جيىنعا قاتىسۋشىلارعا ارنالعان سوزىندە ەلباسى قازاقستاندا وتان قورعاۋشى كۇنى مەن جەڭىس كۇنىن مەرەكەلەۋدىڭ ماڭىزدىلىعىن ەرەكشە اتاپ ءوتتى.
«بارشاڭىزدى كەلە جاتقان وتان قورعاۋشى كۇنىمەن جانە ۇلى جەڭىس مەرەكەسىمەن شىن جۇرەگىممەن قۇتتىقتايمىن. ەرلىك پەن پاتريوتيزمگە دارىپتەيتىن وسى ايتۋلى مەرەكەلەر بيىل استانانىڭ 20 جىلدىق مەرەيتويىمەن تۇسپا-تۇس كەلىپ وتىر. قازاقتا «ەلدى قورعاۋ – ەردىڭ ءىسى, ەردى قولداۋ – ەلدىڭ ءىسى» دەگەن قاناتتى ءسوز بار. سوندىقتان بۇگىن سىزدەرگە جەتىستىكتەرىڭىز جانە حالىققا ۇزدىك قىزمەتتەرىڭىز ءۇشىن ارناۋلى اتاقتار مەن شەندەردى تاپسىرعالى وتىرمىن», دەي كەلىپ, ەلباسى ءمىنسىز اسكەري قىزمەتى مەن ەرەن ەڭبەگىمەن ەرەكشەلەنگەن ازاماتتارعا دا ەلىمىزدىڭ جوعارى دارەجەلى وردەن, مەدالدارىن تاپسىرعالى وتىرعانىن ايتتى.
ء «بىز شيرەك عاسىردان استام ۋاقىتتىڭ ىشىندە انتقا بەرىك, اماناتقا ادال ايبىندى ارميامىزدى تاربيەلەپ, ونى جابدىقتاپ كەلەمىز. سايىپقىران ساربازدارىمىز بەن ساردارلارىمىز قاستەرلى تاۋەلسىزدىگىمىزدىڭ قورعانى بولا ءبىلدى. وسى مىندەتىن جالعاستىرا بەرەدى دەپ سەنەمىن. «ۇرانى بار ەلدىڭ ۇلانى بار». ۇيىتقىسى بەرىك ۇلاندارىمىز اسكەري الەۋەتتى نىعايتىپ كەلەدى. ءباھادۇر بابالاردىڭ ەرەن ەڭبەگىن ەگەمەن ەلدىڭ ەرلەرى لايىقتى جالعاستىردى», دەدى ن.نازارباەۆ.
سونداي-اق الەمدە بەلەڭ الىپ كەلە جاتقان تۇراقسىزدىق جاعدايىندا مەملەكەتتىڭ اسكەري-كۇش سالاسى ەرەكشە ماڭىزعا يە بولاتىنىن ايتتى. ء«بىزدىڭ اسكەرىمىز بەن قۇقىق قورعاۋ قۇرىلىمدارىمىز ەل قاۋىپسىزدىگىنىڭ بەرىك قالقانى ءارى ەگەمەندىگىمىزدىڭ مىزعىماس كەپىلى بولىپ سانالادى. مەملەكەت بارشا قازاقستاندىقتاردىڭ بەيبىت ءومىرى مەن تىنىشتىعىن ساقتاۋ جولىنداعى سىزدەردىڭ ەرلىكتەرىڭىز بەن قاجىرلى ەڭبەكتەرىڭىزدى جوعارى باعالايدى», دەدى مەملەكەت باسشىسى.
ءراسىم بارىسىندا مەملەكەت باسشىسى جوعارى اسكەري شەندەردەن بولەك ارناۋلى اتاقتار دا تاپسىردى. مۇنداي ماراپاتقا ەلىمىزدىڭ بەيبىت ءومىرى مەن تىنىشتىعىن ساقتايتىن اسكەر مەن ارناۋلى قىزمەتتەردىڭ وكىلدەرى يە بولدى.
سونىمەن, قورعانىس ءمينيسترىنىڭ ورىنباسارى تالعات جانجۇمەنوۆ گەنەرال-لەيتەنانت اسكەري اتاعىنا يە بولدى. ال ۇلتتىق قاۋىپسىزدىك كوميتەتى توراعاسىنىڭ ورىنباسارى – تەرروريزمگە قارسى قىزمەتىنىڭ باستىعى نۇرعالي بىلىسبەكوۆ پەن ۇلتتىق قاۋىپسىزدىك كوميتەتى توراعاسىنىڭ ورىنباسارى – قارسى بارلاۋ قىزمەتىنىڭ باستىعى مارات ءوسىپوۆ ۇلتتىق قاۋىپسىزدىك گەنەرال-لەيتەنانتى ارناۋلى اتاعىن الدى.
سونداي-اق گەنەرال-لەيتەنانت شەنى «سىربار» سىرتقى بارلاۋ قىزمەتىنىڭ ديرەكتورى عابيت بايجانوۆقا بەرىلدى. باس پروكۋروردىڭ ورىنباسارى ەرلىك كەنەنباەۆ 2-سىنىپتى مەملەكەتتىك ادىلەت كەڭەسشىسى شەنىن يەلەندى.
بۇدان بولەك, گەنەرال-مايور اسكەري اتاعى ۇلتتىق ۇلاننىڭ «ورتالىق» وڭىرلىك قولباسشىلىعى قولباسشىسىنىڭ ءبىرىنشى ورىنباسارى – شتاب باستىعى ۇلاربەك ابىكەەۆكە, «باتىس» وڭىرلىك قولباسشىلىعى اسكەرلەرىنىڭ قولباسشىسى قانىش ابۋباكىروۆكە, ۇلتتىق ۇلاننىڭ «شىعىس» وڭىرلىك قولباسشىلىعى قولباسشىسىنىڭ ءبىرىنشى ورىنباسارى – شتاب باستىعى دميتري بوچاروۆكە, قورعانىس مينيسترلىگى كادرلار جانە اسكەري ءبىلىم بەرۋ دەپارتامەنتىنىڭ باستىعى قايرات كوپباەۆقا, ۇلتتىق قاۋىپسىزدىك كوميتەتى شەكارا قىزمەتىنىڭ «وڭتۇستىك» وڭىرلىك باسقارماسىنىڭ باستىعى ارمان قاليەۆكە جانە سەرىك ىزتىلەۋوۆكە بەرىلدى.
«بۇگىن ەلباسىنىڭ قولىنان جوعارى شەندى اسكەري اتاق الۋ ءبىز ءۇشىن زور قۇرمەت. وتانىمىزدىڭ قورعانىس سالاسىن نىعايتۋدا جانە بەيبىتشىلىك ءومىرىمىزدى ساقتاۋدا قىزمەت ەتىپ جۇرگەن وفيتسەرلەردى باعالاعانىڭىز ءۇشىن العىسىمىز شەكسىز. ەلدىڭ سەنىمىن اقتاۋعا انت ەتەمىز», دەدى ق.ابۋباكىروۆ ماراپاتتاۋ بارىسىندا.
سونىمەن قاتار اۋە قورعانىس كۇشتەرى باس قولباسشىسىنىڭ ورىنباسارى ەۆگەني پودگايسكيگە اۆياتسيا گەنەرال-مايورى اسكەري اتاعى, ۇقك قارسى بارلاۋ وپەراتسيالارى دەپارتامەنتىنىڭ باسشىسى سابىرجان وڭعارباەۆ پەن ۇقك تەرروريزمگە قارسى قىزمەتى حالىقارالىق تەرروريزمگە جانە ءدىني ەكسترەميزمگە قارسى كۇرەس دەپارتامەنتى باسشىسى باقىتبەك راقىمبەرديەۆكە ۇلتتىق قاۋىپسىزدىك گەنەرال-مايورى ارناۋلى شەنى, «سىربار» سىرتقى بارلاۋ قىزمەتى ديرەكتورىنىڭ ورىنباسارى نۇرلان ورازوۆقا سىرتقى بارلاۋ گەنەرال-مايورى ارناۋلى اتاعى تابىستالدى. اقتوبە وبلىسى ىشكى ىستەر دەپارتامەنتىنىڭ باسشىسى ماحامبەت ابيساتوۆ, ءىىم كريمينالدىق پوليتسيا دەپارتامەنتىنىڭ باسشىسى ارمانبەك بايمۋرزين, ءىىم كوشى-قون قىزمەتى كوميتەتىنىڭ توراعاسى مۇرات قابدەنوۆ, ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ پوليتسيا گەنەرال-مايورى ارناۋلى شەنىنە يە بولدى. استانا قالاسىنىڭ پروكۋرورى بولات دەمباەۆ پەن الماتى وبلىسىنىڭ پروكۋرورى ازامات جىلقىباەۆقا 3-سىنىپتى مەملەكەتتىك ادىلەت كەڭەسشىسى سىنىپتىق شەنى, سىبايلاس جەمقورلىققا قارسى ءىس-قيمىل ۇلتتىق بيۋروسى باسشىسىنىڭ ورىنباسارى دۋلات ازبەرگەنوۆكە 3-ساناتتى جوعارى بىلىكتىلىك سىنىبى اتاعى تابىستالدى.
بۇدان بولەك, ءراسىم بارىسىندا ءىى دارەجەلى «داڭق» وردەنىمەن مۇحامەدجان تالاسوۆ, مارات قۇسايىنوۆ, مۇحامەتقالي ساتوۆ, قايرات جاقىپباەۆ ماراپاتتالدى. سونىمەن قاتار ءى دارەجەلى «ايبىن» وردەنى دۋلات كۇرماشەۆ پەن اسحات تولەۋوۆكە بەرىلدى. «قۇرمەت» وردەنى ەلميرا وماروۆاعا تابىستالدى.
«قوعامدىق ءتارتىپتى جانە قاۋىپسىزدىكتى نىعايتۋعا زور ۇلەس قوسقان دۋلات قۇرماشەۆتى ەرەكشە اتاپ وتكىم كەلەدى. اسا قاۋىپتى قىلمىسكەرلەرگە قارسى ارنايى وپەراتسيانى باسقارىپ, وتكىزگەن ونى ءبىرىنشى دارەجەلى «ايبىن» وردەنىنە لايىق دەپ سانادىق», دەدى ەلباسى.
مەملەكەت باسشىسى II دارەجەلى «ايبىن» وردەنىمەن جاسۇلان جاقىپوۆتى, اندرەي كالينيندى, دميتري پلاستوۆەتستى ماراپاتتادى. «قىزمەتىن ءمىنسىز اتقارىپ, اسكەري بىلىمگە بىلىكتى باسشىلىق جاساعانى ءۇشىن جاسۇلان جاقىپوۆقا ەكىنشى دارەجەلى «ايبىن» وردەنى بەرىلەدى. بيىل قۇرلىق اسكەرلەرى اراسىندا وتكەن كوماندالىق دايىندىق ناتيجەسى بويىنشا ول ءبىرىنشى ورىنعا يە بولدى», دەدى پرەزيدەنت.
بالالاردى ورتتەن قۇتقارعان سارباز عالىمجان الەۋحانوۆقا «ەرلىگى ءۇشىن» مەدالى بەرىلدى. بۇل جونىندە ەلباسى «بەيبىت كۇندە باسىن قاتەرگە تىگىپ, ەكى بالانى ورتتەن قۇتقارعان عالىمجان الەۋحانوۆ ەرەن ەرلىك كورسەتتى. ونىڭ بۇل ءىسى بارشا جۇرتقا ۇلگى. سول سەبەپتى «ەرلىگى ءۇشىن» مەدالىمەن ماراپاتتالادى», دەدى.
سونداي-اق ورتتەن ەكى بالانى قۇتقارىپ قالعان ءىىم قاراعاندى وبلىستىق توتەنشە جاعدايلار دەپارتامەنتىنىڭ بولىمشە كومانديرى ۆيتالي كالمىكوۆ تا «ەرلىگى ءۇشىن» مەدالىنە يە بولدى. «ۆ.كالمىكوۆ جانكەشتىلىگىنىڭ ارقاسىندا الاۋلاعان ورتتەن ەكى بالانى قۇتقاردى. وسى ەرەن ەڭبەگى ءۇشىن وعان «ەرلىگى ءۇشىن» مەدالى تابىستالادى», دەدى پرەزيدەنت.
«اسكەري قىزمەتتە كاسىبي بىلىكتىلىك تانىتقان نۇرلان زالمۇقانوۆ «جاۋىنگەرلىك ەرلىگى ءۇشىن» ماراپاتتالدى. سوڭىندا مەملەكەت باسشىسى سالتاناتتى شاراعا قاتىسۋشىلاردىڭ بارلىعىن وتان قورعاۋشى كۇنىمەن جانە ۇلى جەڭىس مەرەكەسىمەن قۇتتىقتادى. ءىس-شارادان كەيىن ەلباسى ماراپاتقا يە بولعاندارمەن ەستەلىك سۋرەتكە ءتۇستى.
اباي اسانكەلدى ۇلى,
«ەگەمەن قازاقستان»
