بۇل ورايدا, الداعى بىرنەشە جىلدا گۋمانيتارلىق ءبىلىمنىڭ بارلىق باعىتتارى بويىنشا الەمدەگى ەڭ جاقسى 100 وقۋلىقتى ءارتۇرلى تىلدەردەن قازاق تىلىنە اۋدارىلاتىنى ايقىندالدى. بۇگىندە العاشقى وقۋلىقتاردىڭ تۇساۋى كەسىلىپ, بۇل ءىس ناتيجەلى جۇزەگە اسىرىلا باcتاعانى ءمالىم.
شىمكەنتتەگى قازاقستان حالقى اسسامبلەياسى عيماراتىندا وتكەن جيىندا جاڭا وقۋلىقتاردىڭ ءمان-ماڭىزىنا ارنالدى. «قازاق تىلىندەگى 100 جاڭا وقۋلىق» جوباسىن تالقىلاۋ بويىنشا قازاقستان حالقى اسسامبلەياسىنىڭ بىرىڭعاي كۇنىن وتكىزۋ اياسىندا ۇيىمداستىرىلعان وقو قحا مۇشەلەرى مەن قوعامدىق كەلىسىم كەڭەسىنىڭ بىرلەسكەن وتىرىسىندا عالىمدار, زيالى قاۋىم وكىلدەرى, ەتنومادەني بىرلەستىكتەردىڭ توراعالارى مەن مەدياتورلار ءوز وي-پىكىرلەرىن ورتاعا سالدى. مىسالى, ايماقتىق الەۋمەتتىك-يننوۆاتسيالىق ۋنيۆەرسيتەتى «قازاقستان حالقى اسسامبلەياسى» كافەدراسىنىڭ مەڭگەرۋشىسى ۇسەن اسقاروۆ وقۋلىقتاردىڭ ماڭىزىنا توقتالدى. «ەلباسى باستاماسىنىڭ ارقاسىندا ەلىمىزدىڭ ستۋدەنتتەرى قازاق تىلىندە جازىلعان الەمنىڭ ۇزدىك وقۋلىقتارىنا قول جەتكىزىپ وتىر. ءتۇرلى سالاداعى كىتاپتار جاستاردىڭ عانا ەمەس, جالپى قازاقستاندىقتاردىڭ ۇلكەن كومەكشى قۇرالىنا اينالادى دەگەن سەنىمدەمىن. ءبىزدىڭ كەزىمىزدە كوپتەگەن كىتاپتار قولجەتىمسىز بولدى. ونىڭ ۇستىنە ورىس تىلىندە عانا وقي الاتىنبىز. ال بۇگىندە, مىسالى گرەگوري مەنكيۋ مەن مارك تەيلوردىڭ «ەكونوميكس» كىتابىنىڭ ءتورتىنشى باسىلىمى قازاق تىلىنە اۋدارىلىپ, ستۋدەنتتەرگە جول تارتتى. اتاقتى گارۆارد ۋنيۆەرسيتەتىنىڭ ستۋدەنتتەرى ءدال وسى كىتاپتان ءبىلىم الادى»,– دەدى ءۇ.اسقاروۆ.
100 جاڭا وقۋلىقتىڭ قوعامدىق سانانى جاڭعىرتۋداعى ءرولى ەرەكشە ەكەنىن اتاپ وتكەن جازۋشى مارحابات بايعۇتتىڭ ايتۋىنشا, وقۋلىقتاردىڭ العاشقى لەگى باسىلىپ شىققاندا وڭىردەگى 50-گە جۋىق اقىن-جازۋشى باس قوسىپ, تالداۋ جۇرگىزگەن. «جوبانىڭ باستى ەرەكشەلىگى ول – كىتاپتاردىڭ تىكەلەي انا تىلىنەن اۋدارىلۋى. ال بۇرىن وقۋلىقتار تەك ورىس تىلىنەن ءتارجىمالاناتىن. جاراسىمدى جوبا جالعاسىن تابا بەرسىن دەگەن تىلەكتەمىز»,– دەيدى جازۋشى.
ايتا كەتەيىك, جاقىندا جوبا بويىنشا اۋدارىلعان 18 وقۋلىقتىڭ تۇساۋى كەسىلگەن بولاتىن. ارقايسىسى 10 مىڭ دانامەن باسىلعان وقۋلىقتار الداعى ۋاقىتتا ەلىمىزدىڭ بارلىق وڭىرلەرىنە تاراتىلىپ, كىتاپحانا سورەلەرىنەن تابىلاتىن بولادى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
