سالتاناتتى جيىنعا كونستيتۋتسيالىق كەڭەس توراعاسى قايرات ءمامي, ءبىلىم جانە عىلىم ۆيتسە-ءمينيسترى اسحات ايماعامبەتوۆ, كونستيتۋتسيالىق كەڭەس مۇشەسى ۋنزيلا شاپاققىزى, قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ اتقارۋشى ديرەكتورىنىڭ كەڭەسشىسى ءاليا قايشاروۆا قاتىستى.
كەزدەسۋدە العىسوزدى العان قايرات ءمامي كونستيتۋتسيانىڭ ماڭىزدىلىعىن ەگجەي-تەگجەيلى ءتۇسىندىرىپ بەردى. سونىمەن قاتار قازاقستاننىڭ دامىعان 30 ەلدىڭ قاتارىنا كىرۋىنە كۇش سالاتىنىن ايتا كەلىپ, بۇل جولدا ءبىلىمدى جاستاردىڭ ورنى ەرەكشە ەكەنىن ەسكە سالدى.
كونكۋرس كونستيتۋتسيانىڭ كەمەلدى قۋاتتىلىعىن نىعايتۋ, ونى كەڭىنەن ناسيحاتتاۋ, سونداي-اق جاستاردىڭ قۇقىق سالاسىنداعى ءبىلىمىن ارتتىرۋ ماقساتىندا ۇيىمداستىرىلدى. تۇتاستاي العاندا رەسپۋبليكانىڭ تۇكپىر-تۇكپىرىنەن باس-اياعى 429 جۇمىس ءتۇسىپتى. ونىڭ 283-ءىن ستۋدەنتتەردەن كەلسە, قالعان 146 ەسسەنى ەلوردالىق وقۋشىلار جازعان.
ءوز كەزەگىندە اسحات ايماعامبەتوۆ مۇنداي اۋقىمدى ءىس-شارا العاش رەت ءوتىپ وتىرعانىن ايتا كەلىپ, جاستاردىڭ قۇقىقتىق مادەنيەتىن ارتتىرۋ ماڭىزدى ەكەنىن جەتكىزدى.
بايقاۋدىڭ قورىتىندىسى بويىنشا ستۋدەنتتەر اراسىندا 1-ورىن العان قازاق ۇلتتىق ۋنيۆەرسيتەتىنىڭ 2-كۋرس ستۋدەنتى داستان قاستاي اتا-بابامىزدىڭ زاڭعا بۇرىننان جاقىن ەكەنىن ايتىپ, ويىمەن ءبولىستى.
– تاريحقا كوز جۇگىرتەر بولساق, تۇركى حالقىنىڭ دالا زاڭدار جيناعى بولعان. ودان كەيىن شىڭعىس حاندى الايىق, «جاساق» زاڭدار جيناعى كوپشىلىككە بەلگىلى. سول سياقتى ابايدىڭ كوپشىلىك بىلە بەرمەيتىن 74 باپتان تۇراتىن «قاراموللا» ەرەجەسى بار. مىنە وسىعان قاراپ-اق بابالارىمىز ءتارتىپتى سول كەزدە ورناتىپ ۇلگەرگەنىن بايقاۋعا بولادى. ال ەۋروپا ول كەزدە ءالى فەودالدىق قۇرساۋدا جاتقان ەدى, – دەيدى ورەنىمىز.
ال وقۋشىلار اراسىندا 1-ورىندى يەلەنگەن استانا قالاسى №48 مەكتەپ-ليتسەيىنىڭ 11-سىنىپ وقۋشىسى ءايبيبى ەرجانقىزى بولاشاقتا زاڭ سالاسىندا قىزمەت ەتۋدى ارماندايتىنىن ايتا كەلىپ, مۇنداي جارىستار الداعى ۋاقىتتا كوبىرەك ۇيىمداستىرىلسا ەكەن دەگەن تىلەگىن جەتكىزدى.
ماراپاتتاۋ ءراسىمى اياقتالعاننان كەيىن ۋنزيلا شاپاققىزى كونستيتۋتسيالىق كەڭەستىڭ قىزمەتى تۋرالى بايانداما جاسادى. ال جۋرناليستەرگە بەرگەن پىكىرىندە ول ەل ءۇمىتىن اقتايتىن, كونستيتۋتسيانى قۇرمەتتەيتىن پاتريوت جاستاردىڭ جاڭا بۋىنى ءوسىپ كەلە جاتقانىنا سەنىمدىلىك ءبىلدىردى. سونىمەن قاتار وقۋشىلار اراسىنداعى ەسسە جارىسى رەسپۋبليكا كولەمىندە ۇيىمداستىرۋ جوسپاردا بارىن جاسىرىپ قالمادى.
ايان ءابدۋالي,
«ەگەمەن قازاقستان»
