ءىس-شارا قازاقستان رەسپۋبليكاسى ۇلتتىق مۋزەيىنىڭ عىلىمي-ادىستەمەلىك قىزمەتى, قازاقستان تاريحى ءبولىمىنىڭ ۇيىمداستىرۋىمەن ءوتتى. وعان استانا قالاسى ارداگەرلەر كەڭەسىنىڭ وكىلدەرى, ارداگەرلەر ۇيىمى رەسپۋبليكالىق قوعامدىق بىرلەستىگى ورتالىق كەڭەسى توراعاسىنىڭ ورىنباسارى ومىرزاق وزعانباي, مەملەكەتتىك مەكەمەلەردىڭ, مادەنيەت سالاسىنىڭ قىزمەتكەرلەرى, سونداي-اق مەكتەپ وقۋشىلارى قاتىستى.
سالتاناتتى جيىننىڭ ماقساتى – قاسىم قايسەنوۆتىڭ ەرلىگىن وسكەلەڭ ۇرپاقتىڭ بويىنا ءسىڭىرۋ, ولاردىڭ پاتريوتتىق سەزىمىن وياتۋ.
– سۇراپىل سوعىس ادامزاتقا قۇلاق ەستىمەگەن, كوز كورمەگەن قيىندىقتاردى الىپ كەلدى. سونىڭ سالدارىنان 50 ميلليون ادام قازا تاپتى. ال ونىڭ 27 ميلليونى ەلىن, جەرىن قورعاعان كەڭەس وداعىنىڭ باتىرلارى ەدى. ال قازاق ەلىنەن ءبىر ميلليوننان استام ادام سوعىسقا اتتاندى. ياعني سول كەزدەگى قازاقستان حالقىنىڭ 25 پايىزى قاتىستى. ونىڭ 600 مىڭى سوعىس دالاسىندا شەيىت بولدى. مۇنداي كورسەتكىش كەڭەس وداعىنىڭ قۇرامىنداعى رەسپۋبليكالاردىڭ ەشقايسىسىندا بولماعان, – دەپ ەسكە الدى ومىرزاق وزعانباي.
ءسوز اراسىندا ول ەڭبەك ارمياسىندا 700 مىڭ قازاقستاندىق بولعانىن ايتىپ بەردى. بۇدان بولەك قاسىم قايسەنوۆپەن تالاي رەت داستارقانداس بولعانىن تىلگە تيەك ەتە وتىرىپ, ءوز اۋزىنان ەستىگەن قىزىقتى اڭگىمەلەرىمەن ءبولىستى.
جيىن بارىسىندا ءسوز العان ۇلتتىق مۋزەي ديرەكتورىنىڭ ورىنباسارى مارال بالتىشەۆ سول كەزەڭدەگى جۇرتتىڭ قايعىدان قان جۇتقان كۇندەرى, وتان ءۇشىن وت كەشىپ, جانىن بەرگەن باتىرلاردىڭ ەرلىگى ءبىزدىڭ دە, كەلەر ۇرپاقتىڭ دا ماڭگىلىك جادىندا بولاتىنىن ايتتى.
– ۇلى جەڭىسكە قول جەتكىزگەن قازاق جاۋىنگەرلەرى بولاتىن. ولار قاسىم قايسەنوۆ, باۋىرجان مومىش ۇلى, رەيحستاگقا العاش بولىپ تۋ تىككەن راقىمجان قوشقارباەۆ سەكىلدى باتىرلار ەدى. پارتيزان قاسىم قايسەنوۆتىڭ تۋعانىنا بيىل 100 جىل تولىپ وتىر. ونىڭ ەڭبەكتەرى مەن ەرلىكتەرىن ناسيحاتتاۋ بارشامىزعا پارىز دەپ بىلەمىن, – دەدى مارال بالتىشەۆ.
جيىن بارىسىندا «دالا ورنەكتەرى» اتتى وتان قورعاۋشىلارعا ارنالعان جانە «سوعىس جىلدارىنداعى قازاقستاندىقتار» دەگەن تاقىرىپتا كىتاپ كورمەسى ۇيىمداستىرىلدى. بۇدان بولەك جاۋىنگەرلەردىڭ مەدالدارى, قارۋلارى, ۇستاعان زاتتارى جەكە كورمە رەتىندە تانىستىرىلدى.
ايان ءابدۋالي,
«ەگەمەن قازاقستان»
