ءمادريدتىڭ «رەال» كلۋبىنىڭ باس جاتتىقتىرۋشىسى زينەدين زيدان «ليۆەرپۋل» شابۋىلشىسى موحامەد سالاحتى ساتىپ العىسى كەلەتىنىن ايتتى.
AS باسىلىمنىڭ حابارلاۋىنشا, 25 جاستاعى فۋتبولشىنى ساتىپ الۋ ءۇشىن كوماندانىڭ بارلىق وكىلى ءوز كەلىسىمدەرىن بەرگەن. كلۋب باسشىلىعىنان باستاپ, جاتتىقتىرۋشىلار شتابى مەن فۋتبولشىلارعا دەيىن. وسىلايشا, مىسىرلىق فۋتبولشى «رەالدىڭ» جازداعى نەگىزگى ترانسفەرى بولماق.
ينفانتينو كىشى الەم چەمپيوناتىن ۇيىمداستىرماق
فيفا پرەزيدەنتى دجانني ينفانتينو حالىقارالىق فۋتبول تۋرنيرلەرىنە تۇبەگەيلى مودەرنيزاتسيا جاساۋدى ويلاستىرۋدا.
Reuters اقپارات اگەنتتىگىنىڭ حابارلاۋىنشا, ينفانتينونىڭ جوسپارىندا كونفەدەراتسيالار كۋبوگى جوق. ول بۇل ءتۋرنيردىڭ ورنىنا ءار 2 جىلدا ءبىر رەت, ياعني تاق جىلدارى 8 قۇراما قاتىساتىن كىشى الەم چەمپيوناتىن وتكىزۋدى كوزدەپ وتىر. ءتۋرنيردىڭ اتى «سەگىزدىك فينال» دەپ اتالىپ, العاشقى ويىندى 2021 جىلدىڭ قازان-قاراشا ايىندا وتكىزۋ جوسپارلانۋدا.
ينفانتينونىڭ «سەگىزدىك فينال» ءتۋرنيرى بويىنشا ۇسىنىسىنا فيفا اقىلداستار القاسى كەلىسىمدەرىن بەرۋى كەرەك.
فلويدتىڭ رەكوردىن قايتالادى
تايلاندتىق بوكسشى ۆانحەنگ مەنايوتين كاسىپقوي بوكستاعى 50-ءشى جەكپە-جەگىندە جەڭىسكە جەتىپ, امەريكالىق بوكسشى كىشى فلويد مەيۆەزەردىڭ رەكوردىن قايتالادى.
مەنايوتين كاسىپقوي بوكستىڭ ەڭ جەڭىل سالماعىندا (47,6 كگ) WBC بەلدىگى بويىنشا الەم چەمپيونى. ول 50-ءشى كەزدەسۋىن WBC بەلبەۋىنە نەگىزگى ۇمىتكەر لەروي ەستراداعا قارسى وتكىزىپ, بەسىنشى راۋندتا نوكاۋتپەن جەڭدى. ءسويتىپ ول 50 كەزدەسۋىندە جەڭىسكە جەتىپ, مەيۆەزەردىڭ رەكوردىن قايتالادى.
ەستەرىڭىزدە بولسا, مەيۆەزەر 2017 جىلدىڭ تامىز ايىندا UFC وكىلى كونور ماكگرەگورعا قارسى ءوزىنىڭ 50-ءشى كەزدەسۋىن وتكىزىپ, تەحنيكالىق نوكاۋتپەن باسىم تۇسكەن-ءدى.
