سونىڭ ءبىرى «ارۋ» – جىل سايىن كوكتەمدە الماتىدا, كۇزگە قاراي استانادا وتەتىن قازاقستانداعى زەرگەرلىك بيزنەستىڭ مامانداندىرىلعان كورمەسى بولىپ تابىلادى. 2003 جىلى پايدا بولىپ, قازىر جاپ-جاقسى تانىلعان «ارۋ» كورمەسى وسىنىڭ ارقاسىندا كۇللى ورتالىق ازياداعى زەرگەرلىك بۇيىمداردى كوتەرمەلەپ جانە بولشەكتەپ ساتۋدىڭ ەڭ ءتيىمدى الاڭىنا اينالىپ كەلەدى دەسەك بولادى. ءارى بۇل جارمەڭكە جىل سايىن زەرگەرلىك ونەردىڭ تاڭداۋلى تۋىندىلارىن ساتىپ الۋشىلار مەن باعالاۋشىلارىنا ەرەكشە بۇيىمداردى ۇسىنا الادى.
كورمە وسى كاسىپكە ماشىقتانۋىنىڭ ارقاسىندا قازاقستان, وزبەكستان, قىرعىزستاندا عانا ەمەس, شالعاي ەلدەردەگى زەرگەرلىك بيزنەس سالاسىنداعى ماماندارىنىڭ نازارىن وزىنە اۋدارا باستاعان. ماسەلەن ەكسپونەنتتەر قاتارىنا 2017 جىلى ارمەنيا, بەلگيا, گرۋزيا, رەسەي, تۇركيا, ۋكراينا جانە كونگودان 125 قاتىسۋشى ەنگەن. وتكەن جىلى كورمەگە كەلۋشىلەردىڭ تۇراقتى ءوسىپ كەلە جاتقان سانى 16 مىڭنان اسا جەكە جانە كوتەرمە ساتىپ الۋشىنى قۇراعان. بۇل دا وسى جوبانىڭ وزەكتىلىگىن دالەلدەيدى.
سونداي-اق «ارۋ» كورمەسىنىڭ اياسىندا زەرگەرلىك بۇيىمداردى وندىرۋشىلەر اراسىندا ۇزدىك بۇيىمداردىڭ بايقاۋى دا وتكىزىلەدى. بۇل بايقاۋ – زەرگەرلىك ونەركاسىپتى دامىتۋعا جانە وندا جۇمىس ىستەيتىن مامانداردىڭ كاسىبي وسۋىنە ىقپال ەتۋگە باعىتتالعان.
اتاۋلى سىيلىق بويىنشا جەڭىمپازدار بەدەلدى قازىلار القاسىنىڭ ءادىل شەشىمىمەن انىقتالىپ, بايقاۋ مەدالدارى, ديپلومدارىمەن ماراپاتتالادى. كورمەنىڭ ۇزدىك ءونىمى – قازاقستاندىق شەبەر زەرگەرلەر شىعارعان «ارۋ» كورمەسى لوگوتيپىنىڭ «گران-پري» التىن جالاتىلعان مۇسىنشەسى تابىس ەتىلەدى.
بيىلعى كورمەدە «ناۆيگاتور يۋۆەليرنوي تورگوۆلي» جۋرنالىنىڭ باس رەداكتورى وكسانا سەناتوروۆا «الەۋمەتتىك جەلىلەر مەن مەسسەندجەرلەردە زەرگەرلىك بيزنەستى ىلگەرىلەتۋ» تاقىرىبىنداعى سەمينار وتكىزدى. سەميناردا الەۋمەتتىك جەلىلەردىڭ ەرەكشەلىكتەرى مەن تىڭدارمانداردىڭ بەت-الپەتى, تارگەتينگتىڭ ءادىس-تاسىلدەرى, الەۋمەتتىك جەلىلەردەگى جارناما ءتۇرى, اقىلدى تاسپا, جىلدام رەماركەتينگ, جارنامالىق ناۋقانداردى باعالاۋدىڭ ءدال ادىستەرى, تابىستى بەتتەر مەن قاۋىمداستىقتاردى قۇرۋ ەرەجەلەرى تارقاتىلدى.
ايناش ەسالي,
«ەگەمەن قازاقستان».
الماتى
