ءىس-شاراعا اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتى توراعاسىنىڭ مىندەتىن اتقارۋشى تۇرسىن قابۋلدانوۆ قاتىسىپ, مينيسترلىك مەملەكەت باسشىسىنىڭ تاپسىرماسىن ورىنداۋ اياسىندا وتاندىق ونىمدەردى ىلگەرىلەتۋ جانە تاۋارلار-
دى حالىقارالىق نارىقتارعا شىعارۋ ماقساتىندا ستراتەگيالىق ىزدەۋ جۇمىستارىن جالعاستىرىپ وتىرعانىن جەتكىزدى.
«اۋىل شارۋاشىلىعى مينيسترلىگى مال شارۋاشىلىعى ونىمدەرىن ەكسپورتقا شىعارۋ باعىتىندا كەشەندى جۇمىستار اتقارۋدا. ونىڭ ىشىندە كورشىلەس قىتاي ەلىنە ەكسپورتقا شىعارۋ ماسەلەلەرى قاراستىرىلۋدا. قىتاي حالىق رەسپۋبليكاسىنىڭ ساپا باقىلاۋ جانە كارانتين باسقارماسىنىڭ سايتىندا قازاقستاننىڭ 9 وبلىسىنان قحر-عا مۇزداتىلعان قوي ەتىن يمپورتتاۋعا رەسمي شەشىم قابىلدانعان اقپارات شىقتى. قحر-دان 2017 جىلى قازاقستاننىڭ 5 كاسىپورنى ينسپەكتسيا جاسالىپ, تەكسەرىلىپ, ولار قىتاي حالىق رەسپۋبليكاسىنىڭ رەەسترىنە ەنگىزىلگەن. بۇگىنگى كۇنى قازاقستاننىڭ 9 وبلىسىنان 5 كاسىپورىن ارقىلى قىتايعا قويدىڭ مۇزداتىلعان ەتىن ەكسپورتتاۋعا جول اشىلدى», دەدى ت.قابۋلدانوۆ.
قىتاي حالىق رەسپۋبليكاسىنا مۇزداتىلعان قوي ەتىن ەكسپورتتايتىن 9 وبلىستىڭ ىشىندە قاراعاندى, باتىس قازاقستان, اقتوبە, اتىراۋ, پاۆلودار, قوستاناي وبلىستارى بار. اتالعان ايماقتار اۋسىل اۋرۋلارىنا قارسى ۆاكتسينا ەگىلمەيتىن تازا وڭىرلەر بولىپ سانالادى.
«سونىمەن قاتار يران ەلىمەن دە حاتتاما تولتىرىلعان. ۆەتەرينارلىق سەرتيفيكاتتارى كەلىسىلگەن. بىلتىر ول ەلگە 4800 باس قوي تىرىدەي جونەلتىلدى. جانە ساۋد ارابياسىمەن دە كەلىسىم شارالارى جۇرگىزىلىپ, وتكەن جىلى بىرىككەن اراب امىرلىكتەرىنە 3400 باس قوي تىرىدەي ەكسپورتتالدى. ونىڭ سىرتىندا وسى ەلگە سيىر مەن قوي ەتى دە جونەلتىلدى. سونداي-اق قىتاي ەلىنە ءبىرىنشى رەت 2017 جىلدىڭ جەلتوقسان ايىندا 153 باس اسىل تۇقىمدى قولدانىستا بولاتىن جىلقىلار تىرىدەي ەكسپورتتالدى», دەدى كوميتەت توراعاسى.
راۋان قايدار,
«ەگەمەن قازاقستان»
