قىزىلوردادا وتەتىن 73-ءشى مەملەكەتارالىق كوميسسيا وتىرىسىنا قاتىسۋ ءۇشىن وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامراەۆ, قر اۋىل شارۋاشىلىق ۆيتسە-ءمينيسترى ەرلان نىسانباەۆ, تاجىكستان رەسپۋبليكاسىنىڭ ەنەرگەتيكا جانە سۋ رەسۋرستارى ءمينيسترىنىڭ ءبىرىنشى ورىنباسارى سۋلتون راحيمزودا جانە تۇرىكمەنستان سۋ جانە اۋىل شارۋاشىلىعى ءمينيسترىنىڭ ورىنباسارى ماگتىمگۋلى بايرامدۋردىەۆ جۇمىس ساپارمەن كەلدى.
مەملەكەتارالىق ۇيلەستىرۋشى سۋ شارۋاشىلىعى كوميسسياسى 1992 جىلدا ورتالىق ازيا ەلدەرىنىڭ ارال تەڭىزى باسسەينىندەگى سۋ شارۋاشىلىعى ماسەلەلەرى بويىنشا شەشىم قابىلداۋ الاڭى رەتىندە قۇرىلدى.
وبلىس اكىمىنىڭ ورىنباسارى سەرىك قوجانيازوۆ اتاپ وتكەندەي, بيىل بولجام بويىنشا اياق سۋ از بولادى, سوندىقتان سۋ رەسۋرستارىن مەملەكەتتەر اراسىندا ۇلەستىرۋ ماسەلەسى وتە ماڭىزدى, اسىرەسە سىرداريا وزەنىنىڭ تومەنگى اعىمىندا ورنالاسقان قىزىلوردا وبلىسى ءۇشىن وزەكتى بولماق.
كوميسسيا وتىرىسىندا قاتىسۋشىلار 2017-2018 جج. سىرداريا مەن ءامۋداريا باسسەيندەرىندەگى ۆەگەتاتسياارالىق كەزەڭ قورىتىندىسىن تالقىلاپ, 2018 ج. ۆەگەتاتسيالىق كەزەڭدە سۋ الۋ ليميتتەرى مەن سۋ قويمالارىنىڭ جۇمىس كەستەسىن بەكىتتى, سونداي-اق, «ارال تەڭىزى باسسەينىنىڭ سۋ رەسۋرستارىن كەشەندى باسقارۋ پايدالانۋ جانە قورعاۋىنا اقپاراتتىق-تالداۋ قامتاماسىز ەتۋ جانە قازاقستان, قىرعىزستان, تاجىكستان, تۇرىكمەنستان مەن وزبەكستان اراسىنداعى اقپارات الماسۋدى ۇيىمداستىرۋ جونىندە» كەلىسىم جوباسى بەكىتىلدى. ودان بولەك, قاتىسۋشىلار مەملەكەتارالىق كوميسسيانىڭ جۇمىسىن ودان ءارى كۇشەيتۋ ماسەلەلەرىن تالقىلاپ, كوميسسيانىڭ 74-ءشى وتىرىسىن وتكىزۋ باعدارلاماسى مەن ورنىن كەلىستى.
تۇستەن كەيىن وتىرىس قاتىسۋشىلارى قىزىلوردا وبلىسىنىڭ اكىمى ق.كوشەرباەۆپەن كەزدەستى. كەزدەسۋ بارىسىندا ايماق باسشىسى كوميسسيا جۇمىسىنىڭ كورشى مەملەكەتتەر اراسىندا سۋ شارۋاشىلىعى ماسەلەلەرىن رەتتەۋدەگى ماڭىزدىلىعىن اتاپ ءوتتى.
ەستەرىڭىزگە سالا كەتەيىك, بيىل حالىقارالىق ارال تەڭىزىن قۇتقارۋ قورىنىڭ قۇرىلعانىنا 25 جىل بولدى. 1993 ج. 25 ناۋرىز كۇنى مەملەكەت باسشىلارىنىڭ قىزىلوردا قالاسىندا وتكەن سامميتىندە قوردى قۇرۋ جونىندە شەشىم قابىلداندى. جالپى العاندا, ورتالىق ازيا ەلدەرىنىڭ سۋ رەسۋرستارىن بىرلەسە باسقارۋ جونىندەگى ارىپتەستىگىنە بيىل تۋرا 100 جىل بولماق, ويتكەنى 17 ماۋسىم كۇنى «تۇركۆودحوز» - بۇرىن قۇرامىندا كوميسسيا مۇشەلەرى بولعان تۇركىستان رەسپۋبليكاسىنىڭ سۋ شارۋاشىلىعى باسقارماسىنىڭ قۇرىلۋىنا 100 جىل بولادى.
«ارال تەڭىزى ماسەلەسى باياعىدا جەكە ءبىر ايماق نەمەسە ەلدىڭ شەڭبەرىنەن شىعىپ, بۇكىلالەمدىك دەڭگەيدەگى ماسەلە بولدى. جاعدايدى جاقسارتۋ ءۇشىن سۋ رەسۋرستارىن ءتيىمدى پايدالانىپ, سۋ الۋ ليميتتەرىن ساقتاۋ بويىنشا جۇمىستى ءارى قاراي كۇشەيتۋ كەرەك. وسى ماسەلەلەر 15 ناۋرىز كۇنى استانا قالاسىندا مەملەكەت باسشىلاردىڭ كەزدەسۋىندە تالقىلاندى. ال تامىز ايىندا اشحابادتا حالىقارالىق ارال تەڭىزىن قۇتقارۋ قورىنا قاتىسۋشى ەلدەرىنىڭ مەملەكەت باسشىلارى كەڭەسىنىڭ وتىرىسى جوسپارلانۋدا», - دەپ اتاپ وتكەن وبلىس اكىمى مەملەكەت باسشىلارىنىڭ وتىرىسىنا وراي كوميسسيا جۇمىسىن ءارى قاراي جەتىلدىرۋ بويىنشا ۇسىنىستاردى ازىرلەۋ جونىندە ۇسىنىس ايتتى.
كەزدەسۋگە قاتىسۋشىلار كوميسسيا وتىرىسىنىڭ جوعارى دەڭگەيدە ۇيىمداستىرىلعانىن جانە ونىڭ جۇمىسىنا بارىنشا ىقپالداستىق جاسالعانىن اتاپ ءوتتى. ماسەلەن, وزبەكستان رەسپۋبليكاسىنىڭ سۋ رەسۋرستارى ءمينيسترى شاۆكات حامراەۆ سۋدى پايدالانۋ ماسەلەلەرى ورتالىق ازيا ەلدەرى ءۇشىن اسا ماڭىزدى ەكەنىن جانە ءوز تاراپىنان وسى سالادا ارىپتەستىك قارىم-قاتىناس ورناتۋعا دايىن ەكەنىن ايتتى.
مەملەكەتارالىق كوميسسيانىڭ 74 وتىرىسى اشحاباد قالاسىندا ءۇ.ج. قىركۇيەك ايىندا وتكىزىلەدى دەپ جوسپارلانۋدا.
