1941-1945 جىلدارى ۇلى وتان سوعىسىنىڭ مايداندارىندا ءبىزدىڭ وتانداستارىمىزدىڭ جانقيارلىق ەرلىگى مەن قاجىرلى ەڭبەگى مەملەكەتىمىزدىڭ دامۋىنىڭ, ونىڭ گۇلدەنۋى مەن قاۋىپسىزدىگىنىڭ نىق ىرگەتاسىن قالىپتاستىردى. داڭقتى باتىرلارىمىز, ونىڭ ىشىندە ءبىزدىڭ حالقىمىزدىڭ باتىر قىزدارى ءاليا مولداعۇلوۆانىڭ, مانشۇك مامەتوۆانىڭ, حيۋاز دوسپانوۆانىڭ ەسىمدەرى قازاقستاندىقتاردىڭ ەسىندە جانە الەم تاريحىنىڭ بەتتەرىندە ماڭگىلىك قالادى.
قازاقستان پرەزيدەنتى نۇرسۇلتان نازارباەۆتىڭ سارابدال ساياساتىنىڭ ارقاسىندا ايەلدەر مەملەكەتتىك بيلىكتىڭ جوعارى ورگاندارىندا جاۋاپتى ورىنداردا, ءبىزدىڭ تىنىس-تىرشىلىگىمىزدىڭ ءارتۇرلى سالالارىندا تابىستى ەڭبەك ەتۋدە, قازاقستاندىق ارميانىڭ قاتارىندا دا اسكەري قىزمەت اتقارۋدا.
XXI عاسىردا «ايەل – جاۋىنگەر», «ايەل – وفيتسەر» نەمەسە «ايەل – سارباز» دەگەن تۇسىنىكتەر ەشكىمدى تاڭعالدىرمايدى, تەك قانا قىزىعۋشىلىق پەن ماقتانىش سەزىمدەرىن تۋدىرادى.
بولمىسىنان نازىك ايەلدەر قاۋىمى بۇگىندە قارۋلى كۇشتەر قاتارىندا كوپتەپ سانالادى, الدارىنا قويىلعان مىندەتتەردى ويداعىداي ورىنداپ ءجۇر جانە اسكەري ماماندىقتى مەڭگەرۋ ارقىلى اسكەري مانساپتى تابىستى قۇرۋ پەرسپەكتيۆاسىنا يە بولدى.
بۇگىن وتانىمىزدىڭ قورعانىسىندا سايىپقىران جىگىتتەرمەن قاتار بارلاۋشى, دەسانتشى, ۇشقىش, ءپاراشيۋتشى, بايلانىسشى قىزدار تۇر. ولاردىڭ كوپشىلىگى ءۇشىن كامۋفلياج, پوليگون جانە اتىس – كۇندەلىكتى ءسىڭىستى ۇعىم. قازىر 7900-دەن استام ايەل اسكەري قىزمەتشى ءارتۇرلى اسكەري گارنيزونداردا قىزمەت وتكەرۋدە.
ماسەلەن, قازاقستان رەسپۋبليكاسىنىڭ قارۋلى كۇشتەرىندە العاشقى رەت اعا ۇشقىش – اۆياتسيالىق ەسكادريليا اۆياتسيالىق بۋىنىنىڭ نۇسقاۋشىسى لاۋازىمىنا لەيتەنانت اردانا بوتاي تاعايىندالدى, ول جاۋىنگەرلىك ۇشاقتى كاسىبي تۇردە باسقارۋدا حاس شەبەردىڭ ءوزى.
اسكەري-تەڭىز كۇشتەرىندە جاۋىنگەرلىك قۇربىلار – باس ستارشينا جانار ىبىراەۆا جانە اعا ماتروس داريا كيريچەنكولار اسكەري قىزمەتتى ەرلەردەن قالىسپاي اتقارىپ, اسكەري كورابل ەكيپاجىنىڭ قۇرامىندا تاپسىرمالاردى مۇلتىكسىز ورىندايتىندىعىمەن ەرەكشەلەنەدى.
ايەل اسكەري قىزمەتشىلەردىڭ الەمدىك دەڭگەيدە قازاقستاننىڭ ءيميدجى مەن بەدەلىن نىعايتۋعا قوسقان ۇلەستەرىن دە اتاپ وتكەن ءجون. جىل سايىن ءبىزدىڭ ارميامىزدىڭ نازىك وكىلدەرى ەرلەرمەن قاتار ءارتۇرلى حالىقارالىق جارىستار مەن وقۋ-جاتتىعۋلارعا بەلسەندى تۇردە قاتىسۋدا.
وسىلايشا 2017 جىلى «وڭتۇستىك» وڭىرلىك قولباسشىلىعى 66597 اسكەري ءبولىمىنىڭ ەفرەيتورى شامشىراق سەرجانوۆا «دوستاستىق جاۋىنگەرى» دارەجەسىنە يە بولدى جانە مەملەكەتتىك ناگرادا – «جاۋىنگەرلىك ەرلىگى ءۇشىن» مەدالىمەن ناگرادتالدى.
مايور ولگا رىپاكوۆا – قارۋلى كۇشتەرىمىزدىڭ ماقتانىشى. جەڭىل اتلەتيكادان وليمپيادا چەمپيونى, ءۇش وردەننىڭ يەگەرى.
سونداي-اق اسكەري ايەلدەر قازاقستاندىق جاستاردى پاتريوتيزم جانە وتانعا سۇيىسپەنشىلىك رۋحىندا تاربيەلەۋ ىسىنە باعا جەتپەس ۇلەس قوسۋدا.
ورتالىق انسامبل باستىعىنىڭ ورىنباسارى – قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعىنىڭ باس بالەتمەيستەرى يانا چيگاركوۆانىڭ كاسىبي شەبەرلىگى مەن جانقيارلىق ەڭبەگى «جاس سارباز» قوزعالىسىنا جانە ورتالىق بازاسىندا «ەركە» بالالار كوركەمونەر توبىنىڭ جۇمىس ىستەۋىنە باستاما بولدى.
اسكەري ۇجىمداردا اسكەري قىزمەتشىلەردىڭ ماسەلەلەرىن شەشۋدە, الەۋمەتتىك, پسيحولوگيالىق-پەداگوگيكالىق جۇمىستى ۇيىمداستىرۋ جانە جۇرگىزۋ, مورالدىق-پسيحولوگيالىق احۋالدى جاقسارتۋداعى نەگىزگى مىندەتتەر اسكەري بولىمدەر كومانديرلەرىنىڭ ايەلدەرى باسقاراتىن ايەلدەر كەڭەستەرىنە تيەسىلى.
ءاربىر اسكەري بولىمشەدە جاۋىنگەرلىك رۋحتى قولداۋ, تۇراقتى مورالدىق-پسيحولوگيالىق احۋالدى ورناتۋ جانە وتباسى ينستيتۋتىن نىعايتۋ – بۇل مەملەكەتتىڭ اسكەري قاۋىپسىزدىگىن قامتاماسىز ەتۋگە ايەلدەر قاۋىمى وكىلدەرىنىڭ قوسقان زور ۇلەسى.
قازاقستاننىڭ ايەل اسكەري قىزمەتشىلەرى رۋحىمەن عانا مىقتى ەمەس, ولاردىڭ ىقىلاستىلىق, قايىرىمدىلىق جانە كىشىپەيىلدىلىك سياقتى ايەل تابيعاتىنا ءتان قاسيەتتەرى اسكەري بولىمشەلەردىڭ كومانديرلەرىنە جەكە قۇرامنىڭ اراسىندا بىرلىك پەن سالاماتتى احۋالدى ساقتاۋدا كومەكتەسە وتىرىپ, كەز كەلگەن جاعدايدا ارقاشان جول تابۋعا مۇمكىندىك بەرەدى.
اسكەري قىزمەت وتكەرۋ جاعدايلارى قانشالىقتى قيىن بولسا دا, ايەلدەر كەز كەلگەن جاعدايدا ءوزىنىڭ سۇيكىمدىلىگى مەن اسەرلىلىگىن ساقتاپ قالادى.
بۇگىندە يىعىنا پوگون تاققان ايەلدەر اسكەري بورىشىن ەرلەرمەن قاتار ورىندايتىن جانە ەل ىرگەسىنە بەرىك قورعان بولا الاتىن, سونىمەن قاتار وتباسى قۇندىلىقتارىن تۋ ەتەتىن بىلىكتى اسكەري قىزمەتكەرلەر ساناتىندا.
تالعات مۇحتاروۆ,
قورعانىس ءمينيسترىنىڭ ورىنباسارى, گەنەرال-لەيتەنانت
