جەمقورلىق – بۇكىل قوعام بولىپ كۇرەسەتىن قاۋىپتى ىندەت. اگەنتتىك توراعاسى اليك شپەكباەۆ ءوزىنىڭ سوزىندە ەلىمىزدە جەمقورلىق دەڭگەيىنىڭ تومەندەۋىنە قاراماستان, ءبىلىم جۇيەسىندە جەمقورلىق قاۋپىنىڭ بار ەكەنىن ايتتى. ءبىلىم جانە عىلىم گرانتتارىن ءبولۋ, بيۋدجەت قارجىسىن يگەرۋ, باسشى قۇرامدى ىرىكتەۋ, ءبىلىم بەرۋ ۇيىمدارى قىزمەتكەرلەرىنىڭ كاتەگورياسى مەن جۇكتەمەسىن انىقتاۋ جۇمىستارى اشىق جۇرگىزىلمەيدى, جەمقورلىق قاۋپىن انىقتاۋ جۇيەسى مەن ساراپتاما جاساۋ جوقتىڭ قاسى, جەمقورلىققا جول بەرگەن قىزمەتكەرلەرى ءۇشىن باسشىلار جەكە جاۋاپكەرشىلىككە تارتىلمايدى.
«بۇگىنگى كۇنى ەلىمىزدىڭ تۇبەگەيلى جاڭارۋى جاعدايىندا ادامي كاپيتالدى دامىتۋ مىندەتى الدىڭعى ورىنعا شىعۋدا, ويتكەنى ول قازاقستاننىڭ الەمنىڭ باسەكەگە قابىلەتتى مەملەكەتتەر قاتارىنا ەنۋىندە ماڭىزدى شارت بولىپ تابىلادى. مەملەكەت باسشىسىنىڭ قولداۋىنىڭ ارقاسىندا سوڭعى 15 جىل ىشىندە ءبىلىم سالاسىنا جۇمسالعان قارجى 10 ەسە ارتتى. وسى جىلدار ىشىندە قازاقستان حالىقارالىق ءبىلىم كەڭىستىگىنە باتىل ەنە ءتۇستى. دەگەنمەن, ءبىلىم سالاسى جەمقورلىق قاۋپىنە تىم بەيىم بولىپ وتىر. ءبىز جەمقورلىقتى جويۋ شارالارى كوپشىلىكتىڭ, سونىڭ ىشىندە ءبىلىم سالاسىنداعى ادامداردىڭ قولداۋىنا يە بولادى دەگەن سەنىمدەمىز», دەدى ا.شپەكباەۆ.
ءوز كەزەگىندە الماتى قالاسىنىڭ اكىمى باۋىرجان بايبەك مەملەكەتتىك ورگانداردىڭ اشىقتىعى, ەسەپ بەرۋى, تازالىعى بارىسىندا جانە ولاردىڭ ازاماتتىق قوعاممەن بەلسەندى ىنتىماقتاستىعى جاعدايىندا عانا جەمقورلىققا قارسى شارالاردىڭ تيىمدىلىگى ارتاتىنىن اتاپ ءوتتى.
«قازىرگى كەزدە ەلىمىزدە جەمقورلىققا قارسى ءىس-قيمىلدىڭ بارلىق قۇقىقتىق قۇرالدارى جاسالعان. مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ جەمقورلىققا قارسى ستراتەگياسى بەكىتىلگەن, «جەمقورلىققا قارسى ءىس-قيمىل تۋرالى», «قوعامدىق كەڭەس تۋرالى», «اقپاراتتىڭ قولجەتىمدىلىگى تۋرالى» سياقتى ماڭىزدى زاڭدار قابىلدانعان. ءبىزدىڭ ورتاق مىندەتىمىز – جەمقورلىقتى مۇلدەم قابىلدامايتىن اشىق ويلاۋدى, قۇقىقتىق جانە قارجىلىق مادەنيەتتى قالىپتاستىرۋ, تۇرمىستىق جەمقورلىقتى جويۋ. مەملەكەتتىك ورگاندارعا كەلگەن ءاربىر جان كەيدە كەلەڭسىزدىككە تاپ بولادى. مۇنداي جايسىز جاعداي ءبىلىم بەرۋ, دەنساۋلىق ساقتاۋ مەكەمەلەرى نەمەسە قۇقىق قورعاۋ ورگاندارىندا كەزدەسۋى مۇمكىن. سوندىقتان بيىل اكىمدىكتىڭ بارىنشا كوكەيكەستى 10 قىزمەتى «paper-free» قاعيداسى بويىنشا ەلەكتروندى فورماتقا كوشىرىلەدى», دەدى ب.بايبەك.
شاھار باسشىسى ءوز سوزىندە بالاباقشا, مەكتەپ جانە تۇرعىن ءۇي كەزەگىن ەلەكتروندى جۇيەگە كوشىرۋ ازاماتتاردىڭ مەملەكەتتىك ورگاندار جۇمىسىن باقىلاۋىنا, وسى ماسەلەلەردە قىزمەتتى اسىرا پايدالانۋعا جول بەرمەيتىندىگىن اتاپ ءوتتى. سونىمەن قاتار الماتىدا «تسيفرلى قازاقستان» باعدارلاماسى بويىنشا «قاعازسىز اۋرۋحانالار» جۇيەسىنە تولىق كوشۋدىڭ جوسپارلانعانىن جەتكىزدى.
فورۋم اياسىندا ب.بايبەك پەن ا.شپەكباەۆ ءبىلىم سالاسىنداعى جەمقورلىققا قارسى ءىس-قيمىلدىڭ ەلىمىزدەگى العاشقى «سانالى ۇرپاق» اتتى وفيستىك جوباسىمەن تانىستى. ءال-فارابي اتىنداعى قازۇۋ بازاسىندا اشىلعان وفيس جەمقورلىققا قارسى ءىس-قيمىل بويىنشا ارنايى ادىستەمەلەر مەن باعدارلامالار شىعارۋدى جوسپارلاپ وتىر.
ارمان وكتيابر,
«ەگەمەن قازاقستان»
الماتى
