ءبىر عاجابى, ورماندى القاپتاردا شوقتالا دا وسەتىن, قاتارلاسىپ تا, جەكە-دارا دا بوي تۇزەيتىن اققايىڭدار قاشاندا ادام جانى مەن سەزىمىن ەڭ الدىمەن اق ءجۇزدى سىرلى سىمباتىمەن باۋراعان. بۋرابايداعى قالىڭ قاراعايمەن ارالاسا ۇيلەسىپ, باۋىرلاسا ۇندەسىپ, ءبىر-بىرىنەن اجىراماي وسەتىن وسى ءبىر اعاشتاردىڭ تىرشىلىگى مەنى ەرىكسىز تاڭعالدىرادى. سوندىقتان با ەكەن, سۇلۋ جەلەكتى كوركەم اققايىڭدارعا كوز سالماي كەتە المايتىن قاشانعى داعدىمنان اينىماي كەلەمىن. بۋراباي قاراعايلارى وزىنە ەنشىلەس تە ەتەنەلەس اققايىڭداردى ۇنەمى اياسىنا الىپ, ايالاپ تۇرعانداي اسەرگە بولەيدى مەنى! قاراعاي مەن اققايىڭ بۋرابايدا ءدايىم دە وزدەرىنىڭ وسىنداي ەگىز بولمىسىمەن وزگە اعاشتاردان وزگەشەلەنىپ ءومىر سۇرەتىن ءتارىزدى كورىنەدى ماعان: قاراعاي – جىگىت, اققايىڭ – قالىڭدىق. مىنە, تابيعات بەينەسىندەگى ناعىز ماحاببات اڭىزى. ايتىڭىزشى, اڭىزدار ولكەسىندە باسقاشا بولۋى مۇمكىن بە!..
ءمادي ايىمبەتوۆ,
جازۋشى
