شىنىندا دا, ىلۋدە ءبىر بولماسا, اۋىلدا تابا ناندى ىستىقتاي جەمەيتىنىمىز راس قوي. ىستىق ناندى ءبىر تۋراساڭ, سول بويىندا تۇگەلدەي جەلىنۋى كەرەك, ايتپەسە شيكى بولىپ قالادى دەيتىن. ايتەۋىر قاز-قاتار ءپىسىرىپ قويعان تابا ناننىڭ بۇرىن پىسكەنىن تۋراپ, جاڭا پىسكەنىن قالدىرا بەرەتىن ادەت ءالى دە بار. بۇل بۇرىن پىسكەن نان قاتىپ قالماسىن, ىسىراپ بولماسىن دەگەننەن تۋعان نيەت شىعار مۇمكىن.
وسىدان وتىز جىل بۇرىن الماتىعا بارعاندا باسىمنان وتكەن ءبىر قىزىق وقيعا ەسىمنەن كەتپەيدى. اۋىلدان الىپ قالاعا العاش اياق باسۋىم. الماتىنىڭ ناق ورتالىعىندا, پۋشكين كوشەسىندە تۇراتىن اكەمنىڭ نەمەرە اعايىنى عاينەش اعانىڭ پاتەرىنە تۇستىك. ءۇيدىڭ وتاناسى سوفيا جەڭگەي جارىقتىق, سويلەپ تۇرعان, وكتەمدەۋ, كىسى جۇمساعىش جان ەكەن. مەنى بىردەن دۇكەنگە نانعا جۇمسادى. لەنين داڭعىلىن كەسىپ ءوتىپ, «روسسيا» دۇكەنىنە باراتىن جولىمدى تاپتىشتەپ ءتۇسىندىردى.
ارينە ايتىلعان جەرگە بارىپ, سورەدە قاز-قاتار ءتىزىلىپ تۇرعان ناننىڭ ىشىنەن ابدەن كەۋىپ, قابىعى قاتقان ناندى تەرىپ اكەلدىم عوي. «اپىرماي, مىنا بولكەلەر ەندى بولماعاندا مۇلدەم جەمەستەي بولىپ قاتىپ قالادى ەكەن. وبال-اي» دەپ قويامىن ىشىمنەن.
...وبال-ساۋاپتى ويلاعان بالاڭ ارەكەتىمنىڭ سوڭى قالاي اياقتالعانىن وقىرمان ءوزى ۇعىپ وتىرعان شىعار. مەن اكەلگەن ناندى كورىپ, سوفيا جەڭگەي شوشىپ كەتتى. «بۇدان باسقا نان جوق پا ەكەن؟!» دەگەن تاڭدانىسقا تولى سۇراعىنا دۇكەندە ناننىڭ تولىپ تۇرعانى تۋرالى جاۋاپ العان سوڭ ءبىراز بۇرقىلدادى دەرسىڭ. «اۋىلدان شىقپاعان اڭقاۋ», ء«تىپتى نان تاڭداۋ بىلمەيتىن نادان» بالانى سىرتىنان ءبىراز سىباعان سياقتى...
بۇگىندە ءوزىمىز دە ابدەن قالالىق بولىپ الدىق قوي. سۋپەرماركەتكە كىرسەك, ناننىڭ ىستىعىن العىمىز كەلىپ تۇرادى. ءومىر-اي دەسەڭشى.
وسى, دۇكەندەردە قاتقان ناندى قايدا جىبەرەدى ەكەن, ءا؟!
قازبەك قۇتتىمۇرات ۇلى,
«ەگەمەن قازاقستان»
ورال
