ەلباسىنىڭ «بولاشاققا باعدار – «رۋحاني جاڭعىرۋ» باعدارلاماسى اياسىندا ۇيىمداستىرىلىپ, استانا ءتورىن 1-ءشى ساۋىردەن 5-ءشى ساۋىرگە دەيىن بەس كۇن بويى جىرعا بولەگەن بايقاۋ جىر جۇيرىكتەرىن ءۇش كەزەڭ بويىنشا سىننان وتكىزدى. جىر دوداسىنا رەسپۋبليكانىڭ تۇكپىر-تۇكپىرىنەن 20-45 جاس ارالىعىنداعى ونەرپازدار قاتىستى. قاتىسۋشىلار ءار كەزەڭدە ءبىرىنشى قابان جىراۋدىڭ ءبىر جىرىن ايتىپ, ەكىنشى ءوز قالاۋى بويىنشا جىرلاسا, ءۇشىنشى كەزەڭدە بيلەتتە شىققان جىردى توكپەلەتۋ تالاپ ەتىلدى. كوپ جىرشىنىڭ سۇرىنەتىن تۇسى دا وسى ءۇشىنشى كەزەڭ بولدى.
سايىسىقا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, پروفەسسور, قايرات بايبوسىنوۆ, سوناۋ اقتاۋدان كەلگەن ايگىلى جىرشى جەتكىزگەن سەيىتوۆ, سىر ەلى – جىر ەلىنەن مادەنيەتتانۋشى, بيداس رۇستەمبەكوۆ, قابان جىراۋ جىر توككەن جەتىسۋ جەرىنەن شاقىرىلعان حالىقارالىق «الاش» ادەبي سىيلىعىنىڭ لاۋرەاتى, اقىن, امىرە ءارىن, قازاقستاننىڭ ەڭبەك سىڭىرگەن قايراتكەرى ايتقالي جايىموۆ, مەملەكەتتىك «دارىن» جاستار سىيلىعىنىڭ يەگەرى, ءانشى ايگۇل قوسانوۆا, سونداي-اق, وسى بايقاۋدى ۇيىمداستىرىپ وتىرعان استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ باس ديرەكتورى ساكەن ءابدىراحمانوۆ قازىلىق ەتتى.
بايقاۋ قورىتىندىسى شىعار الدىندا ۇيىمداستىرۋشىلار مەن قازىلار القاسى ارنايى كونفەرەنتسيا وتكىزىپ, جارىستىڭ قالاي وتكەنى تۋرالى بايانداۋمەن بىرگە جۋرناليستەردىڭ سۇراقتارىنا ەگجەي-تەگجەيلى جاۋاپ بەردى. «الدىمەن, ارتىقشىلىقتارىنان باستايىن» دەگەن جىرشى جەتكىزگەن سەيىتوۆ: «سىر ەلىنىڭ جىرشىلارى ءبارىبىر مەكتەپ كورگەندىگىن بايقاتتى. بارىنە ورتاق كەمشىلىك, جىردى بويعا ءسىڭىرىپ ايتۋ جەتكىلىكسىز بولدى, ونىڭ سەبەپتەرى دە جوق ەمەس. بۇرىنعى جىرشىلاردىڭ جىر جاتتاپ ونى ەل ىشىندە جىرلاۋدان وزگە جۇمىسى بولماعان عوي, شىركىن, بۇلارعا ايلىق تولەپ, اي سايىن ەسەبىن سۇراپ وتىرسا قانشا جىردى جاتتار ەدى, بويىنا سىڭىرە وتىرىپ حالىققا قايتا جەتكىزەر ەدى. سوسىن بۇلاردىڭ مۇمكىندىگىن اشاتىن جىر كەشتەرى وتەتىن بولسا, اقپاراتتى ەستە ساقتاۋدىڭ ءوزى قيىنعا سوققان وسى كەزەڭدە بۇل جىرشىلىق داستۇرىمىزگە تاڭ قالمايتىن جۇرت بولماس ەدى», - دەدى. ال, ايتقالي جايىموۆ بولسا: «بۇرىنعى جىرشىلار جىرلاپ كەلىپ, اراسىندا قارا سوزبەن دە كوسىلتىپ-كوسىلتىپ الىپ ارى قاراي جالعايدى عوي, قازىرگى بالالار سول قاراسوزبەن ايتاتىن تۇسىندا كىبىرتىكتەپ جاتىر, ونى دا داڭعايىر جىراۋلارىمىز سەكىلدى كوركەم, كوسەمسوزبەن توگىلتىپ ايتۋعا جاتتىعۋ كەرەك. ال, ۇزاق جىردىڭ ءار ءبولىمىن ءارتۇرلى سارىنمەن ايتقان جىرشىلاردىڭ تالانتىنا شىنىمەن دە ءتانتى بولدىق», - دەدى. جۋرناليستەر ساۋالىنا ۇيىمداستىرۋشىلار اتىنان جاۋاپ بەرگەن ساكەن ءابدىراحمانوۆ بۇل بايقاۋدى بۇدان بىلاي ەكى جىلدا ءبىر رەت وتكىزىپ تۇرۋ جوسپارلانىپ وتىرعانىن جەتكىزدى. استانا قالاسىنىڭ اكىمدىگى, استانا قالاسىنىڭ مادەنيەت, مۇراعاتتار جانە قۇجاتتاما باسقارماسىنىڭ قولداۋىمەن وتكەن يگى شارا ەلورداداعى «استانا» كونتسەرتتىك زالىندا ارنايى كونتسەرتتىك باعدارلامامەن شىمىلدىعىن جاپتى.
قازىلاردىڭ باعاسى بويىنشا باس جۇلدە (2 000 000 تگ) استانالىق اينۇر قونىسباەۆاعا, I ورىن (1 000 000 تگ) استانالىق ەربولات شالدىبەكوۆكە, II ورىن (500 000 تگ) قىزىلوردالىق مارات سۇگىربايعا, III ورىن (250 000 تگ) الماتىلىق ماقپال توقتاعانوۆاعا بۇيىردى. ال امانجول داۋىلباەۆقا اسان قايعى اتىنداعى ارنايى ديپلومى, جۇلدىز ىسقاقوۆقا مادەنيەت جانە سپورت باسقارماسىنىڭ ارنايى ديپلومى تابىستالدى. سونداي-اق, فارحات ورازوۆ, حاسەنحان كىشكەنەەۆ, تەمىربەك اسقانباەۆتار ديپلومانت اتاندى.
ۇلاربەك نۇرعالىم ۇلى,
«ەگەمەن قازاقستان»
