مەملەكەت باسشىسى نۇرسۇلتان نازارباەۆتىڭ قازاقستان حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا نەگىزگى باسىمدىق – ەڭبەك نارىعىن جاڭعىرتۋ دەپ اتاپ كورسەتتى.
- بۇگىن مىنە وبلىسىمىزعا ارنايى كەلىپ, وزدەرىنىڭ 1300 استام بوس جۇمىس ورىندارىن ۇسىنىپ, باعدارلامانىڭ تەتىكتەرىن تۇسىندىرۋگە, شاقىرۋعا كەلگەن قوستاناي وبلىسىنىڭ اكىم ارحيمەد بەگەجان ۇلىنا جانە قوناقتارعا ۇلكەن راحمەت ايتامىن. وتكەن جىلى وبلىسىمىزدان سولتۇستىك وڭىرلەرگە مەملەكەتتىك قولداۋ شارالارىنىڭ كومەگىمەن 20 وتباسى 76 ادام قونىس اۋداردى. (ونىڭ ىشىندە سولتۇستىك قازاقستان وبلىسىنا - 16, پاۆلودار وبلىسىنا - 16, شىعىس قازاقستان وبلىسىنا - 25, قوستاناي وبلىسىنا – 19). سونداي-اق اعىمداعى جىلدىڭ اقپان ايىندا وبلىستىڭ اۋداندارى مەن قالالارىندا قوستاناي, پاۆلودار, سولتۇستىك قازاقستان وبلىسىنىڭ جۇمىس بەرۋشىلەرى مەن اۋداندىق اكىمدىكتەرى وكىلدەرىنىڭ قاتىسۋىمەن ەرىكتى قونىس اۋدارۋ جانە بوس جۇمىس ورىندارىنىڭ جارمەڭكەلەرى ۇيىمداستىرىلدى, دەدى ماڭعىستاۋ وبلىسىنىڭ اكىمى ەرالى توعجانوۆ.
جارمەڭكە بارىسىندا قوستاناي وبلىسىنىڭ اكىمى ارحيمەد بەگەجان ۇلى قونىس اۋدارۋشىلارعا مەملەكەت تاراپىنان كورسەتىلەتىن كومەكتى كەڭىنەن ءتۇسىندىردى. سونداي-اق, ول قونىس اۋدارۋعا نيەتتى ازاماتتارعا وڭىردەگى بوس جۇمىس ورىندارىن ۇسىندى.
-2018 جىلى قوستاناي وبلىسى بويىنشا 1365 مامانعا سۇرانىس بار: اگرونوم - 60, جۇرگىزۋشى – 146, ۆەتەرينار– 56, بالا باقشا تاربيەشىسى – 135, اۋلا سىپىرۋشى – 65, جۇك تاسۋشى -47, مەحانيزاتور – 259, كۇزەتشى – 66, قارا جۇمىسشى – 192, دانەكەرلەۋشى – 100, قۇرىلىسشى – 63, تراكتوريست – 98, دانەكەرلەۋشى - 154 جانە ت.ب. بۇعان دەيىن شاقىرىلعان مامانداردى 1ورنالاستىردىق. بىرلەسكەن جۇمىستار ءوز ناتيجەسىن بەرۋدە, دەدى ارحيمەد بەگەجان ۇلى.
جاڭاوزەن قالاسىندا وتكەن قوستاناي وبلىسىنا ەرىكتى قونىس اۋدارۋ جانە بوس جۇمىس ورىندارى جارمەڭكەسىنە 300-دەي ادام قاتىسىپ, 20 وتباسى (67 ادام) قونىس اۋدارۋعا نيەت ءبىلدىردى.
اعىمداعى جىلى اقپان ايىندا وبلىستىڭ اۋداندارى مەن قالالارىندا قوستاناي, پاۆلودار, سولتۇستىك قازاقستان وبلىسىنىڭ جۇمىس بەرۋشىلەرى مەن اۋداندىق اكىمدىكتەرى وكىلدەرىنىڭ قاتىسۋىمەن بوس جۇمىس ورىندارىنىڭ جارمەڭكەلەرى ۇيىمداستىرىلىپ, 2000-عا جۋىق بوس ورىندار ۇسىنىلعان. وسى شارانىڭ ناتيجەسىندە, سولتۇستىك قازاقستان وبلىسىنا 23 وتباسى, ياعني 78 ادام; پاۆلودار وبلىسىنا 59 وتباسى, ياعني 202 ادام; كوستاناي وبلىسىنا 89 وتباسى, ياعني 333 ادام, بارلىعى 171 وتباسى 613 ادام كوشەمىز دەپ نيەت ءبىلدىردى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
