ايماقتىق ارحيۆ قورىندا ساقتالعان مالىمەتتەرگە قاراعاندا, 1941-1942 جىلدارى ايماق تۇرعىندارى 702 899 سومنىڭ دۇنيەسىن جيناپ, 4791 جىلقىنى مايدانعا اتتاندىرعان. 1943 جىلى 376 370 سومدى اقشالاي تابىستاپ, وعان قوسىپ 2629 جىلقى بەرگەن. 1944 جىلى 103 768 سوم جيناپ, تاعى دا 791 ات دايىنداعان. 1945 جىلدىڭ باسىندا 1071 ات بەرگەن ەكەن.
وسى دۇنيەلەردى مايدانعا جەتكىزىپ, بايولكەلىكتەر اتىنان تابىستاۋ ءۇشىن سول كەزدەگى ايماق باسشىلارىنىڭ ءبىرى قاشقىنباي مالىك ۇلى 1942 جىلى قىسقا سالىم ماسكەۋگە قاراي بەتتەيدى.
قاشەكەڭ وسى ساپارى جايلى 1985 جىلى ۇلى جەڭىستىڭ 40 جىلدىق مەرەكەسى قارساڭىندا جارىق كورگەن ء«ومىر ورنەكتەرى» دەيتىن كولەمدى ەستەلىگىندە: «...1942 جىلدىڭ كۇزىندە مەنى ۇلان-باتىرعا شاقىردى. قىزىل ارمياعا كومەك اپاراتىن توپتىڭ قۇرامىنا ەنگىزىپتى. دەلەگاتسيانى مارشال ح. چويبالسىن باستاپ ءجۇردى. «رەۆوليۋتسيونايا مونگوليا» اتتى تانك كولونناسىن سىيعا تارتۋ ءۇشىن 1942 جىلى قاراشا ايىندا جولعا شىقتىق. 1943 جىلى 12 قاڭتار كۇنى ماسكەۋ ماڭىنداعى نارو-فومينسكي دەيتىن شاعىن قالاشىقتا موڭعول جۇرتىنىڭ قاراجاتىنا جاسالعان 53 تانكتى پولكوۆنيك م.ت.لەونوۆ باسقارعان 112-ءشى قىزىلتۋلى تانك بريگاداسىنا تاپسىرۋ ءراسىمى ءوتتى. مەن باي-ولكەلىكتەر بەرگەن تانكتى ەكيپاج كومانديرى رەزكوۆقا تاپسىردىم. ول مەنى تانككە وتىرعىزىپ, ءارى-بەرى الىپ ءجۇردى. بايولكەلىكتەر جيناپ بەرگەن ازىق-تۇلىك, كيىم-كەشەكتى سولداتتارعا ۇلەستىرىپ بەردىم. جيىن سوڭىندا بريگادا كومانديرى ء«بىز بۇل تانكىلەرمەن بەرليننىڭ كوشەسىن تاپتايمىز, دەدى», دەيدى.
مىنا سىزدەر كورىپ وتىرعان فوتوداعى تانك جوعارىداعى بايولكەلىك قازاقتاردىڭ مايدانعا جولداعان بايعازىسى. تانكتىڭ ۇڭعىسى ورنالاسقان قوزعالمالى جوعارى بولىگىندە «وت ارات باين-ۋلگەيسكوگو» دەگەن جازۋ تۇر. مۇنداعى «ارات» ءسوزى قازاقشا «حالىق» دەگەن ۇعىمدى بىلدىرەدى. دەمەك جوعارىداعى ءماتىندى تولىق قازاقشالاساق «باي-ولكە حالقى اتىنان» دەگەن ءسوز بولىپ شىعادى.
ينتەرنەت قورىندا جوعارىداعى 112-ءشى تانك بريگاداسى تۋرالى مالىمەت كوپ ەكەن. سىيعا بەرىلگەن 53 تانكتىڭ ونشاقتىسى 5375 شاقىرىم جول ءجۇرىپ بەرلينگە دەيىن بارعان. وسىلاردىڭ اراسىندا مىنا سۋرەتتەگى بايولكەلىكتەر تانكىسى دە بار.
بەكەن قايرات ۇلى,
«ەگەمەن قازاقستان»
