بۇل باستامالار ەلدە بۇعان دەيىن قابىلدانعان «100 ناقتى قادام» ۇلت جوسپارىنىڭ جانە پرەزيدەنتتىڭ بيىلعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا كورسەتىلگەن 10 باسىم مىندەتتىڭ تالاپتارىمەن سايكەس كەلەدى.
سونىمەن قاتار بۇل باستامالار ءبىر جاعىنان اۋىل شارۋاشىلىعى سالاسىن دامىتۋعا, تابىسى تومەن وتباسىلاردى قولداۋعا باعىتتالعان.
بۇل باستامالاردى بارلىق قازاقستاندىقتارعا پايدا اكەلەتىن تەڭگەرىمدى باعدارلاما دەپ تانۋعا بولادى. ەڭ الدىمەن, ول تۇرعىن ءۇي قۇرىلىسى مەن ونى ساتىپ الۋ ءۇشىن ءتيىمدى نەسيەلىك باعدارلاما ۇسىنادى. حالىق وسى ارقىلى ءتيىمدى مۇمكىندىكتەردى قولدانىپ, ياعني تابىسى از بولعانىمەن تومەن پايىزدىق مولشەرلەمە ارقاسىندا وزدەرىنىڭ باسپانا ماسەلەسىن شەشىپ الۋىنا بولادى. بۇل گەرمانياداعى باۋشپار (Bauspar) جوباسىنا ۇقسايدى.
بۇدان بولەك, تومەنگى جالاقى تولەيتىن سەكتورداعى قىزمەتكەرلەردىڭ جوسپارلانعان سالىقتىق جەڭىلدىكتەر ارقىلى جالاقىسىن ءوسىرۋ دە حالىق ءۇشىن يگى باستاما بولىپ تابىلادى. مۇنىڭ ناتيجەسىندە ەلدەگى ەكى ميلليون ادامعا قارجىلىق قولداۋ كورسەتۋ جۇزەگە اسىرىلادى. بۇل ەكونوميكالىق دامۋعا, قارجى سەكتورىنىڭ نىعايۋىنا ىقپالىن تيگىزەدى.
مەنىڭ ويىمشا, ەڭ ماڭىزدى باستاما – ساپالى جوعارى بىلىمگە قولجەتىمدىلىكتى ارتتىرۋ. بۇل قادام جاھاندانۋ كەزەڭىندە قازاقستان ەكونوميكاسىنا قاجەتتى بىلىكتى عالىمداردى قولداۋ ءۇشىن وتە ماڭىزدى. ول, ەڭ الدىمەن, ەكونوميكانى تسيفرلاندىرۋ مەن ارتاراپتاندىرۋعا قاتىساتىن باستاۋشى ينجەنەرلەردى دايىنداۋعا ارنالعان.
سونداي-اق قازاقستان پرەزيدەنتىنىڭ بەس الەۋمەتتىك باستاماسىنىڭ ىشىندەگى ءتورتىنشىسى كوپتەگەن قازاقستاندىقتار ءۇشىن وتە قاجەت ماسەلە دەپ ويلايمىن. ويتكەنى بۇل باستامادا ميكروكرەديتتەۋ جانە ءوزىن-ءوزى جۇمىسپەن قامتۋ ءۇشىن قارجى رەسۋرستارىن ۇلعايتۋ ءىسى قامتىلعان.
ەلدىڭ وڭتۇستىگىندەگى قىزىلوردا وبلىسىنان استانا قالاسىنا دەيىنگى گاز قۇبىرىنىڭ قۇرىلىسىن سالۋ ءىسى دە ن.نازارباەۆ كوتەرگەن باستامالاردىڭ ىشىندەگى ماڭىزدىسى دەپ ويلايمىن. ول قازاقستاننىڭ گازداندىرىلۋىن جەدەلدەتىپ, بىرقاتار قالالارداعى ەكولوگيالىق جاعدايدىڭ جاقسارۋىنا اسەر ەتەدى.
قورىتا ايتقاندا, قازاقستان پرەزيدەنتى ۇسىنعان, قازاقستاندىقتار ءۇشىن اسا ماڭىزدى بۇل بەس الەۋمەتتىك باستامانى يگىلىكتى قادام دەپ ەسەپتەيمىن.
ماتياس دورنفەلد,
پوتسدام ۋنيۆەرسيتەتىنىڭ ورتالىق ازيا جانە وڭتۇستىك كاۆكاز ەلدەرى بويىنشا ساراپشىسى (گەرمانيا)
