بيىل داۋلەت تۇرلىحانوۆتىڭ جۇلدەسى ءۇشىن وتكەن جارىستىڭ جالاۋى 19-شى مارتە جەلبىرەدى. تالاي دارىندى جاستىڭ ۇلكەن ارەناعا شىعۋىنا العاشقى باسپالداق بولعان تۋرنيرگە بۇل جولى 29 كوماندا قاتىستى. ايتۋلى دودا وسى جىلى وتەتىن الەم جانە ازيا بىرىنشىلىكتەرىنە ىرىكتەۋ سىنى رەتىندە قاراستىرىلعاندىقتان, جاسوسپىرىمدەر اراسىنداعى جارىستاردا جاسىنداي جارقىراپ جۇرگەن بالعىن بالۋانداردىڭ بارلىعى الماتىعا اسىعىپ جەتتى. جالپىكوماندالىق ەسەپتە ءبىرىنشى ورىندى قاجىمۇقان مۇڭايتپاسوۆ اتىنداعى سپورتتاعى دارىندى بالالارعا ارنالعان رەسپۋبليكالىق مەكتەپ-ينتەرناتتىڭ تۇلەكتەرى ولجالادى. ەكىنشى ورىندى وڭتۇستىك قازاقستان وبلىسىنىڭ سپورتشىلارى يەلەنسە, ۇزدىك ۇشتىكتى سولتۇستىك قازاقستان وبلىسىنىڭ قۇراماسى قورىتىندىلادى.
ال جەكەلەگەن سالماق دارەجەلەرى بويىنشا مىنا بالۋاندار جەڭىس تۇعىرىنىڭ ەڭ بيىك ساتىسىنا كوتەرىلدى: 45 كگ – ەراسىل مامىربەكوۆ (شقو), 48 كگ – داۋلەت ءاشىرxانوۆ (رەسپۋبليكالىق سپورت كوللەدج), 51 كگ –دياس اسكەرباي (شقو), 55 كگ – دىنمۇحامەد قوشقار (ق.مۇڭايتپاسوۆ اتىنداعى مەكتەپ-ينتەرنات), 60 كگ – ماديار ءماۋلىتحانوۆ (الماتى وبلىسى), 65 كگ – ءابدىازىم قاراباەۆ (وقو), 71 كگ – ۆەيسال ەيۋبوۆ (قوستاناي), 80 كگ – ەرزات ەرلانوۆ (ق.مۇڭايتپاسوۆ اتىنداعى مەكتەپ-ينتەرنات), 92 كگ – داۋرەن امانعاليەۆ (قوستاناي) جانە 110 كگ – راديون يسقوجين (سقو).
بۇگىنگى تاڭدا قازاق ەلى نامىسىن حالىقارالىق ارەنادا قورعاپ جۇرگەن بالۋاندارىنىڭ بارلىعى دا كەزىندە وسى تۋرنيردە شىڭدالعان. سول سەبەپتى دە وسىنداي جارىستاردىڭ ءجيى ءوتۋى وسكەلەڭ ۇرپاق ءۇشىن اسا قاجەت. بيىلعى دودانىڭ دا دەڭگەيى اسا جوعارى بولعانىنا انىق كوزىم جەتىپ وتىر. رەسپۋبليكامىزدىڭ ءار قيىرىنان جينالعان 250 جاس ورەن بوز كىلەمدە بارىن سالدى. ءبىزدىڭ جاس بالۋاندار الەم جانە ازيا بىرىنشىلىكتەرىندە دە ءوز جانكۇيەرلەرىن جەرگە قاراتپايتىنىنا سەنىمدىمىن, دەيدى وسى ءتۋرنيردى باسىنان اياعىنا دەيىن تاپجىلماي تاماشالاعان ماسكەۋ وليمپياداسىنىڭ جەڭىمپازى جاقسىلىق ۇشكەمپىروۆ.
جاقسىلىق اعامىزدان بولەك, يۋري مەلنيچەنكو, باقتيار بايسەيىتوۆ, رۋسلان جۇمابەكوۆ, نۇرباقىت تەڭىزباەۆ, ەرمەك كوكەتوۆ سىندى ەلىمىزدىڭ اتاقتى بالۋاندارى دا جارىستىڭ باسى-قاسىندا ءجۇردى. شەتەلدەن كەلگەن قوناقتاردىڭ دا قاتارى مول بولدى. سولاردىڭ اراسىنان وليمپيادا چەمپيوندارى – كورەيالىق كيم ەن نام مەن بەلورۋسسيالىق كاماندار مادجيدوۆ جانە وليمپيا ويىندارىنىڭ قولا جۇلدەگەرى سەرگەي دەمەشكەۆيچتى اتاپ وتۋگە بولادى.
عالىم سۇلەيمەن,
«ەگەمەن قازاقستان»
الماتى
