سوندىقتان دا يندۋستريالىق ايماق قۇرۋعا جاۋاپتى مەكەمەلەر اۋەلى ايماقتارعا كاسىپكەرلەردى تارتۋ, كاسىپكەرلەردىڭ سۇرانىسقا يە ءونىم تۇرلەرىن شىعارۋ مۇمكىندىكتەرىن زەردەلەۋ, سونداي-اق ولاردى قۇرۋدىڭ قارجىلاندىرۋ تەتىگىن قاراستىرۋ جۇمىستارىن ۇيىمداستىرۋى قاجەت. بۇگىنگى تاڭدا وڭىردە يندۋستريالىق جانە اگرارلى-يندۋستريالىق ايماقتار قۇرۋ اسا ماڭىزدى بولىپ وتىر.
قازىردە اتالعان ماسەلە بويىنشا ءوڭىردىڭ ءاربىر اۋداندارى مەن وبلىس ورتالىعىندا جەر تەلىمدەرىن ءبولۋ جۇمىستارى باستالدى. ماسەلەن, تاراز قالاسىنىڭ تۇرعىندارى ءۇشىن ءبىر كەزدە «پرومزونا» اتالىپ كەتكەن اۋداننان يندۋستريالىق ايماق قۇرۋ ءۇشىن 68 گەكتار جەر بولىنگەن. الايدا ولاردىڭ تەڭ جارتىسى كەزىندە جەكەمەنشىككە ءوتىپ كەتكەن ەكەن. بىراق جەر يەلەرىنىڭ كەيبىرى ءوز ۇلەستەرىن مەملەكەتكە ساتۋعا كەلىسىم بەرسە, ەندى ءبىرى ونى جەكە ماتساتقا پايدالانۋدى كوزدەپ وتىر. دەي تۇرعانمەن قالا اكىمدىگى بۇگىندە 38,8 گەكتار القاپقا 2,5 ميلليارد تەڭگەگە يندۋستريالىق ايماق قۇرۋدى جوسپارلاپ وتىرعانىن جەتكىزدى. كورسەتىلگەن قارجىنىڭ نەگىزگى بولىگىنە ايماققا ينفراقۇرىلىم تارتۋ جوسپارلانعان.
بۇگىنگى تاڭدا وبلىس اكىمدىگى تاراپىنان كەلەشەكتە يندۋستريالىق ايماقتاردىڭ اۋماعىن كەڭەيتۋ, وندىرىستىك نىسانداردى دامىتۋ جوسپارلارى مەن سالىق بويىنشا بەرەشەك قارىز كولەمىن ناقتىلاۋ, سونداي-اق جامبىل وبلىسىندا سۇرانىسقا يە كاسىپ تۇرىمەن اينالىسۋعا نيەت ەتكەن وزگە وڭىرلەردىڭ كاسىپكەرلەرىنە قولداۋ ءبىلدىرۋ جانە يندۋستريالىق ايماق كاسىپكەرلەرىنىڭ ونىمدەرىن سۇرانىسقا يە ەتۋ, ولارعا ءتۇرلى جەڭىلدىكتەر جاساۋ باعىتىندا ناقتى جۇمىستاردى قولعا الۋ تاپسىرىلىپ وتىر. اتالعان تاپسىرمالار مەن ۇسىنىستار تولىقتاي ورىندالعان جاعدايدا اۋليەاتا ءوڭىرىنىڭ يندۋستريالىق ايماق قۇرۋداعى الەۋەتى ايرىقشا كورىنبەك.
سونىمەن قاتار بۇل باعىتتاعى جۇمىستار وبلىس اۋداندارىندا دا باستالىپ كەتتى. ايتالىق, تالاس اۋدانىندا اتالعان ماقساتقا 40 گەكتار جەر ءبولىنىپ, ونداعى ءتيىستى جۇمىستاردى جۇرگىزۋدىڭ جالپى قۇنى 1 ميلليارد 27 ميلليون تەڭگەگە باعالانعان. ايتا كەتەتىن ءبىر ماسەلە, تالاس اۋدانىنداعى بولىنگەن 40 گەكتار جەردىڭ 20 گەكتار جەرىنە كاسىپكەرلەر تاراپىنان بۇگىندە سۇرانىس ءتۇسىپ ۇلگەرىپتى. ال سارىسۋ اۋدانى وڭىردەگى جەر كولەمى جونىنەن ۇلكەن اۋداننىڭ ءبىرى. سوندىقتان وسى اۋداننان يندۋستريالىق ايماق قۇرۋ ءۇشىن 60 گەكتار جەر بولىنگەنمەن, اۋدان ورتالىعى جاڭاتاس قالاسىنان شالعاي ورنالاسقان جەر تەلىمدەرىنە ينفراقۇرىلىم تارتۋ جۇمىستارى ەداۋىر قارجىنى قاجەت ەتەدى. سوندىقتان دا بۇگىنگى تاڭدا اۋدانداعى يندۋستريالىق ايماق قۇرۋ ماسەلەسى ءۇشىن اتالعان ماقساتقا ارنالعان جەر جاڭاتاس قالاسى اۋماعىنان قاراستىرىلىپ وتىر.
شۋ اۋدانى دا وڭىردەگى الەۋەتى مۇمكىندىگى جوعارى اۋداننىڭ ءبىرى. سوندىقتان دا اۋداندا 25 گەكتار جەرگە يندۋستريالىق ايماق قۇرىلاتىن بولادى. سول سەكىلدى قورداي, جامبىل اۋداندارىنىڭ دا بۇل تۇرعىدان مۇمكىندىگى مول. جالپى, يندۋستريالىق ايماق قۇرۋ ماسەلەسى بۇگىندە وڭىردە قارقىن الىپ وتىر. ارينە يندۋستريالىق ايماق قۇرۋ ماسەلەسىندە وبلىستىڭ جەر قورىن ءتيىمدى پايدالانۋ ماسەلەسى العا شىعادى. جامبىل وبلىسىندا جالپى جەر كولەمى 14 ميلليون گەكتارعا جۋىقتايدى. سوندىقتان دا بۇگىندە وڭىردە جەر قورىن ءتيىمدى پايدالانۋ ارقىلى يندۋستريالىق ايماقتار قۇرۋعا دەگەن سۇرانىس جوعارى.
ەلباسى نۇرسۇلتان نازارباەۆ الەۋمەتتىڭ الەۋەتىن ارتتىرۋ ءۇشىن, ەكونوميكانىڭ دەڭگەيىن كوتەرۋ ءۇشىن ءوز جولداۋلارىندا ءتۇرلى باعدارلامالار ارقىلى جۇمىس ىستەۋ قاجەتتىگىن ايتىپ كەلەدى. سوندىقتان دا بۇگىندە ەلىمىزدە كاسىپكەرلىكتى قولداۋ ماسەلەسى كەڭ ءورىس الىپ وتىر. ەندىگى جەردە يندۋستريالىق ايماق قۇرۋ كەزىندە كاسىپكەرلەر سۇرانىسقا يە ءونىم تۇرلەرىن شىعارىپ, ەكونوميكانىڭ قارىشتى دامۋىنا جول اشسا, وندا بۇل دا ماقساتتىڭ ورىندالىپ, جوبانىڭ جۇزەگە اسقانى.
حاميت ەسامان,
«ەگەمەن قازاقستان»
جامبىل وبلىسى
