شاراعا بەلگىلى مەملەكەت جانە قوعام قايراتكەرى مىرزاتاي جولداسبەكوۆ, اكادەميك سەرىك قاسقاباسوۆ, «ەگەمەن قازاقستان» گازەتىنىڭ باسقارما توراعاسى دارحان قىدىرالى سياقتى زيالى قاۋىم وكىلدەرى قاتىسىپ, جۇرەكجاردى لەبىزدەرى مەن سىرلى ەستەلىكتەرىن ايتتى. جيىنعا بەلگىلى عالىم شاكىر ىبىراەۆ مودەراتور بولدى.
بيىل بۇل اكتسيا اياسىندا ەلىمىزدە ءۇش بىردەي قالامگەردىڭ كىتاپتارى وقىلماق. شاكارىم قۇدايبەردى ۇلى, باۋىرجان مومىش ۇلى, نەمات كەلىمبەتوۆتىڭ شىعارمالارى اقىل, ەرلىك, جىگەردىڭ ۇلگىسىندە وقىرماندارعا ۇسىنىلىپ وتىر.
«نەمات كەلىمبەتوۆ ەكەۋىمىز قۇرداس ەدىك. ونىڭ كوزى ءتىرى كەزىندەگى عۇمىرىنىڭ قيىندىعى مول بولسا, ەكىنشى ءومىرى داڭعىلعا ۇلاستى. مىنا دۇنيەدە قانشاما اسىل ازاماتتار ءوتتى. بىراق ارتىندا ىزدەۋشىسى بولماعان سوڭ, كەيبىرى ۇمىت بولىپ بارادى. ال نەماتتىڭ قايرات سەكىلدى اسىلدان تۋعان ۇلى بار. اكەسىن ىزدەپ, جوقتاپ جۇرگەندەر كوپ ەمەس», دەپ تولعاندى العاشقى ءسوز كەزەگىن العان مىرزاتاي جولداسبەكوۆ.
كورنەكتى تۇركىتانۋشى عالىم, جازۋشى, اۋدارماشى, فيلولوگيا عىلىمدارىنىڭ دوكتورى, قازاقستان رەسپۋبليكاسى گۋمانيتارلىق عىلىمدار اكادەمياسىنىڭ اكادەميگى, پروفەسسور نەمات كەلىمبەتوۆتىڭ ەسىمى حالقىمىزعا ەتەنە جاقىن. ونىڭ ء«ۇمىت ۇزگىم كەلمەيدى», « ۇلىما حات», «قاريالار», «كۇنشىلدىك» سياقتى پوۆەستەر مەن ەسسە كىتاپتارى وقىرماندارىنىڭ جۇرەگىنەن بەرىك ورىن العان, فيلوسوفيالىق تولعانىسقا تولى ەڭبەكتەر.
ن.كەلىمبەتوۆتىڭ قازاق ادەبيەتىنىڭ بايىرعى باستاۋ-بۇلاقتارىن زەرتتەۋدەگى ەڭبەگى زور. ونىڭ «قازاق ادەبيەتىنىڭ ەجەلگى ءداۋىرى», «ەجەلگى ءداۋىر ادەبيەتى», «ەجەلگى تۇركى پوەزياسى جانە قازاق ادەبيەتىندەگى ءداستۇر جالعاستىعى», «قازاق ادەبيەتى باستاۋلارى», «ەجەلگى ادەبي جادىگەرلەر» سياقتى زەرتتەۋ ەڭبەكتەرى – ۇلتتىق ءسوز ونەرىنىڭ ءتۇپ-تامىرىنا تەرەڭدەپ بارعان تىڭعىلىقتى ەڭبەك. عىلىم جولىنداعى قايراتى ءۇشىن نەمات كەلىمبەتوۆ كۇلتەگىن اتىنداعى سىيلىقتىڭ لاۋرەاتى اتاندى.
ل.گرۋنتستىڭ «شىركىن ءبىزدىڭ شۋشيكەنت», ۆ.كوزاچەنكونىڭ «نايزاعاي», س.احمادتىڭ «كوكجيەك», پ.قادىروۆتىڭ «جۇلدىزدى تۇندەر» روماندارىن توگىلدىرە تارجىمالاعان نەمات كەلىمبەتوۆتىڭ كوركەم اۋدارماعا قوسقان ۇلەسى دە قوماقتى.
«نەمات كەلىمبەتوۆتىڭ ساق زامانىنان باستاپ قازىرگى قازاق ادەبيەتىنە دەيىنگى ارالىقتى جۇيەلەپ, ناقتى كونتسەپتسياسىن جاساپ, قولىمىزعا بەردى. قازىرگى كەزدە جوعارى وقۋ ورىندارىنىڭ بارلىعىندا ءپان رەتىندە وقىتىلادى. نەمات كەلىمبەتوۆكە دەيىن بەيسەمباي كەنجەباەۆتىڭ باس بولۋىمەن قازاق ادەبيەتىنىڭ تاريحى ورحون-ەنيسەي ەسكەرتكىشتەرىنە دەيىن جەتكەن بولاتىن. وسىنداي ەڭبەكتى جازۋ بارىسىندا عالىمنىڭ الدىندا ۇلكەن قاۋىپتەر تۇرادى. ونى پروتسەسس رەتىندە بەرە الماساڭ, حرونولوگيالىق سيپاتتا عانا بولىپ قالادى. ال نەمات كەلىمبەتوۆ ونى ۇلكەن ۇدەرىس رەتىندە جۇيەلەپ بەردى. عاسىردان عاسىرعا, كەڭىستىكتەن كەڭىستىككە ەركىن, عىلىمي تۇجىرىمدارىمەن ءوتىپ وتىرادى. بۇل تۇلعانىڭ عالىم رەتىندەگى باستى ەرەكشەلىگى.
نەمات كەلىمبەتوۆتىڭ جيناعان جادىگەرلەرى ارقىلى ادەبيەت تەورياسىنىڭ جەتكەن نەگىزگى جەتىستىگى جانر, پوەتيكالىق فورمالار, ءتۇر مەن ءپىشىن, تاقىرىپ پەن مازمۇن. مەن وسىنى قاراپ وتىرسام, نەمات اعامىز ءبىرشاما جاقسى جيناقتاعان. بۇل قازاق ادەبيەتىنە قوسىلعان ۇلكەن ۇلەس بولدى» دەدى جيىن تىزگىنىن ۇستاعان شاكىر ىبىراەۆ.
ج ۇلىن-ومىرتقا اۋرۋىمەن اۋىرىپ, جىلدار بويى اياق-قولى قوزعالماي توسەككە تاڭىلىپ جاتقان جازۋشى-عالىمنىڭ وسىنشاما ەڭبەكتەرى مەن ىزدەنىستەرى ونىڭ ومىرگە قۇشتارلىعى مەن قايسارلىعىنىڭ جەمىسى. ءوزىنىڭ قيىن تاعدىرىن جازۋشى نەمات كەلىمبەتوۆ ء«ۇمىت ۇزگىم كەلمەيدى» حيكايات-مونولوگىندە تەرەڭ تەبىرەنىسپەن جەتكىزەدى.
تالايلى تاعدىردى باسىنان كەشىرگەن, ەكى كوزى كورمەي توسەكتە تاڭىلىپ جاتسا دا دۇنيەدەن ءۇمىتىن ۇزبەي, ايگىلى «قۇرىش قالاي شىنىقتى؟» رومانىن جازعان نيكولاي وستروۆسكيمەن نەمات كەلىمبەتوۆتى سالىستىرىپ تا ايتىپ جاتادى. تاعدىرى ۇقساس تۇلعالار بولادى. نەمات كەلىمبەتوۆ ءوزىنىڭ ولمەس شىعارمالارىمەن, قۇندى ەڭبەكتەرىمەن قازاق جۇرەگىنەن ورىن العان اياۋلى تۇلعا بولىپ قالا بەرمەك.
باعاشار تۇرسىنباي ۇلى,
سۋرەتتى تۇسىرگەن ورىنباي بالمۇرات,
«ەگەمەن قازاقستان»
