قازاقستاندا سوڭعى ون جىل ىشىندە مەملەكەتتىڭ ۇنەمى باقىلاۋى مەن ددسۇ حاتتامالارىن تۇراقتى جاڭارتۋدى ەنگىزۋدىڭ ارقاسىندا ايتۆ-مەن ءومىر سۇرەتىن ء(اوا) مۇقتاج ادامداردى انتيرەتروۆيرۋستىق تەراپيامەن (ارت) قامتۋ ارتىپ كەلەدى.
ەگەر 2006 جىلى 54% ءاوا ومىرلىك قاجەتتى تەراپياعا قول جەتكىزگەن بولسا, بيىل جىل سوڭىنا قاراي بۇل كورسەتكىش 80 جەتەتىن بولادى. ايتۆ-ينفەكتسياسى ىندەتىن جويۋدىڭ الەمدىك ستراتەگياسىندا 2030 جىلعا قاراي زاماناۋي تاسىلدەر مەن 90:90:90 قاعيداتىنىڭ نەگىزىندە ددسۇ ماقساتتى كورسەتكىشتەرى قابىلداندى: ايتۆ-ينفەكتسياسى دياگنوستيكالانعان 90% ادامنىڭ بارلىعى انتيرەتروۆيرۋستىق تەراپيانى قابىلدايدى. ارت قابىلدايتىن 90% پايىز ناۋقاستا ايقىندالمايتىن ۆيرۋستىق اۋىرتپالىققا قول جەتكىزىلەتىن بولادى.
– بۇل كورسەتكىشتەرگە قول جەتكىزۋ ءۇشىن وتاندىق جيتس قىزمەتى الداعى جىلدان باستاپ «تەستىلەۋدەن وتكىز دە, ەمدە» ستراتەگياسىنا وتەدى. انتيرەتروۆيرۋستىق تەراپيا تەستىلەۋ كەزىندە انىقتالعان بارلىق ناۋقاسقا كلينيكالىق كورسەتكىشتەرىنە قاراماستان تاعايىندالادى. بۇل پروفيلاكتيكالىق شارا. باستى كۇتىلەتىن ناتيجە – تۇرعىندار اراسىندا ايتۆ-ينفەكتسياسىنىڭ بەلەڭ الۋىن توقتاتۋ بولىپ تابىلادى, – دەيدى قر دەنساۋلىق ساقتاۋ مينيسترلىگىنىڭ جيتس-تىڭ الدىن الۋ جانە وعان قارسى كۇرەس جونىندەگى رەسپۋبليكالىق ورتالىقتىڭ باس ديرەكتورى باۋىرجان بايسەركين.
سونداي-اق ءاوا-عا مەديتسينالىق كومەكتى كورسەتۋ جۇيەسىن جەتىلدىرۋدىڭ ارقاسىندا جىل سايىن ارت-مەن قامتۋدى ارتتىرۋدىڭ ناتيجەسىندە جيتس-تەن بولاتىن ءولىم-ءجىتىمنىڭ ازايعاندىعى بايقالادى.
ارت ساپاسىن, ناۋقاستاردىڭ ەمگە بەيىلدىلىگىن ارتتىرۋ ماقساتىندا جىل سايىن ەلدە قولدانىستاعى نورماتيۆتىك قۇجاتتاردىڭ جانە حالىقارالىق ۇسىنىمداردىڭ نەگىزىندە جاڭا انتيرەتروۆيرۋستىق پرەپاراتتار تىركەلۋدە, ەمدەۋدىڭ الدىڭعى قاتارلى سىزبالارى قولدانىلۋدا.
ارت-پرەپاراتتارىن ساتىپ الۋ يۋنيسەف جۇيەسى ارقىلى جۇزەگە اسىرىلادى. بۇل جاعداي ەلدەگى شەكتى باعالارمەن سالىستىرعاندا 2-دەن 40 ەسەگە دەيىن باعانى ايتارلىقتاي تومەندەتۋگە مۇمكىندىك بەرەدى.قارجىلاردى ۇنەمدەۋدىڭ ناتيجەسىندە بارلىق مۇقتاج پاتسيەنتتەردى انتيرەتروۆيرۋستىق ەممەن قامتۋدى ارتتىرۋ جانە تياناقتالعان مولشەرلەمەسى بار جاڭا ارالاس پرەپاراتتاردى قولدانۋدى ارتتىرۋ مۇمكىندىگى پايدا بولعان.
بۇگىندە قازاقستان رەسپۋبليكاسىندا تىركەلگەن 31 انتيرەتروۆيرۋستىق پرەپاراتتىڭ ىشىنەن – 26 كۇندەلىكتى تاجىريبەدە قولدانىلادى.
ايناش ەسالي,
«ەگەمەن قازاقستان».
الماتى
