق. جەر جارعان اتاق-داڭقىنا قاراماي, ەشكىمدى جاتىرقاپ جاتپادى. تاسىر مىنەز تانىتپادى. ءتىپتى زالعا ورالۋىن وتىنگەن ۇيىمداستىرۋشىلاردىڭ قۇلاققاعىسىنان كەيىن دە اسىعا قويمادى.
بۇقارالىق اقپارات قۇرالدارىنا بەرگەن سۇحباتتارىندا قاي مەملەكەتتە جۇرسە دە, ءوزىنىڭ تاتار ەكەنىن ۇدايى نازاردا ۇستايتىن يرەك مۇحامەدوۆ تە, اشىق-جارقىن كورىندى.
– جالپى, قازاقستانعا بۇعان دەيىن جولىم تۇسپەپتى. استانالارىڭىزعا اسپانداعى اي قىزىققانداي. اكادەميالارىڭىز شە... بالالاردىڭ بالەتپەن اينالىسۋىنا قاجەت جاعدايدىڭ بارلىعى جاسالىپتى. ەندى تەك, ەڭبەكتەنە بىلۋلەرى كەرەك. سوسىن بولاشاق بالەتشىلەرگە ساتتىلىك سەرىك بولۋىن تىلەيمىن. ونسىز بولمايدى, – دەدى تالايدى كورگەن تارلانبوز اڭگىمە تىزگىنىن تارتىپ.
فەستيۆال بارىسىندا بالعىن بالەت بيشىلەرى اتاقتى اعالارى مەن اپايلارىنان شەبەرلىك ساباقتارىن الىپ, تالاپتارىن ۇشتايتىن بولادى. ون ءبىر مەملەكەتتىڭ ۇكىلەگەن ۇمىتتەرى ءوز ونەرلەرىن كورسەتىپ, قالامىزدىڭ كورىكتى جەرلەرىمەن تانىسادى.
فەستيۆال ۇزدىك نومىرلەردەن قۇراستىرىلعان گالا-كونتسەرتپەن اياقتالادى.
