بۇعان دەيىن بالەت مەكتەبى بولماعان اقتاۋدا بۇل ءىستى جاس كاسىپكەر قولعا الدى. جاس كاسىپكەر امانجول جاڭابايدىڭ ايتۋىنشا, جوبا «بيزنەستىڭ جول كارتاسى - 2020» مەملەكەتتىك باعدارلاماسى اياسىندا «دامۋ» كاسىپكەرلىكتى دامىتۋ قورىنىڭ قولداۋىمەن مەملەكەتتىك-جەكە مەنشىك ارىپتەستىك اياسىندا جۇزەگە اسىرىلىپ وتىر. ءۇش سپورت زالدى تۇرعىزۋ ءۇشىن 360 ملن. تەڭگە جۇمسالعان.
-اقتاۋ قالاسىندا سپورتتىق گيمناستيكا سوڭعى رەت وسىدان 25 جىل بۇرىن بولعان. ەندى اكادەميانىڭ اشىلۋىمەن ءبىز بۇل ماسەلەنىڭ شەشىمىن تاۋىپ وتىرمىز, سەبەبى جاستار اراسىندا گيمناستيكاعا دەگەن قىزىعۋشىلىق جوعارى. ال بالەت بولسا ءبىزدىڭ قالامىزدا بۇرىن مۇلدەم بولماعان. نەگىزىنەن, مەن بۇرىن دامىماي قالعان سپورت تۇرلەرىن دامىتۋدى قولعا الۋ قاجەت دەپ ەسەپتەيمىن. ماسەلەن دجيۋ-دجيتسۋ, ەركىن كۇرەس MMA سپورت تۇرلەرى بويىنشا قىسقا مەرزىمدە ناتيجە شىعارۋ ءۇشىن داعىستان جانە برازيليا ەلىنەن تاجىريبەلى باپكەرلەردى الدىرتىپ وتىرمىز. ولار قازىر اقتاۋدا تۇرىپ جاتىر جانە بولاشاق چەمپيونداردى دايىنداۋدا, دەيدى كاسىپكەر امانجول جاڭاباي.
جەتىم بالالار مەن از قامتىلعان وتباسىلاردان شىققان بالالارعا ءۇش سپورت زالدا تەگىن قاتىسۋ مۇمكىندىگى قاراستىرىلعان.
امانجول جاڭاباي مۇنىمەن توقتاپ قالعىسى جوق. ول مۇنداي سپورتتىق اكادەميالاردى جاڭاوزەن قالاسى مەن ماڭعىستاۋ اۋدانىندا اشۋ جونىندەگى ۇسىنىسپەن شىققان. الايدا, قالالىق جانە اۋداندىق اكىمدىكتەردەن ءالى جاۋاپ جوق. بىراق, كاسىپكەر ءوزىنىڭ جوباسى جەرگىلىكتى اتقارۋشى ورگاندار تاراپىنان قولداۋ تاباتىنىنا سەنىمدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
