باسقوسۋ بارلىق مۇددەلى تاراپتار اراسىندا بالالاردىڭ قۇقىقتارىن تولىق ىسكە اسىرۋ مەن وتباسىلارعا كومەك كورسەتۋدىڭ وزەكتى ماسەلەلەرى توڭىرەگىندە ءوربىدى. وتكەن جىلى ەلىمىزدە 154 ءجاسوسپىرىم ءوز-وزىنە قول جۇمساسا, جىل باسىنان بەرى 25 بالا ءومىرىن قيعان. دەگەنمەن زەرتتەۋشىلەر سوڭعى ۋاقىتتارى سۋيتسيد دەرەكتەرى ەداۋىر ازايعانىن ايتادى. بۇل تۇرعىدا جاسوسپىرىمدەر ءسۋيتسيدىنىڭ الدىن الۋ ماقساتىندا ارنايى جوبا ازىرلەنگەن ەدى. سونىڭ ناتيجەسىندە قىرشىن عۇمىرىن قيۋعا اسىققانداردىڭ سانى 35 پايىزعا ازايعان.
«TEENS – قولجەتىمدى جانە ساپالى كومەك» جوباسىنىڭ اياسىندا بىلتىرعى جىلى حالىقارالىق ساراپشىلارمەن بىرگە مەكتەپ ماماندارىنىڭ بىلىكتىلىگىن ارتتىرۋ ءۇشىن ارنايى باعدارلاما دايىندالعان. شارا بارىسىندا «اتا-انالاردىڭ توپتارىن باسقارۋ جانە جاسوسپىرىمدەرمەن جۇمىس» باعدارلاماسىنىڭ تانىستىرىلىمى ءوتتى. سونىمەن بىرگە اتالعان باعدارلاما ەنگەن الماتى قالاسىنداعى 15 مەكتەپتىڭ بازاسىنداعى اپروباتسيانىڭ ناتيجەسى ايتىلدى. كونفەرەنتسيادا اشىق كونكۋرس نەگىزىندە ىرىكتەلىپ الىنعان ءبىلىم جانە عىلىم مينيسترلىگى, UNICEF, «رۋحاني جاڭعىرۋ» جوبالىق كەڭسەسىنىڭ وكىلدەرى, جەرگىلىكتى ءبىلىم باسقارماسىنىڭ, جوو-نىڭ ماماندارى, حالىقارالىق ساراپشىلار ءوز ويلارىن ورتاعا سالدى.
«اكەگە قاراپ ۇل وسەر, اناعا قاراپ قىز وسەر» دەپ دانا حالقىمىز ايتقانداي, بۇگىنگى كۇن جاستارىن جەتىلگەن ازامات ەتىپ تاربيەلەۋ وتباسىلاردىڭ جاۋاپكەرشىلىگىن تاعى دا ارتتىرا تۇسۋدە. سەبەبى بالاعا سانالىلىقتىڭ سيپاتى ول ومىرگە كەلگەن كۇننەن باستاپ سول وتباسىندا بويىنا سىڭەدى. كەيىننەن مەكتەپ, قورشاعان ورتا جانە قوعامداعى بولىپ جاتقان ءارتۇرلى جاعدايلاردىڭ اسەرىمەن قالىپتاسادى. ءبىزدىڭ حالقىمىز ءۇشىن بالا تاربيەسى ءبىر عانا وتباسىنىڭ, نە بالاباقشانىڭ نەمەسە مەكتەپتىڭ جەكە ءىسى عانا ەمەس, ول بۇكىل زيالى قاۋىمنىڭ, بۇكىل قوعام شۇعىلداناتىن ۇلاعاتتى ءىستىڭ تۇتاس ءبىر كەشەنىنە اينالىپ وتىر. ەلباسىمىز ايتقانداي, «بالا تاربيەلەۋ – بولاشاققا ەڭ ۇلكەن ينۆەستيتسيا», سوندىقتان بۇل باعىتتاعى جۇمىستاردى ۇتىمدى ۇيىمداستىرۋ ءۇشىن ۇرپاق تاربيەسىندەگى وتباسىنىڭ ءرولىن باستى نازاردا ۇستاۋىمىز قاجەت», دەيدى الماتى قالاسى بويىنشا «رۋحاني جاڭعىرۋ» جوبالىق كەڭسەسىنىڭ وكىلى ايزات ساحوۆا.
شارادا بارلىق تاراپتار قازىرگى زامانعى مەكتەپتەگى وقىتۋ مەن تاربيەلەۋدىڭ وزەكتى ماسەلەلەرىن تالقىلاپ, مەكتەپ ماماندارىنىڭ بىلىكتىلىگىن كوتەرۋدىڭ يننوۆاتسيالىق باعدارلاماسى تۋرالى تاجىريبە الماستى. مەكتەپتەردەگى تاربيەلەۋدىڭ ادەتتەگى تاجىريبەسىن وزگەرتەتىن زاماناۋي تاسىلدەردى ەنگىزۋ بويىنشا ۇسىنىمدار كەشەنى ازىرلەنىپ, بالالاردىڭ قىلمىس, سۋيتسيدتىك مىنەز-ق ۇلىق, اتا-انالارمەن قارىم-قاتىناس سياقتى ماسەلەلەرىن شەشۋ جولدارى ءسوز بولدى.
– اتا-انا جينالىسقا كەلگەن كەزدە مۇعالىمنىڭ نەمەسە پسيحولوگتىڭ تاراپىنان ءوزىنىڭ بالاسى تۋرالى ەسكەرتۋلەر نەمەسە باسقا دا شاعىمدار ەستىمەيدى. جوبا كەرىسىنشە اتا-اناعا كومەك كورسەتۋ ءۇشىن جاسالادى. اتا-انالارعا بارىنشا اقپارات بەرۋ جۇمىس ىستەۋ داعدىلارىن كوتەرۋگە ىقپال ەتەدى. بۇگىنگى تاڭدا بۇل جوبا الماتى قالاسىندا عانا ەنگىزىلىپ وتىر. بولاشاقتا ونى قازاقستاننىڭ باسقا وڭىرلەرىنە دە ەنگىزۋدى جوسپارلاپ وتىرمىز, – دەيدى «Bilim Foundation» قوعامدىق قورىنىڭ جەتەكشىسى ەرلان ايتمۇحامبەتوۆ.
ارمان وكتيابر,
«ەگەمەن قازاقستان»
الماتى
