«بالالارعا ارنالعان تەگىن IT-سىنىپتاردىڭ كوتەرەر جۇگى سالماقتى بولماق. بۇل جوبا اياسىندا ەلىمىز بويىنشا 1000 ءىت-سىنىپ اشىلىپ, وندا جىلىنا 8-16 جاس ارالىعىنداعى 150 مىڭ بالا باعدارلامالاۋ جانە روبوت تەحنيكاسىنىڭ نەگىزدەرى جايىندا ەۋروپالىق ءبىلىم بەرۋ ستاندارتى نەگىزىندە تەرەڭدەتىلگەن ءبىلىم الادى. ازىرگە 2018-2020 جىلدارعا, ياعني ءۇش جىلعا جوسپارلانعان بۇل جوبا بويىنشا 450 مىڭ بالانى وقىتۋ كوزدەلىپ وتىر. بۇل باستاما مەكتەپتەرگە فاكۋلتاتيۆتى ءپان رەتىندە ەنگىزىلىپ, ءۇش ايلىق جانە التى ايلىق كۋرس رەتىندە جۇرگىزىلەدى», دەپ مالىمدەدى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ.
اتالعان جوبا اياسىندا الداعى ءۇش جىلدا ەلىمىزدە جۇمىس بەرۋشى ءىت-كومپانيالار مەن ءىرى جوعارى وقۋ ورىندارىنىڭ بازاسىندا 20 ءىت-ورتالىق اشىلىپ, جىلىنا 35 مىڭ ادام ءبىلىم الماق. بۇل ورتالىقتاردا بۇگىندە الەمدىك دەڭگەيدە سۇرانىسقا يە تسيفرلاۋ تاسىلدەرى مەن Java, Python, PHP, Swift سياقتى باعدارلامالاۋ تىلدەرى وقىتىلادى.
«ورتالىق تۇلەكتەرىنە ءبىر جىل بويى قولداۋ كورسەتىلىپ, ولاردىڭ جۇمىسقا ورنالاسۋىنا دا مەيلىنشە جاعداي جاسالادى», دەپ اتاپ ءوتتى م. اشىمباەۆ.
وسىلايشا, «نۇر وتان» پارتياسى «اتامەكەن» ۇلتتىق كاسىپكەرلەر پالاتاسىمەن بىرلەسىپ قازاقستاندىقتاردىڭ تسيفرلىق ساۋاتتىلىعىن ارتتىرىپ قانا قويماي, ولاردىڭ الەمدىك ءىرى جوبالارعا قاتىساتىن باسەكەگە قابىلەتتى مامان بولىپ قالىپتاسۋىنا جاعداي جاساماق.
