بيىلعى كوكتەمنىڭ ەڭ ماڭىزدى جەكپە-جەگى مەكسيكالىق ساۋل الۆارەس پەن وتانداسىمىز گەننادي گولوۆكين اراسىندا ءوتۋى كەرەك بولاتىن. الايدا مەكسيكالىق بوكسشى كلەنبۋتەرولمەن ۇستالىپ, نەۆادا اتلەتيكالىق كوميسسياسى ونى تىيىم سالىنعان ءدارى قولداندى دەپ, جارتى جىلعا بوكستان شەتتەتتى. بەسىنشى مامىرداعى گولوۆكين-الۆارەس كەزدەسۋى كەيىنگە شەگەرىلگەن سوڭ, گولوۆكين جانكۇيەرلەرىنە ۋادە ەتكەندەي ءدال سول كۇنى جەكپە-جەك وتكىزۋگە نيەتتى بولدى. ءسويتىپ گەننادي 5 مامىر كۇنگى ايقاسقا وزىنە قارسىلاس ىزدەي باستادى. وتانداسىمىزعا قارسى شىعۋعا دەمەتريۋس اندرادە, دجەرمالل چارلو, سەرگەي دەرەۆيانچەنكو مەن گارري و’سالليۆان سىندى بوكسشىلار دايىن ەكەندىكتەرىن جەتكىزگەنىمەن, ولارعا ۇسىنعان سىياقى وتە از مولشەردە بولعاندىقتان جانە تاعى باسقا سەبەپتەرمەن بىرقاتارى ايقاستان باس تارتتى.
ال گەننادي گولوۆكيننىڭ IBF بەلبەۋىنە نەگىزگى ۇمىتكەر بوكسشى سەرگەي دەرەۆيانچەنكونىڭ كومانداسى گولوۆكيننىڭ پروموۋتەرىنە بىرنەشە رەت جەكپە-جەك وتكىزۋگە ۇسىنىسپەن شىققانىمەن, ونى توم لەففلەر قايتارىپ تاستادى. سەبەبى ءدال قازىرگى جاعدايدا گولوۆكين ءۇشىن دەرەۆيانچەنكو قارجىلىق جاعىنان, كورەرمەن تارتۋ مەن بيلەت ساتۋ جاعىنان جانە تاعى باسقا تالاپتار بويىنشا وتە ءتيىمسىز قارسىلاس.
نەگىزى گولوۆكين ءاۋ باستا الۆارەسپەن جەكپە-جەك وتكىزەتىن بولىپ كەلىسكەن سوڭ, بۇكىل دايىندىعى مەن جوسپارىن سوعان قاراي قۇرعان بولاتىن. ال قىسقا مەرزىم ىشىندە گولوۆكينگە قايتادان جوسپار قۇرۋ ءتيىمسىز ەدى. سوندىقتان ول جۇدىرىقتاسۋ ءستيلى مەكسيكالىق بوكسشىعا ساي كەلەتىن قارسىلاس ىزدەدى. ىزدەگەنگە سۇراعان دەگەندەي, گولوۆكينگە مارتيروسيان تابىلا قالدى جانە ونىڭ شارتىنا دا كوندى. سونداي-اق گولوۆكين ءۇشىن ۇمىتكەرلەردىڭ ىشىندەگى ەڭ قاۋىپسىزى مارتيروسيان بولدى. ۆانەس 2016 جىلى ەريسلاندي لارادان جەڭىلگەننەن كەيىن ەكى جىلداي جەكپە-جەككە شىقپاعان جانە ورتا سالماقتا ەشقاشان جۇدىرىقتاسىپ كورمەگەن.
قالاي قاراساق تا, 5 مامىرعا جوسپارلانعان ۇلكەن جەكپە-جەكتىڭ ورنىنا توم لەففلەر گولوۆكينگە كەزدەسۋ ۇيىمداستىرىپ بەردى. دەگەنمەن گولوۆكين ءبارىن شەگەرىپ قويىپ, الداعى الۆارەس, سوندەرس نەمەسە دەرەۆيانچەنكومەن ۇلكەن جەكپە-جەك دايىنداۋى كەرەك ەدى. جالپى, 5 مامىردا ءبىزدى الدامشى ايقاس كۇتىپ تۇر. سەبەبى ەكى بوكسشى دا جاقسى اقشا تابادى جانە ەكەۋى دە تاۋەكەلگە بارمايدى. بىلايشا ايتقاندا, بالىقسىز جەردە مارتيروسيان دا شورتان بولا الادى.
جانكۇيەرلەر اراسىندا «گولوۆكين نەگە ءدال بۇل داتادا جەكپە-جەك وتكىزبەكشى؟» دەگەن زاڭدى ساۋال تۋىندايتىنى انىق. بۇل سۇراقتىڭ جاۋابى مىناداي: 1862 جىلى 5 مامىردا پۋەبلو تۇبىندە مەكسيكانىڭ 4000 اسكەرى 6500 ادامى بار فرانتسۋز اسكەرىنە قارسى تۇرىپ, جەڭىسكە جەتكەن-تۇعىن. گولوۆكينگە دە وسى كۇنى جەكپە-جەك وتكىزۋ ءۇشىن مەكسيكالىق بوكسشى كەرەك بولدى. دەگەنمەن جانكۇيەرلەردىڭ دە, ۇيىمداردىڭ دا كوڭىلىنەن شىعاتىن مەكسيكالىق بوكسشى تابىلماعان سوڭ, بۇل جولى مەكسيكالىقتىڭ رولىندە گولوۆكين, ال ۆانەس مارتيروسيان كۇتپەگەن جەردەن باس سالعان فرانتسۋز اسكەرىنىڭ رولىندە بولماق. جانكۇيەرلەردىڭ گولوۆكيننەن كۇتەتىنى دە وسى – اياۋسىز جەكپە-جەك, افيشادا جازىلعانداي «mexicanstyle».
جەكپە-جەك قارساڭىندا الەمدىك جانە وتاندىق بوكس ساراپشىلارى مەن ماماندار ءوز پىكىرلەرىن ايتىپ جاتىر. قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكونىڭ ايتۋىنشا, گولوۆكين كۇزگە دەيىن رينگكە ءبىر رەت بولسىن شىعىپ, شارشى الاڭعا بويىن ۇيرەتىپ الۋ كەرەك دەيدى.
«بۇل گولوۆكيننىڭ كارەراسىنداعى ورتا دەڭگەيلى بوكسشىنىڭ ءبىرى. دەگەنمەن گولوۆكيننىڭ ۇسىنىسىنا كىم كەلىستى, ول سونى تاڭدادى. گەننادي – ورتا سالماقتىڭ چەمپيونى جانە ول كىممەن جۇدىرىقتاساتىنىن ءوزى شەشەدى. ارينە دەرەۆيانچەنكو مارتيروسيانعا قاراعاندا لايىقتى قارسىلاس. بىراق گەننادي تاۋەكەلگە بارعان جوق. ال جەكپە-جەكتى 5 مامىردا وتكىزۋىن دۇرىس شەشىم دەپ قابىلدايمىن. ويتكەنى وعان ءىس جۇزىندە تاجىريبە كەرەك. گولوۆكين بىلتىرعى قىركۇيەكتەن بەرى شارشى الاڭعا شىققان جوق. سوندىقتان ول الداعى كۇزگە دەيىن رينگكە ءبىر رەت بولسىن شىعىپ, شارشى الاڭعا بويىن ۇيرەتۋ كەرەك», دەيدى ول.
ال امەريكالىق بوكس كوممەنتاتورى دجەك ماككافەرري گولوۆكين مارتيروسياندى تاڭداپ, دۇرىس شەشىم قابىلدادى دەيدى. «GGG وتە دۇرىس شەشىم قابىلدادى. ول بارلىق مۇمكىندىگىن ىسكە سالىپ, وزىنە لايىقتى قارسىلاس تاپتى دەپ ويلايمىن. جالپى, «كانەلونىڭ» دوپينگ-داۋىنا ىلىككەنى گولوۆكيننىڭ بۇكىل جوسپارىن جوققا شىعاردى. سوندىقتان ونىڭ قازىرگى تاڭدا كەز كەلگەن قارسىلاستى تاڭداۋىنا قۇقىعى بار».
گولوۆكين مارتيروسيانعا قارسى جەكپە-جەككە بارلىق بەلدىگىن ورتاعا سالىپ وتىر. بۇعان دەيىن حالىقارالىق بوكس فەدەراتسياسى (IBF) وزدەرىنىڭ بەلدىگىن ۆانەسكە قارسى قورعاۋعا قارسىلىق بىلدىرگەن. ۇيىمنىڭ ايتۋىنشا, قازاقستاندىق بوكسشى مىندەتتى قارسىلاس ۋكراينالىق سەرگەي دەرەۆيانچەنكومەن كەزدەسۋى كەرەك بولعان. الايدا گەنناديدىڭ كومانداسى IBF ۇيىمىنان بەلبەۋدى قورعاۋ مەرزىمىن كەيىنگە شەگەرۋگە رۇقسات سۇراپ, اتالعان ۇيىمعا 20 مىڭ دوللار وتەماقى تولەگەن. دەگەنمەن IBF ۋكراينالىق بوكسشىمەن قاعاز جۇزىندەگى كەلىسىمشارت 3 تامىزعا دەيىن جاسالۋى ءتيىس. بۇل شارت ورىندالماعان جاعدايدا گولوۆكين IBF بەلبەۋىنەن ايىرىلىپ قالۋى مۇمكىن.
سونىمەن قاتار گولوۆكين مەن مارتيروسيانعا دۇنيەجۇزىلىك بوكس كەڭەسى (WBC) ارنايى بەلدىك جاساتقان. Bats'il Ajaw Chiapas دەپ اتالاتىن بەلبەۋ رەسمي نۇسقاسى بويىنشا «ناعىز باتىر بەلبەۋى» دەگەن ماعىنانى بىلدىرەدى جانە ول WBC نەگىزىن قالاۋشى, مەكسيكا پرەزيدەنتى ادولفو لوپەس ماتەوستىڭ قۇرمەتىنە ارنالعان.
بۇگىنگە دەيىن گولوۆكين-مارتيروسيان ايقاسىنا التى مىڭعا جۋىق بيلەت ساتىلعان ەكەن. بوكس كەشىنىڭ ەڭ ارزان بيلەتى 53 دوللار بولسا, ەڭ قىمبات بيلەت 767 دوللار كولەمىندە. رەسمي مالىمەت بويىنشا StubHub Center ارەناسىنىڭ سىيىمدىلىعى 8 مىڭ ورىن. دەمەك ءالى دە ەكى مىڭعا جۋىق بيلەت ساتىلىمدا دەگەن ءسوز.
گولوۆكين-مارتيروسيان بوكس كەشىندە ءبىرىنشى جارتىلاي ورتا سالماقتا جۇدىرىقتاساتىن وتانداسىمىز رۋسلان ماديەۆ تە ءوزىنىڭ كەزەكتى كەزدەسۋىن وتكىزەدى. بۇگىنگە دەيىن 11 كەزدەسۋ وتكىزىپ, بارلىعىندا جەڭىسكە جەتكەن ماديەۆ مەكسيكالىق حەسۋس پەرەسپەن ايقاسادى.
پەرەس تە وتە قارىمدى بوكسشى. كاسىپقوي بوكستا 21 جەكپە-جەك وتكىزىپ, 16 قارسىلاسىن مەرزىمىنەن بۇرىن جەڭگەن.
كەشە StubHub Center ارەناسىندا جۇدىرىقتاساتىن بوكسشىلاردىڭ بارلىعى ءباسپاسوز ءماسليحاتىنا قاتىسىپ, جەكپە-جەك الدىنداعى كوز ارباسۋ راسىمىنەن ءوتتى. جەكپە-جەكتى امەريكالىق HBO تەلەارناسى تىكەلەي ەفيردە كورسەتەدى. وكىنىشكە قاراي, قازاقستاندىق جانكۇيەرلەر گولوۆكين مەن مارتيروسياننىڭ قاتىسۋىمەن وتەتىن بوكس كەشىن وتاندىق تەلەارنالاردان كورە الماۋى مۇمكىن. ويتكەنى ەلىمىز بويىنشا بۇكىل ايماققا تارالاتىن, ايقاستى كورسەتەدى-اۋ دەگەن نەگىزگى ءۇش تەلەارنانىڭ باعدارلامالار كەستەسىنەن گولوۆكين-مارتيروسيان كورسەتىلىمىن تابا المادىق.
سونىمەن ەكى بوكسشى ايقاسقا تاس-ءتۇيىن دايىن. ءسىز بەن ءبىز سەكىلدى جانكۇيەرلەرگە ناعىز بوكس كەشىن سىيلاۋعا دايىن ەكەندىكتەرىن دە جەتكىزدى. ال ەندى گەنا جەڭە مە, ۆانەس باسىم بولا ما, وعان 5 مامىردا كۋا بولامىز.
ءالي بيتورە,
«ەگەمەن قازاقستان»
