ءوڭىر باسشىسى قوستاناي وبلىسىندا اۋىل شارۋاشىلىعىنا مەحانيزاتور, جۇرگىزۋشىلەر, اۋىلدارعا مۇعالىمدەر مەن دارىگەرلەر, باسقا دا ماماندىق يەلەرى جەتىسپەيتىندىگىن ايتقان. قازىر وڭىردە 952 جۇمىس ورنى ءوز يەسىن كۇتىپ تۇرعانىن جەتكىزگەن.
ارحيمەد بەگەجان ۇلى مالىمدەگەندەي, قونىس اۋدارۋشىلارعا قوستاناي وڭىرىندە مەملەكەت تاراپىنان بارلىق جاعداي جاسالادى. سونىمەن قاتار قوستاناي قالاسىنىڭ ىرگەسىندەگى ميچۋرين جانە گلازۋنوۆ ەلدى مەكەندەرىندە كاسىپكەرلەر كەلگەندەرگە تۇراقتى جۇمىس پەن باسپانا بەرۋگە دايار وتىر. «بىزدە بارلىعى 1700 دەن اسا جۇمىس ورنى بار. سونىڭ 20 پايىزى اۋىلدا, 17 پايىزى قۇرىلىستا, 13 پايىزى وندىرىستە مامانداردى كۇتەدى. مەن قوستاناي وبلىسىنا كوشكىسى كەلەتىن, سوندا جۇمىس ىستەپ, بولاشاقتا سول ءوڭىردى مەكەن ەتكىسى كەەلتىندەرمەن كەزدەسۋ ءۇشىن كەلدىم. باسپانا جونىنەن ەشقانداي قيىندىق بولمايتىنىن ايتقىم كەلدى» دەدى ارحيمەد مۇحامبەتوۆ.
سوندا كاسىپ اشام دەگەندەرگە شاعىن نەسيەلەر بەرىلەتىنىن, وبلىستا بۇل ءۇشىن 1 ميلليارد تەڭگە بولىنگەنىن دە ايتتى ءوڭىر باسشىسى. قوستانايعا قونىس اۋدارعان وتباسىلارىنىڭ ءار مۇشەسىنە مەملەكەتتەن 84 175 تەڭگە بولىنەدى, جىل بويى جالعا العان ءۇيىنىڭ اقىسى تولەنەدى.
بيىل قوستاناي وبلىسىنا ەلىمىزدىڭ وڭتۇستىك جانە باتىس, شىعىس وبلىستارىنان 272 وتباسى قونىس اۋداراتىن بولادى. بۇل بۇرناعى جىلدارعا قاارعاندا 10 ەسە كوپ. 15 وتباسى قازىردىڭ وزىندە كەلىپ, قونىستانىپ جاتىر.
ءنازيرا جارىمبەت,
«ەگەمەن قازاقستان»
قوستاناي
