ياعني قازىرگى كىتاپحانالار ەندى تەك قىزمەت كورسەتۋ مەكەمەسى عانا ەمەس, قالا, اۋىل تۇرعىندارى ءۇشىن زياتكەرلىك دەمالىس ورنىنا اينالادى. كوۆوركينگ ورتالىقتارىنىڭ اشىلۋى – كىتاپحانانىڭ قىزمەت كورسەتۋ دەڭگەيىن ەۋروپالىق تاجىريبەگە نەگىزدەۋ ماقساتىندا قولعا الىنۋدا. وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ارداق رايىمبەكوۆتىڭ ايتۋىنشا, كىتاپحانالار, ونىڭ ىشىندە اۋىلدارداعى كىتاپحانالار جۇيەسىن جاڭعىرتۋ, زاماناۋي قۇرىلعىلارمەن جابدىقتاپ, تسيفرلى جوبالار ەنگىزۋ – بۇگىنگى كۇن تالابى.
ەلباسىمىزدىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا وڭىردەگى 13 اۋداندا جانە ءار اۋداننىڭ ءبىر اۋىلىندا كوۆوركينگ ورتالىقتارى اشىلادى. بارلىق كىتاپحانالار كومپيۋتەرلەرمەن جابدىقتالىپ, عالامتور جەلىسىنە قوسىلادى. كىتاپحانالار جۇمىسىن جاڭارتىپ, ىسكە قوسۋ ءۇشىن وبلىستىق بيۋدجەتتەن قارجى جۇمسالادى. قازىر وبلىستا 1 ميللليون كىتاپ قورى بار 279 كىتاپحانا جۇمىس ىستەيدى. بۇل كۇندەرى پاۆلودارداعى س. تورايعىروۆ اتىنداعى وبلىستىق كىتاپحاناعا كۇردەلى جوندەۋ جۇمىستارى جۇرگىزىلۋدە. وبلىستىق «رۋحاني جاڭعىرۋ» جوبالىق ءوفيسى وسى جەردە ورنالاسقان.
ال وبلىستا اۋىلداعى العاشقى كوۆوركينگ نىسانى لەبياجى اۋدانىنىڭ ورتالىعى اققۋلىدا, قاراقالا اۋىلىندا اشىلدى. وسىعان وراي وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ارداق رايىمبەكوۆ ارنايى بارىپ اۋىلدىقتاردى قۇتتىقتاپ, وبلىس اكىمى بولات باقاۋوۆتىڭ اتىنان 3D فورماتتاعى كوزىلدىرىكتەر تابىس ەتتى. بالالار ورتالىعى ءۇش الاڭعا بولىنگەن: ويىن, ءبىلىم جانە عالامتور. ويىن الاڭى قاجەتتى قۇرالدارمەن جابدىقتالعان. ءبىلىم بولىمىندە كەرەكتى اقپاراتتاردى تابا الادى, عالامتور بولىمىندە الەم بويىنشا جاڭالىقتاردى ءبىلىپ, وي-ءورىسىن كەڭەيتەدى. تەلەديداردان قىزىقتى باعدارلامالار مەن سۇيىكتى مۋلتفيلمدەردى كورە الادى. كەلەسى الاڭ – ەۋروپالىق كىتاپ وقۋ تاجىريبەسىنەن الىنعان كىتاپ وقۋ الاڭى. بالالار جۇمساق كورپەلەرگە وتىرىپ, دەمالادى.
اۋداندىق ورتالىقتاندىرىلعان كىتاپحانالار جۇيەسىنىڭ ديرەكتورى داريكو تابۇلوۆانىڭ ايتۋىنشا, وسىنداي شىعارماشىلىق ۇيلەسىم مەن ديزايندى كىتاپحاناشىلار بىرلەسىپ وزدەرى جاساپتى. ەكى ورتالىقتىڭ اشىلۋىنا اۋداندىق بيۋدجەتتەن 500 مىڭ تەڭگە بولىنگەن. اۋداندىق كىتاپحانا جۇيەسى قۇرامىندا 22-ءسى اۋىلدىق, اۋداندىق بالالار جانە كوپشىلىك كىتاپحاناسى قىزمەت كورسەتۋدە. بالالارعا ارنالعان اۋداندىق كىتاپحانانىڭ 200-دەن استام تۇراقتى وقىرمانى بار.
س. تورايعىروۆ اتىنداعى وبلىستىق كىتاپحانانىڭ ديرەكتورى شولپان شاحمەتوۆانىڭ ايتۋىنشا, وبلىستىڭ ەڭ كونە كىتاپحاناسىنىڭ تاريحى 1892 جىلدان باستالادى. مىسالى, ەگيپەتتەگى الەكساندريا كىتاپحاناسى – فيلوسوفتار مەن ماتەماتيكتەرگە سول زاماندا كوۆوركينگ ورتالىعى بولعان ەكەن. 2005 جىلى كوۆوركينگتى بۇكىل الەمگە تانىمال ەتكەن امەريكالىق پروگرامميست برەد نيۋبەرگ.
– كوۆوركينگ-كىتاپحانا اشۋدى ءبىز 2013 جىلدان باستاپ ويلاستىرىپ كەلدىك. وركەنيەت كوشىنە ىلەسۋ – ماقسات. قازىر ويىمىز جۇزەگە استى. بارلىق كىتاپتار تسيفرلى فورماتقا كوشىرىلۋدە. اۆتوماتتاندىرىلعان جۇيە ىسكە قوسىلدى. ۆەب-رابيس ىسكە قوسىلسا, ەلەكتروندى كاتالوگتاردى ينتەرنەتكە شىعارىپ, كىتاپحانا سايتىنا ورنالاستىرۋعا بولادى. ەلەكتروندى كاتالوگ وتە ءتيىمدى. وقىرمان وسى جۇيە ارقىلى كەرەك كىتابىن تابا الادى. قورداعى بارلىق كىتاپتارعا راديوبەلگى ورناتىلعان. راديوبەلگى ارقىلى كىتاپتىڭ وقىرمانعا بەرىلىپ, قايتا كەلگەن جولىنا دەيىن باقىلانادى, – دەيدى شولپان شاحمەتوۆا.
ال نەگىزگى قالالىق كىتاپحانالىق ۇدەرىستەر اۆتوماتتاندىرىلعان, ەلەكتروندى دەرەكتەر قورى قۇرىلۋدا, ساندىق ولكەتانۋ باسپالارىنىڭ نەگىزىندە ەلەكتروندى كىتاپحانا قۇرىلادى. بارلىق كىتاپحانا بولىمدەرى جەرگىلىكتى جەلىگە قوسىلعان, پايدالانۋشىلارعا ارنالعان اۆتوماتتاندىرىلعان جۇمىس ورىندارى بار. Wi-Fi ايماعى ۇيىمداستىرىلىپ, ۆەبينارلار وتكىزىلىپ تۇرادى. ەكى ATIZ BookDriveDIY كىتاپ سكانەرىمەن جاراقتالعان ساندىق ورتالىق قىزمەت ەتەدى. راديوجيىلىكتى سايكەستەندىرۋ سياقتى جاڭا تەحنولوگيانى بەلسەندى ەنگىزۋدە.
– ال لەبياجى اۋدانىنداعى ەكى اۋىلدا اشىلعان كوۆوركينگ ورتالىقتارى «ورلەۋ» جوباسى نەگىزىندە ىسكە اسىرىلۋدا. سونداي-اق «نۇر وتان» پارتياسى وبلىستىق فيليالىنىڭ قولداۋىمەن «قازاقستان كىتاپحانالارى» جوباسى دا باستالدى. رۋحاني شارالاردى جۇزەگە اسىرۋ ءۇشىن «نۇر وتان» پارتياسى جانە «اتامەكەن» ۇلتتىق كاسىپكەرلەر پالاتاسىمەن مەموراندۋمعا قول قويدىق. وسىعان وراي كىتاپحانالار تسيفرلاندىرۋ جۇيەسىنە كوشەدى, – دەيدى ارداق رايىمبەكوۆ.
ءيا, بۇل كۇندەرى زامان وزگەرىسىنە ساي, وبلىستىق كىتاپحانادا عانا ەمەس, اۋىلدىق كىتاپحانالار جانىنان دا كوۆوركينگ ورتالىقتارى اشىلۋدا. داريكو تابۇلوۆانىڭ ايتۋىنشا, اۋدانداعى كىتاپحانالاردىڭ كىتاپ قورى دا جىل سايىن 3 مىڭداي كىتاپپەن تولىعىپ وتىرادى. ەندى وقىرمانداردىڭ كوۆوركينگ
ورتالىقتارىندا كىتاپ وقىپ, جەكە شىعارماشىلىق جۇمىستارىن جازىپ, عىلىمي جوبالاردى بىرلەسە وتىرىپ جۇزەگە اسىرۋعا مۇمكىندىك تۋدى.
ينتەرنەت جەلىسىنە اۋداندىق بالالار كىتاپحاناسى, جامبىل, قاراقالا اۋىلدىق كىتاپحانالارى قوسىلعان. قىزىلقوعام اۋىلىنىڭ كىتاپحاناشىسى گۇلستان باتتالوۆا ەلەكتروندى-تسيفرلى جۇيەدە جۇمىس جاسايدى. ءوز ۇيىنەن حالىقارالىق «ينفوۋروك» سايتىنا تىركەلىپ, جۇمىستارىمەن بولىسكەنى ءۇشىن 9 سەرتيفيكاتتىڭ يەگەرى اتانىپتى. سونداي-اق باسقا دا اۋىل كىتاپحاناشىلارى ايمان تولەۋوۆا, لاۋرا سادجانوۆا, گۇلبانۋ ءمۇرسالىموۆا, گۇلنار ءابدراحمانوۆالار «رابيس» باعدارلاماسى ارقىلى جۇمىس ىستەيدى.
اۋىل كىتاپحاناشىلارى كىتاپحاناداعى كوۆوركينگ ورتالىعى كوممۋنيكاتيۆتىك الاڭ, سوندىقتان ءبارىڭىزدى وسى الاڭعا كەلۋگە شاقىرمىز, – دەيدى.
فاريدا بىقاي,
«ەگەمەن قازاقستان»
پاۆلودار وبلىسى,
لەبياجى اۋدانى
سۋرەتتى تۇسىرگەن جانار بەيسەكەەۆا
