«سەمەيدەگى جاس جۋرناليستەر قاۋىمداستىعى» قوعامدىق بىرلەستىگى, ەرىكتىلەر مەن ستۋدەنت جاستار قالاداعى قارت ادامدارعا جوعارى تەحنولوگيالىق سمارتفونداردا تولىعىمەن جۇمىس ىستەۋدى ۇيرەتۋ ءۇشىن, ترەنينگ ساباقتارىن ۇيىمداستىردى. جوبانىڭ جەتەكشىسى لەيلا ساعىنايقىزىنىڭ ايتۋىنشا, بۇل قازاقستاننىڭ 16 قالاسى بويىنشا قاتارىنان ەكىنشى جىل قولعا الىنعان شارۋا. سوندىقتان بولار بيىل سەمەي قالاسىندا جاڭا اقپاراتتىق جانە سمارتفوندىق تەحنولوگيانى ۇيرەنۋ ءۇشىن قىزىعۋشىلىق تانىتقان قاريالاردىڭ سانى ەكى ەسە كوبەيىپتى.ماسەلەن, ەگەردە ترەنينگ بارىسىندا 10 ادامدى وقىتۋ كەرەك بولسا, ساباققا 13-15 ادام ارتىعىمەن كەلەدى ەكەن.
- اجەلەر, اپالار, اتالارىمىز ءتىپتى وسى ترەنينگ-ساباقتار وتەدى دەگەن كەزدە, جارتى ساعات ەرتە كەلىپ الىپ, توسىپ وتىرادى,-دەدى لەيلا ساعىنايقىزى,بۇل جوبانىڭ ەرەكشەلىگى جاسى ۇلكەن ادامداردى سمارتفوندى قولدانۋشى دەڭگەيىندە يگەرتۋ. وسىعان دەيىن ءبىزدىڭ قوعامدىق بىرلەستىك باستاۋىش سىنىپتا وقيتىن بالالارى بار اتا-انالاردى دا وسىنداي وقىتۋ-ۇيرەتۋدەن وتكىزدى. ولار «GPS» ءموبيلدى قوسىمشاسى ارقىلى ماسەلەن, اۆتوبۋس باعىتتارىن انىقتاي الۋى ءوز الدىنا, بالالارىنىڭ ينتەرنەتكە قالاي كىرىپ, قانشا ۋاقىت وتىراتىندىعىن باقىلاي الاتىن بولدى. ارينە, بىرەۋلەر ايتۋى مۇمكىن, بۇل بالانىڭ قۇقىعىن بۇزادى دەپ, بىراق تا, وسىنداي وقىتۋ-ۇيرەتۋ شارالارى ارقىلى اتا-انالار جاس بالالارىن «كوك كيت» سياقتى قاتەرلى ۇيىمداردان اۋلاق ۇستاي الادى. جانە سمارتفوندارداعى قوسىمشالار ارقىلى ءوز بالالارىنىڭ قاي جەردە جۇرگەنىن دە باقىلاي الادى. وسىعان وراي 20 اتا-انا بىزدەن ارنايى ترەنينگ ساباقتارىن الدى.
قالاداعى دوستىق ۇيىندە وتكىزىلىپ جاتقان ساباقتارعا اتالار مەن اپالار بەلسەندىلىكپەن قاتىسىپتى. بارلىعىنىڭ قولىندا ءبىر-ءبىر جاڭا سمارتفون. ۇڭىلە ءتۇسىپ, ەرەكشە قىزىعۋشىلىقپەن ۇيرەنىپتى.
- بۇل ساباقتارعا جۇبايىمىز ەكەۋمىز بىرگە كەلدىك,-دەدى قاريا البەرت پەرەمىكين,-ينتەرنەت-تەحنولوگيالاردى قولدانۋدى ۇيرەنۋ ءبىز ءۇشىن اسا ماڭىزدى. ترەنينگ وتە جاقسى ءوتىپ جاتىر. ارينە, قارت ادامدار جاس بالا سياقتىمىز عوي, ءبارىن بىردەن ۇعىپ كەتۋ قىيىن. دەگەنمەن ءتۇرلى سۇراقتار تۋىنداعان كەزدە قاسىمىزعا كەلىپ, جانتالاسا كومەكتەسىپ, ءتۇسىندىرىپ جاتقان ءلايلا ساعىنايقىزىنا جانە ونىڭ كومەكشىلەرىنە ۇلكەن راحمەت. بىزگە ساباق بەرۋشىلەردىڭ بارلىعى دا بىلىكتى جاستار. قاريا بولساق تا, وسىنداي ترەنينگتەر ارقىلى ومىرگە دەگەن قىزىعۋشىلىعىمىز ارتا تۇسۋدە.
راۋشان نۇعمانبەك,
سەمەي
