سەيسەنبى كۇنگە دەيىن شىمكەنت قالالىق جۇقپالى اۋرۋلار اۋرۋحاناسىنا ءجىتى ىشەك ينفەكتسياسىمەن 188 ادام تۇسكەن. ولاردىڭ 101-ءى ەرەسەك, 39-ى بالالار بولسا, 48-ءى ءجاسوسپىرىم. ال 3 ساۋىردە ناۋقاستاردىڭ 99-ى ۇيلەرىنە قايتارىلعان. قالعان ناۋقاستاردىڭ جاعدايلارى ورتا دارەجەدە. الداعى كۇندەرى تاعى 50-60 ناۋقاس اۋرۋحانادان شىعارىلماق. بۇل دەرەكتەردى وڭتۇستىك قازاقستان وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزباەۆ ارنايى بريفينگتە ءمالىم ەتتى. باسقارما باسشىسىنىڭ ايتۋىنشا, دەر كەزىندە دارىگەرلەردىڭ كومەگىنە جۇگىنگەن ناۋقاستار باسىم. دەگەنمەن ۇيدە وزىنشە ەمدەلگەنىنەن ناتيجە شىقپاي دارىگەرگە كەش كەلگەندەر دە از ەمەس.
شىمكەنت قالاسى تۇرعىندارىنىڭ ۋلانۋىنا, بۇدان بۇرىن حابارلاعانىمىزداي, «يۋجنوە» ءدامحاناسىنا قاراستى دۇڭگىرشەكتەن ساتىلعان قۇيمالى بالمۇزداق سەبەپكەر بولىپ وتىر. دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتى وقو دەپارتامەنتىنىڭ باسشىسى نۇربەك نىشانوۆتىڭ مالىمدەۋىنشە, اتالمىش دامحاناعا جوسپاردان تىس تەكسەرۋ جۇرگىزىلگەن. ساتىلىپ جاتقان ونىمدەردىڭ سىنامالارى, جابدىقتاردىڭ سۇرتىندىلەرى الىنىپ, بىرقاتار كەمشىلىكتەر انىقتالعان. «بالمۇزداق كيوسكىسى ەلەۋسىز نىسان رەتىندە سانالادى. ياعني جوسپارلى تەكسەرۋگە جاتپايدى. بىراق بالمۇزداق دۇڭگىرشەگىنىڭ يەسى نىساندى ىسكە قوسار الدىندا جەرگىلىكتى باسقارمالارعا حابارلاما بەرۋى ءتيىس ەدى. ول حابارلاما بەرمەگەن. سوندىقتان قىزمەتكەرلەرى, نىسان تەكسەرىلمەگەن. قازىر وسىعان بايلانىستى اكىمشىلىك ءىس قوزعالدى. دۇڭگىرشەك جۇمىسى سوت شەشىمى شىققانشا توقتاتىلدى. وسى وقيعادان كەيىن بالمۇزداق, تەز بۇزىلاتىن ونىمدەر ساتاتىن ساۋدا ورىندارىمەن ءتيىستى جۇمىستار وبلىس بويىنشا جۇرگىزىلۋدە», دەدى ن.نىشانوۆ. تۇتىنۋشىلارىن توسەككە تاڭعان بالمۇزداق ۇيدە دايىندالعان ەكەن. دەپارتامەنت باسشىسىنىڭ ايتۋىنشا, ۇيدە دايىندالعان ءونىم پوليەتيلەن ىدىسپەن جانە جەكە كولىكپەن تاسىمالدانعان. ياعني ەشقانداي تالاپ ساقتالماعان. سونداي-اق بالمۇزداق ساتاتىن نىسانداعى 5 قىزمەتكەردىڭ بىرەۋىنىڭ عانا مەديتسينالىق كىتاپشاسى بار. قىسقاسى, كاسىپكەر ءوز ىسىنە جاۋاپسىز جانە سالعىرت قاراعان. بۇل ورايدا وقو كاسىپكەرلەر پالاتاسىنىڭ ديرەكتورى اسقار ابۋباكىروۆ قوعامدىق تەكسەرۋدى كۇشەيتۋ قاجەت دەپ ەسەپتەيدى.
ال وڭتۇستىكتە بالمۇزداقتان ۋلانعان ادامداردىڭ جاعدايىنا قاتىستى پىكىر بىلدىرگەن دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشين شاعىن جانە ورتا بيزنەس نىساندارى ايتارلىقتاي ەمەس ەپيدەميولوگيالىق ماڭىزداعى ورىندارعا جاتاتىنىن, ولار تەك حالىقتىڭ شاعىمى تۇسكەن ۋاقىتتا نەمەسە قانداي دا ءبىر توتەنشە جاعدايلار تۋىنداعاندا عانا تەكسەرىلەتىنىن ايتىپ ءوتتى. الداعى ۋاقىتتا ەلىمىزدەگى جۇمساق بالمۇزداق ساتاتىن بارلىق نىساندار تەكسەرىلەتىن بولادى. «بىرىنشىدەن, بۇل نۇكتە جابىلدى. ەكىنشىدەن, ماتەريالدار تەرگەۋ ورگاندارىنا تاپسىرىلىپ, وڭتۇستىك قازاقستان وبلىسىنىڭ ىشكى ىستەر باسقارماسى تەكسەرىس اياقتالعاننان كەيىن وسى ورىندى اشىپ, ساپاسىز ءونىمدى ساتقان جەكە كاسىپكەر ەشمۇراتوۆتىڭ كىناسى قانشالىقتى ەكەنىن انىقتايتىن بولادى», دەدى ج.بەكشين جۋرناليستەرگە بەرگەن سۇحباتىندا.
ايتا كەتەلىك, وڭتۇستىك قازاقستان وبلىسىنىڭ اكىمى جانسەيىت تۇيمەباەۆ اۋرۋحاناعا بارىپ, ءجىتى ىشەك ينفەكتسياسىمەن تۇسكەن ناۋقاستاردىڭ جاعدايىن بىلگەن بولاتىن. ودان كەيىن جەدەل شتاب وتىرىسىن وتكىزگەن وبلىس اكىمىنىڭ تاپسىرماسىمەن ارنايى جۇمىس توبى قۇرىلىپ, قىزمەتتىك تەكسەرۋ شارالارى جۇرگىزىلۋدە. سونداي-اق شتاب وتىرىسىندا بولعان وقيعانىڭ سەبەپ-سالدارى تالقىلاندى. مامانداردىڭ ايتۋىنشا, ءجىتى ىشەك ينفەكتسياسى سانيتارلىق ەپيدەميولوگيالىق تالاپتاردىڭ ساقتالماۋىنان بولعان.
عالىمجان ەلشىباي,
«ەگەمەن قازاقستان»
شىمكەنت
