قوس ماتچتان تۇراتىن تەكەتىرەستە جالپى بارلىعى 13 گول سوعىلدى. بۇل باياعى «باۆاريا» مەن «سپورتينگتىڭ» رەكوردىمەن تەڭ. بيىلعى چەمپيوندار ليگاسىندا ءبىرىنشى رەت جەڭىلگەن «ليۆەرپۋل» «وليمپيكو» ستاديونىندا قاتتى ءبىر قيىندىق كوردى دەپ ايتا المايمىز. ءبىرىنشى تايمدا 2 گول سوعىپ تاستاپ, تورەشىنىڭ اقتىق ىسقىرىعىن كۇتىپ ءجۇردى. وسىلايشا ولار 2007 جىلدان بەرى فينالعا ءبىرىنشى رەت شىعىپ وتىر. «روما» ساپىنداعى فۋتبولشىلار تاعى ءبىر ەرلىك جاساعىسى كەلىپ ەدى, ۋاقىت شىركىن جەتپەدى. دەگەنمەن سوڭعى 5 ماتچ قاتارىنان گول سوققان ەدين دجەكونىڭ تەگەۋرىنى كۇللى جانكۇيەرلەردىڭ ريزاشىلىعىن تۋدىردى.
فيناليستەر انىقتالىپ, بولار ءىس بولعاننان سوڭ كىم جەڭىمپاز اتانۋى ىقتيمال دەگەن سۇراقتىڭ توڭىرەگىندە تەبىرەنىپ كورسەك. «ليۆەرپۋل» بيىلعى چەمپيوندار ليگاسىندا 46 گول سوعىپتى. بۇل بريتانيالىقتاردىڭ شابۋىلى شاڭ جۇقتىرمايدى دەگەن ءسوز. فيرمينو مەن سالاح 10 گولدان سوقسا, سوڭعى 8 ويىندا ساديو مانە 9 گول توعىتتى.
«رەالدىڭ» دا كورسەتكىشتەرى جامان ەمەس. وزدەرىڭىز بىلەتىندەي, بۇل كلۋب بيىلعى باسەكەدە بىرنەشە رەت رەكوردتاردىڭ مۇرتىن بۇزدى. ەڭ كوپ جەڭىسكە جەتكەن, قاتارىنان فينالعا شىققان دەگەن سەكىلدى اتاقتارى جەتىپ جاتىر. ال ءبىر كريشتيانۋ رونالدۋدىڭ ءوزى جەكەلەي سىندا بىرنەشە رەت اتى اڭىزعا اينالعان فۋتبولشىلاردىڭ جەتىستىكتەرىنەن اسىپ ءتۇستى. بيىلدىڭ وزىندە پورتۋگال فۋتبولشىسى جالعىز ءجۇرىپ 15 گول سوقتى. مادريدتىك كلۋب فينالعا دەيىن 12 كەزدەسۋ وتكىزدى. ونىڭ 8-ىندە جەڭىسكە جەتىپ, 2 ويىندى تەڭ اياقتاپ, تەك 2-ەۋىندە عانا جەڭىلدى. 30 گول سوعىپ, قاقپالارىنا 15 دوپ جىبەردى.
«ليۆەرپۋل» دە فينالعا دەيىن 12 كەزدەسۋ وتكىزدى. 7 ويىندا جەڭىس تويلاپ, 4 ماتچتا تەڭ ءتۇسىپ, 1 كەزدەسۋدە جەڭىلىپ قالدى. توپتىق كەزەڭنەن باستاپ ساناعاندا 40 گول سوعىپ, قاقپاسىنا نەبارى 13 دوپ قانا جىبەرگەن. بۇل جاعىنان, ارينە «ليۆەرپۋلدىڭ» باسىمدىعى سەزىلەدى.
ودان بولەك, قوس كوماندانىڭ وسى تۋرنيردەگى ءبىر-بىرىمەن كەزدەسكەندەگى جاعدايلارى شە؟ بۇل تۇرعىدا دا اعىلشىنداردىڭ باسىمدىعى بار. كورولدىك كلۋب پەن «مەرسيسايدتىقتار» 5 مارتە كەزدەسىپ, سونىڭ ۇشەۋىندە «ليۆەرپۋل» جەڭىسكە جەتكەن. قالعان ەكەۋىن يسپاندار ۇتتى. ال 2008/2009 جىلعى چەمپيوندار ليگاسىنىڭ 1/8 فينالىندا رافاەل بەنيتەس شاكىرتتەرى «رەالدى» «بەرنابەۋدە» 1:0 (بەنايۋن), «ەنفيلدتە» 4:0 (توررەس 16, دجەررارد 28, 47, دوسسەنا 88) ەسەبىمەن جەڭدى. الايدا 2014/2015 جىلعى ماۋسىمدا «رەال» «ليۆەرپۋلدى» ءوز الاڭىندا 1:0 (بەنزەما), «ەنفيلدتە» 3:0 (رونالدۋ 23, بەنزەما 30, 41) قىلىپ, ەسەسىن قايتاردى.
قوس كوماندانىڭ دا وزىندىك ەرەكشەلىكتەرى بار. دەي تۇرعانىمەن, جالپىلاما العاندا «ليۆەرپۋلدىڭ» شابۋىلى «رەالدىكىنەن» ءسال مىقتىراق بولعانىمەن, «رەالدىڭ» دا قورعانىسى «ليۆەرپۋلدىكىنەن» الدەقايدا مىقتىراق. ءتۇرلى سالىستىرمالى جاعدايلاردى كەلتىرگەنىمەن, بارلىعىنا نۇكتە قوياتىن ءبىر عانا ماتچ. ول 26 مامىر كۇنى كيەۆتە وتەتىن فينال.
ەرمۇحامەد ماۋلەن,
«ەگەمەن قازاقستان»
